भांगरभूंय | प्रतिनिधी
नागपूर, खबरां संस्था: कोल्हापूरच्या मार्गान गोंय, कोकणांत वयचें आसल्यार आंबोली घाटा बगर हेर पर्याय ना. मात, फुडाराक कोल्हापूर मागारन सिंधुदुर्ग वतना आंबोली घाट लागचो ना. विशेश म्हळ्यार कोल्हापूर ते सिंधूदुर्ग हो चार वरांचो प्रवास फकत एका वरानूच पुराय जातलो. हें नागपूर-गोंय शक्तीपीठ महामार्गाक लागून शक्य जावपाचें आसा.
महाराष्ट्रांतल्या १२ जिल्ह्यांतल्यान वचपी हो शक्तीपीठ महामार्ग गोंयकारांकूच न्हय तर कोकणांतल्या लोकां खातीर गेम चेंजर थारतलो.
२०२३त समृद्धी महामार्गाचे फाटभूंयेर शक्तीपीठ महामार्ग बांदपाची घोशणा उपमुख्यमंत्री देवेंद्र फडणवीस हांणी केल्ली. हो ८०२ किमी लांबायेचो ग्रीनफिल्ड हायवे नागपूर ते गोंयांक सरळ जोडटलो. तीन शक्तीपीठांक हो महामार्ग जोडपाचो आशिल्ल्यान ह्या महामार्गाक ‘शक्तीपीठ’ महामार्ग अशें नांव दिलां. सध्या नागपूरच्यान गोंयांत येवपा खातीर रस्त्यान १८ वरां लागतात. मात हो शक्तीपीठ महामार्ग तयार जाले उपरांत हो प्रवास फकत आठ वरांचोच आसतलो.
ह्या महामार्गाचेर २६ सुवातांचेर इंटरचेंज आसतले. जाल्यार ४८ व्हडले पूल, ३० बोगदे, आठ रेल्वे क्रॉसींग आसतले. ह्या महामार्गाचो सगळ्यांत म्हत्वाचो टप्पो आसा तो आंबोली घाट सेक्शनांत. आंबोली घाटाच्या पश्चीम घाटा सकयल २ बोगदे बांदपाचें नियोजन आसा. हो बोगदो २१.९ किलोमीटर लांब आसतलो. हो देशांतलो सगळ्यांत लांब बोगदो थारपाक शकता. हो बोगदो तयार जालो काय कोल्हापूर ते सिंधुदुर्ग जिल्ह्याचो प्रवास फकत एका वरान जातलो. कारण आंबोली घाटाच्या मागारन हो प्रवास वट्ट चार वरांचो आसा.
शक्तीपीठ महामार्गा मदीं आडखळी आयल्यार थंय पर्याय सोदतले. विरोध आशिल्ल्या भागांत फ्लायओव्हर वा सध्या आशिल्ल्या महामार्गाक शक्तीपीठ महामार्ग जोडटले. हे फाटभूंयेर बदल करतले, अशें मुख्यमंत्री देवेंद्र फडणवीस हांणी सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
