भांगरभूंय | प्रतिनिधी
नवी दिल्ली: केंद्र सरकारान आयतारा एक निर्णय घेतलो. आतां रेशन दुकानां वांगडाच पेट्रोल पंपांचेरूय रॉकेल मेळटलें. आतां सरकारी तेल कंपन्यो निश्चीत केल्ल्या पेत्रोल पंपांक रॉकेल दवरपाक आनी वाटपाक मेळटलें.
दरेका जिल्ह्यांत राज्य सरकार वा केंद्रशासीत प्रदेश प्रशासन चडांत चड २ पेत्रोल पंपांची निवड करतलें. ह्या पेत्रोल पंपांचेर चडांत चड ५ हजार लिटरां मेरेन रॉकेल दवरपाक मेळटलें.
पुरवण सोपी करपा खातीर सरकारान ६० दिसां खातीर भौशीक वाटपाची प्रणाली नेम सदळ केल्यात. जाका लागून गरजेवंतांक तेल वेळार पावपाक मेळटलें.
खंयच्या अटीं सयत केरोसीन मेळटलें
केरोसीनाचो वापर फकत रांदपा खातीर आनी उजवाडा खातीर जातलो. पेट्रोल पंपाचेर ५ हजार लिटर परस चड स्टॉक दवरप ना. सुरक्षेचे सगळे नेम आनी कार्यकारी मार्गदर्शक तत्वां पाळचीं पडटलीं. केरोसीन सांठोवप, पुरवण आनी वितरण हांची पुराय नोंद दवरची पडटली. प्रशासन आनी संबंदीत एजन्सी खंयच्याय वेळार हाची तपासणी करूंक शकतात. २७ मार्च: पेट्रोल-डिझेलवेलें उत्पादन शुल्क १०-१० रुपयांनी देंवलें, दर वाडचें ना.
पेत्रोलाचेर शुल्क दर लिटराक १३ रुपया वयल्यान ३ रुपया मेरेन उणें केलां, जाल्यार डिझेलाचेर शुल्क १० रुपया वयल्यान शुन्य केलां. अबकारी कर उणो करून पेत्रोल आनी डिझेलाचे दर स्थीर दवरल्यात.
इराण आनी अमेरिकेंतल्या आनी इझ्राएल हांचे मदल्या झुजाक लागून आंतरराश्ट्रीय बाजारांत कच्च्या तेलाचें दर ७० डॉलरांतल्यान दर बॅरलाक ११० डॉलर परस चड जाल्यात. ताका लागून तेल कंपन्यांक दर लिटराक ३० रुपया मेरेन लुकसाण जावपाक लागलां. तेल कंपनींनी लुकसाण भरून काडपा खातीर दर वाडोवंक शकताले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
