आतां भारतीय दाळिंब अमेरिकेंत
भांगरभूंय | प्रतिनिधी
भांगरभूंय । खबरां संस्था
ठाणे ः भारतीय दाळिंब निर्गतीचेर 2018 वर्सा घाल्ली बंदी 2022 वर्सा काडले उपरांत फाटल्या वर्सा सावन अमेरिकेन घाल्ले नेम आनी अटी पुराय करुन बिरेस्तारा 150 किल वजनाच्यो 450 दाळिंबाच्यो पेटयो विमानान अमेरिकेंत धाडल्यात. नवी मुंबयच्या तुर्भेच्या ‘अपेडा’च्या कार्यालयाची सरवेवस्थापक विनीता सुधांशू हिणें पेटी व्हरपी गाडयेंक पाचवो बावटो दाखयलो. फुडाराक निर्गत वाडोवपाच्या हेतान दर्यांतल्यानय दाळिंब पावोवपाचे यत्न करतले, जाचो थेट फायदो शेतकारांक जातलो.
दाळिंबाच्या बियांनी फळमाशांचें (एक तरेची कीड) प्रमाण चड आशिल्ल्यान 2018 वर्सा सावन अमेरिकेन भारतीय दाळिंब निर्यातीचेर बंदी घाल्ली. उपरांत केंद्र सरकार आनी प्लांट क्वारंटायन इंडियान अमेरिकेच्या शेतकी खात्या कडेन चर्चा करुन ही बंदी काडून उडोवपा खातीर यत्न सुरू केले. ह्या यत्नांक लागून ही बंदी 2022 वर्सा काडिल्ली. पूण कांय नेम आनी अटी घाल्यो. दाळिंबाच्या विकेंद्रीकरणाचे प्रक्रिये प्रमाण बिरेस्तारा अमेरिकेंतल्या न्यूयॉर्कांत प्रयोगीक पद्दतीन 450 पेटी म्हळ्यार 150 किलो दाळिंब धाडल्यात. विनीता सुधांशून हे निर्याती उपरांत अमेरिकेंत व्हडली बाजारपेठ उक्ती जातली असो विस्वास उक्तायलो.
भारतीय दाळिंबात कॅन्सरा आड झुजपी अॅन्टीऑक्सीडंट आसात. थंयच्या कातीच्या विकारांचेर उपचार करपा खातीर आहार मार्गदर्शक तत्वांत दाळिंबाचो आस्पाव केला. देखून अमेरिकेंत दाळिंबाक व्हड मागणी आसा. अमेरिकेंतल्या कॅलिफोर्निया दाळिंबाच्या जाती परस भारतीय दाळिंबाच्या जातीक चड मागणी आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
