आतां फकत 3 दिसांत पीएफाचे पयशे तुमच्या खात्यांत

भांगरभूंय | प्रतिनिधी

नवी दिल्ली, खबरां संस्था ः कर्मचारी प्रॉव्हिडेंट फंड ऑर्गनायझेशनान (EPFO) वैजकी, शिक्षण, लग्न आनी घर खरेदी करपा खातीर पीएफ काडपाची प्रक्रिया आतां सोंपी केल्या. ते खातीर ऑटोमॅटिक क्लेम सेटलमेंटची (ऑटो- मोड सेटलमेंट) सुविधा सुरू केल्या. देखून आतां तीन दिसां भितर हे पयशे नागरिकांच्या खात्यांत जमा जातले.
सध्या ह्या प्रक्रियेक 10 ते 15 दीस लागतात. कारण ईपीएफ वांगड्याची पात्रताय, क्लेम करपा खातीर सादर केल्ले कागदपत्र, केवायसी अटी, वैध बँक खातें आदी तपासता. आनी हे प्रक्रियेंत अवैध क्लेम चड करून न्हयकारतात. देखून पीएफ काडपाक बरोच वेळ लागता. आतां ही प्रक्रिया ऑनलायन आनी सोंपी जातली.

पीएफ क्लेम करपाची पुराय प्रक्रिया –

1. UAN आनी पासवर्ड वापरून EPFO ​​पोर्टलाचेर लॉगीन करचें.
2. उपरांत ‘ऑनलायन सेवा’ हातूंत वचून ‘क्लेम’ विभाग निवडचो पडटलो.
3. बँक खातें तपासात. उपरांत Proceed for Online claim हाचेर क्लिक करात.
4. आतां एक नवे पान उगडटलें जंय PF Advance Form 31 निवडचो पडटलो.
5. खंयच्या पीएफ खात्यांतल्यान पयशे काडपाचे आसात तें तुमकां निवडचे पडटलें.
6. उपरांत पयशे काडपाचें कारण, काडपाची रक्कम आनी पत्तो घालचो पडटलो.
7. हे प्रक्रिये उपरांत चेक वा पासबुकाची स्कॅन कॉपी अपलोड करात.
8. आतां तुमकां तुमची संमती दिवची पडटली आनी आधारा कडेन सत्यापीत करची पडटली.
9. क्लेम प्रक्रिया केल्या उपरांत तो नियोक्त्या कडेन मान्यताये खातीर वतलो.
10. गिरायक ऑनलायन सेवे खाला क्लेम स्थिती तपासूंक शकता.