भांगरभूंय | प्रतिनिधी
शिस्ती खातीर केंद्रीय फुडाऱ्यांची लेगीत आसतली आमदारांचेर नदरपणजी : भारतीय जनता पक्षाचे जितले आमदार आसात तांचें कामगिरीचें रिपोर्ट कार्ड जातलें. आमदारां कडल्यान शिस्तभंगाचे प्रकार पक्ष खपोवन घेवचें ना. पक्षा खातीर शिस्त ही खूब म्हत्वाची आसा. शिस्ती खातीर केंद्रीय फुडाऱ्यांची लेगीत आमदारांचेर नदर आसतली, अशें प्रदेश भाजप अध्यक्ष दामू नायक हांणी सांगलें.
भारतीय जनता पक्षा वतीन सध्या दरेकी मतदारसंघांत कार्यकर्त्यांचे मेळावे सुरू आसात. बुधवारा पणजेत उत्तर गोंय सक्रीय कार्यकर्ता संमेलन जालें. आतां हाचें फुडें उरिल्ल्या मतदारसंघांत मेळावे जातलें.
भारतीय जनता पक्षाचे मेळावे सुरू आसतनाच मंत्रीमंडळ फेरबदलाची चर्चा सुरू आसा. मंत्रीमंडळ फेरबदल हो मुख्यमंत्र्यांच्या अखत्यारीतलो विशय आसा. हाचे विशीं हांव उलोवंक शकना. पक्षाचो विस्तार, शिस्त हाचें विशीं तशेंच वेंचणुकेच्या तयारी विशीं हांव उलोवंक शकता. येत्या विधानसभा वेंचणुकेंत 27 सुवातो जिखपाचे उद्दिश्ठ आसा. हें नदरेंतल्यान तयारी करपाक जाय. सगळ्या मतदारसंघांत पक्ष तयारी करतलो. युती जाली जाल्यार खयचे जागे सोडपाचे हे विशींचो निर्णय त्या वेळार जातलो अानी हे विशीं केंद्रीय फुडारी निर्णय घेतले. सध्या सगळ्या मतदारसंघांत पक्षकार्य करून पक्ष घटमूट करपाचे केंद्रीय फुडाऱ्यांचो आदेश आसा.
पक्षा परस आमदार वा मंत्री व्हड आसूंक शकना. आमदार तशेंच मंत्र्यांची वर्तणूक तशेंच विधानांचेर सगळ्यांची नदर आसतली. पक्षात बेशिस्तीक थारो आसचो ना. एखादो आमदार बरीच वर्सां राजकारणांत आसलो वा बरेच खेपे वेंचून आयिल्लो आसलो तरी पक्षाचे आदेश वा शिस्तीक पालव दिवचोच पडटलो. आमदारांची कामगिरी, कार्यकर्त्यां कडले तांचे संबंद, पक्षा खातीर योगदान हाचें रिपोर्ट कार्ड तयार जातलें. पक्ष जी कार्यावळ आयोजीत करता, तातूत ताका वांटो घेवचो पडटलो. उमेदवारी दिवचे वेळार कामगिरी तशेंच हेर सगळ्या गजालींचो विचार जातलो, अशें दामू नायक हांणी सांगलें.
आतां पक्षाचो बरोच विस्तार जाला. काँग्रेस तशेंच हेर पक्षांतल्यान बरेच आमदार तशेंच कार्यकर्ते आयल्या. तांचे आपले अशें कार्यकर्ते आसात. ह्या सगळ्यांक आस्पावन घेवपाचे म्हजें यत्न आसात. पक्षाचे कार्यकर्ते तशेंच पक्षा खातीर तांकां वेळ दिवचो पडटलो. आमदारांक जाय ते पद्दतीन मतदारसंघांत पक्षाचे कार्य चलचें ना. दिल्ली भेटींत अध्यक्ष जे. पी. नड्डा तशेंच प्रधानमंत्री नरेंद्र मोदी हांचे कडेन म्हजी चर्चा जाली. पक्षाच्या फुडल्या वाटचाली विशीं कितें येवजण आसा? असो प्रस्न केलो तेन्ना, हाचें फुडें शिस्त आनी कामगिरीक म्हत्व आसतलें, अशें दामू नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
