भांगरभूंय | प्रतिनिधी
पेडणें : तुयें पंचायत वाठार कोयर मुक्त करपा खातीर सगळ्या ग्रामस्थांनी सहकार्य करपाची गरज आसा. आज काल लोक सगल्या रस्त्यांच्या कुशीक मेकळे सुवातेर व्हडा प्रमाणांत कोयर उडयतात आनी तो वाठारा बुरसो करून उडयतात. आतां कोयर उडयतना कोणूय सांपडल्यार तांचेर पंचायती वतीन २५ हजार रुपया दंडात्मक कारवाय करतले. ताका लागून दरेका नागरिकांनी, तशेंच जांचे कडेन बिराडकार आसात तांचोय सुको कोयर तुयें पंचायतीचे जे कामगार दर सप्तकाक कोयर व्हरपाक येतात, तांचे कडेन दिवचो. ना जाल्यार जे कोण कोयर रस्त्यार वा मेकळे सुवातेर उडयतात तांचेर कारवाय करपाचो थारावूय ग्रामपंचायत मंडळान मंजूर केला, अशी म्हायती पंच निलेश कांदोळकार हांणी आपल्या वाठारांत घराघरांनी वचून जागृताय करतना दिली.
कांदोळकार हांणी मुखार सांगलें, जे कोण घर बिराडाक दितात तांणी सुको कोयर भायर उडय नासतना दर बुधवारा येवपी पंचायतीच्या कामगारां कडेन दिवचो. आपलो वाठार दरेकल्यान नितळ दवरचो. गांव सुंदर दवरपा खातीर फकत पंचायत मंडळांनीच न्हय तर दरेका नागरिकांनी सहकार्य करपाची गरज आसा. आपापली जापसालदारकी वळखून गांव कोयर मुक्त करपा खातीर यत्न करचे, असो उलो तांणी मारलो.
पंचायतीक सरकारा वरवीं कोयर उखलपाक निधी मेळनाशिल्ल्यान पंचायतीच्या निधींतल्यान हो उपक्रम राबयतले. ताका लागून कमी शुल्कान दरेका घरांतलो कोयर उखलपाचो फुडाकार पंचायतीन घेतला, अशेंय तांणी म्हणलें.
फुडाराक ओल्या कोयरा विशींय पावलां उबारतले
सध्या पंचायत वाठारांतलो सुको कोयर उखलपाक पंचायत मंडळ यत्न करता. फुडाराक ओल्या कोयराचोय विलो लावपाचो फुडाकार घेतले. ताका लागून पयलीं सगळ्या नागरिकांनी सुको कोयर दिवचो, अशें तांणी सांगलें.
मजगतीं, तुयें पंचायत वाठारांतलें उद्देगीक वसणुकेचे आशिकुशीक चडशे बिगर गोंयकार बिराडाक रावतात. हे सुवातेर व्हडा प्रमाणांत कोयराची समस्या निर्माण जाता. हे बिराडकार कोयराची म्हायती घर धनयाक दिनासतना सगळो कोयर पोतयांनी बांदून मेकळे सुवातेर व्हरून उडयतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
