आतां धारेश्वरी देवळाचो वाद निर्माण

भांगरभूंय | प्रतिनिधी

पुरयताक देवकार्यां पसून पयस दरपाचो गांवांचो निर्णय

भांगरभूंय । प्रतिनिधी

फोंडें: धारबांदोडें म्हालांतल्या धारेश्वरी देवळाचो वाद सुरू जाला. देवळाच्या पुरयतान नव्यान बांदिल्लीं दोन देवळां आपले खाजगी जमनीर आसात, असो दावो केला. नव्यान बांदिल्ल्या देवळा लागसार बांदिल्लो दुरीग बेकायदो आसा आनी ते संबंदांत रितसर कागाळ केल्ल्यान पुरयताक सध्या पंचायत वाठारांत देवकार्य करपा पासून पयस दवरपाचो निर्णय लोकांनी घेतला. ताका लागून फुडारांत हें प्रकरण आनी तापपाचीं चिन्नां दिसपाक लागल्यांत.

धारबांदोडें म्हालांतल्या नामनेच्या धारेश्वरी देवळाचो विशय फाटल्या कांय दिसां सावन चर्चेंत आयला. पंचायत वाठारांतल्या सुमार 10- 12 गांवांतले लोक देवळाच्या साबार कार्यावळींनी वांटो घेतात. नव्यान बांदिल्ल्या देवळा खातीर सगळ्या गांवांतल्या लोकांनी व्हड योगदान दिलां. देवळांत पुजा करपा वांगडाच पंचायत वाठारांतल्या सगळ्या गांवांतल्या लोकांच्या घरा देवकार्य करचे खातीर त्या देवळांतल्या पुरयताक मनाय केल्या. देवळा लागसार दुरीग बांदपा खातीर आपली परवानगी घेवंक नाशिल्ल्यान थळावी पंचायत, गट विकास अधिकारी, पंचायत संचालका कडेन त्या पुरयतान कागाळ केल्या. बांदिल्लो दुरीग मोडपा खातीर कागाळ केल्ल्यान सगळ्या गांवांतले लोक खुबळ्ळ्यात.

थळावे पंचायती वतीन हालींच दुरगाची पळोवणी केली. त्या वेळार सगळ्या गांवांतले मेळून सुमार 150 गांवकार हाजीर आशिल्ले. त्या वेळार हे मुखार पुरयताक सगळ्या गांवांनी देवकार्य करचे खातीर आपोवचो न्हय असो निर्णय घेतलो. पुरयताक घरा कडेन वचपा खातीर आदींच रस्तो दवरला. ताका लागून पुरयत आनी ताचीं घरचीं कसलेच आडखळी बगर रस्त्या वयल्यान यो- वच करपाक शकतात, पूण अचकीत पुरयतान आपलें रूप बदलिल्ल्यान तणाव निर्माण जावपाची शक्यताय वाडल्या.

मेळिल्ले म्हायती प्रमाण फाटल्या कितल्याश्याच वर्सां सावन पुरयत आपल्या घरा लागसार आशिल्ल्या देवळांत पुजा आनी वाठारांतल्या हेर गांवांनी वचून देवकार्य करतालो. देवूळ खूब पोरणें आशिल्ल्यान कांय वर्सां आदीं सगळ्या गांवांतल्या लोकांनी तेच सुवातेर नवें देवूळ बांदपाचो निर्णय घेतलो. ते खातीर लोकांनी विवीध तरेन निधी एकठांय करून देवूळ बांदलें. ताका लागून पुरयताच्या मनांत कसलो तरी वेगळोच दुबाव निर्माम जाल्ल्याची शक्यताय लोक उक्तायतात.

2018 सावन पुरयत आनी गांवच्या लोकां मदीं अंतर येवपाक लागलें. चवथीच्या काळांत प्रकरण तापपाचें, पूण लोकांनी पाशियेंस काडून स्थिती हाताळ्ळी. पूण अचकीत पुरयतान जमनीच्या प्रस्ना वयल्यान बेकायदो तरेन दुरीग बांदिल्ल्याची कागाळ केल्ल्यान सगळ्या गांवांतले लोक खुबळिल्ले स्थितींत आसात. हे खातीर फुडारांत तणाव निर्माण जावपाची शक्यताय आसा. कायदो आनी सुवेवस्था इबाडपाची शक्यताय कांय जाण उक्तायतात. कारण सगळ्या गांवांतल्या लोकांनी देवळांत नवो पुरयत नेमला. तशेंच सगळ्या गांवांतल्या लोकांच्या घरा देवकार्य करचे खातीर नव्या पुरयताक मंजुरी दिल्या.

पुरयताची भानगड उक्ती करपाच्यो हालचाली

फोंडें म्हालांतल्या मडकय आनी नवदुर्गा देवस्थानाच्या प्रस्ना वयल्यान म्हाजन आनी लोकांचो वाद कांय वर्सा सावन सुरू आसा. तातूंत कांय दिसां आदीं गांवचे लोक आनी पुरयता मदी वाद जाल्ल्यान प्रकरण तापलां. तशेंच धारबांदोडें म्हालांतल्या एका देवळाच्या प्रस्ना वयल्यान नवो वाद सुरू जाला. ताका लागून मडकय वरीच धारबांदोडें म्हालांत फुडल्या कांय दिसांत तणाव निर्माण जावपाची शक्यताय गांवचे लोक उक्तायतात. हद्दपार केल्ल्या पुरयतान एके संस्थेंत केल्ली भानगड उक्ती करपाच्यो हालचाली गांवच्या लोकांनी सुरू केल्यात.

सरपंच, सचिवान केली दुरगाची पळोवणी

फोंडें: धारबांदोडें पंचायत कार्यालयांत कागाळ दाखल जाले उपरांत सरपंच बालाजी उर्फ विनायक गांवस हांणी सचिवा सयत देवळा कडल्या दुरगाची संयुक्त पळोवणी केली. ते संबंदांत पंचायत मंडळ बसकेंत निर्णय घेवन गट विकास अधिकाऱ्याक अहवाल दिसतले, अशें सरपंचान सांगलें. श्रीदेवी धारेश्वरी मंदीर ट्रस्टाचे अध्यक्ष नंदकुमार गांवकार हांकां दुरगा विशीं विचारलें तेन्ना तांणी सांगलें, पुर्वजा सावन देवळाचे भोंवतणी फातराचें दुरीग आशिल्लें. त्या दुरगाची दुरुस्ती करपाचो निर्णय सगळ्या लोकांनी घेतिल्लो. ग्रामदेवता म्हूण लोकांनी सदांच देवळाच्या वाठारांत भाविकांक आडखळ निर्माण जावची न्हय, हे खातीर निर्णय घेवनूच दुरीग बांदिल्लें.