भांगरभूंय | प्रतिनिधी
नवी दिल्ली, खबरां संस्था ः आतां पदवीधर विद्यार्थी उण्या-चड वेळात पदवीचो अभ्यास पुराय करूंक शकतात. युनिव्हर्सिटी ग्रँट्स कमिशनच्या (UGC) प्रमाण उच्च शिक्षण संस्था पदवी विद्यार्थ्यांक सामान्य 3 वा 4 वर्सांचो पदवी अभ्यासक्रम 2 वर्सां वा 5 वर्सांत पुराय करपाचो पर्याय दिवंक शकतात.
यूजीसीचे अध्यक्ष एम जगदीश कुमार हांणी दिल्ले म्हायती प्रमाण ह्या सप्तकांत जाल्ले बसकेंत यूजीसीन एक्सेलरेटेड डिग्री प्रोग्राम (ADP) आनी एक्स्टेंडेड डिग्री प्रोग्रामाच्या (EDP) एसओपी (SOP) मान्य केल्या. एसओपींत उल्लेख केल्ल्या नेमाचो मसुदो भौशीक मळार हाडटले आनी प्रतिसाद मागयतलें.
एडीपी आनी ईडीपींत प्रवेशाचो निर्णय संस्था थारायतली…
एसओपी प्रमाण शिक्षणीक संस्था एक समिती तयार करतली. ती पयल्या आनी दुसऱ्या सेमिस्टराच्या निमाणें विद्यार्थ्यांच्या अर्जांचेर आदारून तांच्या क्षमतांची मोलावणी करतली. हाचे उपरांत समिती थारायतली दर सेमिस्टरांत विद्यार्थ्यांक कितले क्रेडिट हाडचे पडटले. तशेंच विद्यार्थ्यांनी ईडीपी काय एडीपी वांटो घेवचो हेंय शिफारस करतलीं.
एसओपी प्रमाण, दुसऱ्या सेमिस्टराच्या निमाणें मेरेन एडीपी खातीर अर्ज करपाक मेळटा. एडीपींत सामील जावन फुडल्या सेमिस्टरांत विशय वाडटले आनी तांकां अतिरिक्त क्रेडिट मेळटले. ईडीपींतल्या पदवी कार्यावळींत दर सेमिस्टरांत उण्यांत उणें क्रेडिट मेळोवपाचो आंकडो समिती थारायतली. परिक्षा आनी मुल्यांकन पद्दत मानक पदवी कार्यावळी प्रमाणच उरतली तरी पदवी पुराय करपाक लागपी वेळ उणो-चड प्रमाणांत पदवीचेर बरयतले. पूण ही पदवी शिक्षणीक वा नोकरी भरती खातीर वापरतना प्रमाणीत पदवी म्हणूनय मान्यताय दितले.
मजगतीं, राष्ट्रीय शिक्षण धोरण-2020 खाला विद्यार्थ्यां खातीर पदवी मदीं विसव घेवपाचो पर्याय युजीसीन सुरू केला. विद्यार्थ्याक जाय जाल्यार तो अभ्यासक्रमांतल्यान विसव घेवन उपरांत परतून अभ्यासक्रम पुराय करूंक शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
