भांगरभूंय | प्रतिनिधी
मुखार शिकपाचें आसल्यार गुणपत्रिका वापरून प्रवेश घेवंक मेळटा. उंचेलें शिक्षण घेतलो जाल्यार बरे गूण मेळपाक जाय. नोकरी करतलो जाल्यारूय शिक्षणीक प्रमाणपत्रां भोव गरजेचीं. ताचेरूच आदारून नोकरी मेळटा अशें ना. पूण तरीय तीं दाखोवचींच पडटात. आनीक कसली कुशळटाय आसा जाल्यार ताचेंय प्रमाणपत्र म्हत्वाचें. सांगपाचें म्हणल्यार गुणपत्रिका, प्रमाणपत्र हें शिक्षण, नोकरे खातीर गरजेचें. नोकरी भानगड प्रकरणा संबंदी दर दिसा नवी म्हायती उक्तडार येत आसा. ह्या प्रकरणांत उमेदवारां कडल्यान पयशे घेवन तांकां मागीर नोकरीच दिवंक ना म्हणून तांणी पुलीस कागाळ केली आनी आतां एकेक करून सगलेच पयशे दिवपी मुखार येत आसात. नोकरेचें हांयस दाखोवपी ठकसेनांनी थोड्यांक नोकऱ्योय दिल्यातूय खंय. म्हणटकच त्या उमेदवारांची प्रमाणपत्रां तपासून पळोवपाची गरज आसा, अशें बरयतां थंय आसा, काल बोगस गुणपत्रिका आनी प्रमाणपत्रां दिवपी गुन्यांवकारांचें एक रॅकेट पुलिसांनी उध्वस्त केलें. तातूंत पांच जाणांक अटक केल्या. विशेश म्हणल्यार, ह्या प्रकरणाची मुखेल सुत्रधार एक बायल आसा. गवंडाळी- कुमारजुंवेंची. तिचो एक दादलो वांगडी आसा आनी उरिल्ले बोगस गुणपत्रिका घेवपी तरणाटे. आतां दीस मुखार वतात, तशे आनिकूय फटिंगांचे पाय सांपडटले. हांचो नोकरी भानगडींत धरिल्ल्या ठकसेनां कडेन संबंद आसा काय ना, ताचो तपास पुलिसांक करचो पडटलो. सध्या तपासाची दिशा योग्य दिशेन आसा. पूण, करबटाक धरतां- धरतां मदींच विस्वण, चणाक सांपडलें जाल्यार ताकाय धरपाचें धाडस दाखोवचें पडटलें.
नोकरी मेळोवपाक कांय जाण बोगस प्रमाणपत्र लायतात. खास करून जल्मदाखलो. कारण पांच वर्सां उणीं लायतकच निवृत्तीची तारीख मुखार वता. पूण, तो लायलो जाल्यार शालेय गुणपत्रिका आनी दाखल्यां वयली तारिखूय बदलची पडली. म्हणटकच जल्मदाखलो आनी हेर सगलें बोगसूच करचें पडलें ना? तसल्यांक वयर धरल्या तसली चली मजत करता. तिणें पुलिसांक दिल्ले म्हायतींत, धावी, बारावी मेरेनची गुणपत्रिका जाय जाल्यार 25 हजार ते 35 हजार रुपया ‘च्यावे’क म्हूण दिवचे पडटात. पदवी अभ्यासक्रमाच्या गुणपत्रिका, दाखले जाय जाल्यार 55 हजार ते 1 लाख 35 हजार रुपया. हें म्हाजाळ खूब व्हडलें आसतलें. तातूंत आडकल्ले दुबावीत सोदता म्हणसर पुलिसांक नाका पुरो जातलें. हे पयशे जी- पे (वा रोख) वरवीं दिल्यात. जी-पे कडेन हाची नोंद आसूं येता. हे टोळये कडल्यान उमेदवाराक जाय ते तरेचे दाखले, प्रमाणपत्रां, गुणपत्रिका मेळटाल्यो. दिल्ली ते गल्ली मेरेन! तुवें फक्त शिक्षणीक संस्थेचें नांव सांगपाचें, प्रमाणपत्र हजर. पैसा फेको तमाशा देखो! काल पुलिसांनी धरल्यात तांणी इग्नू, ओपन स्कुलाचीं प्रमाणपत्रां घेतल्यांत. तातूंत गोंयच्या म्हाविद्यालयांचींय आसूं येतात. ह्या प्रकरणांत फक्त ही टोळीच घुस्पल्या काय तिचे वांगडा हायस्कुलां, काॅलेजींनी काम करपी कोण कर्मचारीय आसात? दाखले, प्रमाणपत्रां डिझायन कोण करतालो? छापून कोण दितालो? ताचो तपास आतां सुरू जातलो. कसली खबर कानार आदळत, तें सांगपाक येना.
ह्या ठकसेनां कडल्यान गुणपत्रिका विकत घेवन नोकरी मेळोवपी कोण आसात जाल्यार तांचींय आतां भियेवन गुळी जाल्या आसतली. म्हणजे जर तांणी बोगस कागदां सरकारी वा खाजगी प्रशासनाक सादर केल्यांत जाल्यार! प्रामाणीक मनशाक भिवपाची गरज ना. सरकारी यंत्रणेनूय आतां तांचो डाटा तपासचो पडटलो. नोकरेक रुजू जावपाच्या वेळार, प्रमोशनाच्या वेळार कोणें कितें गडबड केल्या जाल्यार ती भायर सरूं येता. कारण तपास यंत्रणेन हें प्रकरण गंभीरपणान घेतलां. सरकारानूय नेट धरला, कारण हो तांकांय बदनाम करपी प्रकार आसा. धरिल्ले पांचूय दुबावीत नीज गोंयकार. ते सरकारी नोकरी करतात काय खाजगी, काय अजून बेकार आसात, तेंय पुलिसांक सोदचें पडटलें. कांय वर्सां पयलीं बोगस शिक्षणीक प्रमाणपत्र दिलें म्हूण पुलिसाची चवकशी जाल्ली. हेर कडेनूय असले प्रकार दिशिल्ले. बोगस कागदां सादर करून नोकरी मेळोवप हो हेर उमेदवारांचेर अन्याय. आमच्या राज्याचो शिक्षणीक, प्रशासकीय दर्जो उणो करपाची ही कृती. तिका माफी ना. फाल्यां ढ, मठ्ठ उमेदवार बोगस गुणपत्रिका घेवन कामाक लागले जाल्यार त्या खात्याचें काम कशें चलतलें? थोड्यांक अर्ज पसून बरोवपाक कळना खंय. कांय लोकांची कश्ट करपाची संवय मोडल्या, ताका लागून ते मागीर असो शाॅर्टकट आपणायतात आनी त्रासांत पडटात!! देवाची बडी आवाज करिनासतना फाटीर बसता ती अशी!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
