भांगरभूंय | प्रतिनिधी
पणजीः गोंय मेडिकल कॉलेज हॉस्पिटल (गोमॅकॉ) भशेन भलायकी खातें कॅन्सर दुयेंती खातीर नोंदणीय तयार करतले. हे नोंदणीक लागून राज्यांतल्या कॅन्सर दुयेंतींची म्हायती दर वर्सा मेळटली आनी ताचो उपेग संशोधनाक जातलो.
गोमॅकॉचे सामुदायीक विभागाचे मुखेली डॉ. जगदीश काकोडकार हांणी आमच्या प्रतिनिधी कडेन उलयतना शुक्रारा ही म्हायती दिली. आतां मेरेन फकत गोमेकाँत कॅन्सर दुयेंतींची नोंदणी आशिल्ली. गोमॅकाँत कॅन्सराचेर उपचारा खातीर येवपी दुयेंतींची थंय नोंदणी सुरू आसा. पूण खाजगी हॉस्पिटलांत कॅन्सराचेर उपचार घेतिल्ल्या दुयेंती संबंदी ही म्हायती सरकार उपलब्ध करूंक नाशिल्लें. देखून गोमॅकाॅ वगळून हेर हॉस्पिटलांनी कॅन्सराचेर उपचार करपी दुयेंती विशीं म्हायती भलायकी खात्याचे नोंदणींतल्यान मेळटली अशें डॉ. काकोडकार हांणी म्हणलें.
फाटल्या कांय वर्सां सावन राज्यांत कॅन्सर दुयेंतींचो आंकडो वाडत आसा. ते खातीर राज्य सरकारान हे संबंदी संशोधन करपाचो निर्णय घेतला. तशेंच गोमॅकॉ आनी भलायकी खात्या कडल्यान मेळिल्ले म्हायती प्रमाण राज्यांत दर वर्सा कितले कॅन्सर दुयेंती मेळटात, खंयच्या प्रकारचो कॅन्सर वाडत आसा, खंयचे उपचार कॅन्सर दुयेंतीक वाचोवपाक येसस्वी जातात, खंयच्या वाठारांनी कॅन्सर दुयेंतींची संख्या वाडत आसा, ताचीं नेमकी कारणां कितें, ह्या नोंदणी वरवीं जायत्यो गजाली मेळटात अशें तांणी सांगलें.
राज्यांतल्या चार वाठारांनी मोबायल कॅन्सर डिटेक्शन व्हॅनीतल्यान गोमॅकॉन केल्ल्या कॅन्सराची तपासणी मोहिमेंत कॅन्सराक लागीं पावपी जायते दुयेंती सांपडल्यात. तशेंच दर वर्सा कॅन्सराचे दुयेंती वाडत आसात. हे फाटभुंयेर विरोधी पक्ष सरकारान कॅन्सराचेर संशोधन करचें अशी मागणी करताले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
