भांगरभूंय | प्रतिनिधी
पणजी : सबलेट केल्ल्या उत्तर गोंयच्या शॅक धनयांक नोटीसा जारी केले उपरांत आतां पर्यटन खात्या वतीन दक्षीण गोंयच्या शॅकांचीय तपासणी जातली. खास पंगडक कागदपत्रां तशेंच कर्मचार्यांची चवकशी करतलो. दुसर्यांक शॅक चलोवपाक दिल्यार (सबलेट) तांकांय नोटीसा जारी करतले.
पर्यटन संचालक केदार नायक हांणी ही म्हायती दिली. उत्तर गोंयच्या शॅक्सांची तपासणी पुराय जाल्या. उत्तरेच्या २५५ मदलीं १०८ शॅकां मूळ धनयांनी दुसर्यांक चलोवपाक दिल्ल्याचें स्पश्ट जालां. हातुंतल्या २५ शॅक धनयांक नोटीसो जारी केल्यात. तांणी लेखी जाप दिले उपरांत खात्या वतीन प्रत्यक्ष सुनावणी जातली. २६ ते २८ फेब्रुवारीक अशे तीन दीस ही सुनावणी जातली. पर्यटन खात्याचे पंगड आतां दक्षीण गोंयच्या शॅक्सांची तपासणी करतले. कोलवा, बेतूल, माजोर्डा, पाळोले, आगोंदा ह्या दर्यादेगांचेर चड शॅकां आसात. शॅक कोण चलयता हाची तपासणी करपा वांगडा हे नेमां विशींय तपासणी करतले. शॅकांतल्या कामगारांक वळखपत्रां दिवपाचोय विचार आसा.
हालीं शॅक कर्मचार्यां कडल्यान पर्यटकांक मारपेट तशेंच दादागिरी करपाच्या घडणुकांनी वाड जाल्या. हेच फाटभूंयेर सरकारान तपासणी करून शॅक धनयांचेर कारवाय करपाचें सत्र सुरू केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
