भांगरभूंय | प्रतिनिधी
हणजूणचे घडणुकेक वर्स जावचें आसा, आतां तळें- दुर्गाभाटांत (फोंडें) रस्ताद सुण्यांनी एके अडेज वर्सां पिरायेचे चलयेचो जीव घेतलो. काळजाक घाय घालपी घडणूक. हणजूण्यां पिटबूल सुण्याच्या हल्ल्यांत सात वर्सांच्या चल्याक मरण आयिल्लें. सरकारान आक्रमक आनी रस्ताद दोनूय सुण्यां बाबतींत बरेच उपाय, येवजण्यो जाहीर केल्ल्यो. पूण, त्यो सगल्योच चालीक लागूंक ना आसतल्यो. कारण रस्त्यांचेर सुणीं दिसपाचे प्रकार उणें जावंक नात. चोंब्यांनी हीं सुणीं भोंवतात वा बशिल्लीं आसतात. रातच्या वेळार प्रवास करप्यांक हें आमी सांगपाची गरज ना. सुण्यांक लागून दोन भुरग्यांचे बळी गेल्यात. देड हजारां वयर जखमी जाल्यात. निदान आतां तरी सरकारी यंत्रणांचें दोळे उक्ते जातले?
सकाळीं स वरांचेर दार उक्तें करतकच घरच्यांची नदर चुकोवन हें चली अचकीत रस्त्यार आयलें आनी सुण्यांनी ताचेर हल्लो केलो. उपचारां पयलींच ताका मरण आयलें. हाचे वयल्यान हल्ल्याचें स्वरुप लक्षांत येता. कसलीय घडणूक घडली काय चार दीस लोक चुरचुरतात, यंत्रणां कारवाय केल्ले सारकी करता आनी उपरांत सगलें आशिल्लें तशेंच चालू उरता. ल्हान भुरग्याक, तरणाट्यांक मरण येवप हें त्या कुटुंबा खातीर कितलें दुखदिणें आसता तें, असल्या अणभवांतल्यान गेल्ल्यांकूच खबर आसतलें. राज्याचें, देशाचेंय तें लुकसाण. सोशल मिडियाचेर चूक कोणाची ताचेर वाद- विवाद रंगतात. कांय जाण उपायूय सुचयतात. ते चालीक लागताच अशें ना. तातूंतले कांय समाजान स्वता करपाचे आसतात. पूण, करता कोण?
कंपावंडा भितर सुणीं सोडल्यांत, भितर वचूं नाकात, अशें हणजूण्यां सुण्यांच्या धनयान सांगिल्लें खंय. पूण थंय भितर वचपाची चूक जाली. हे चलयेक भायर वचपाक दिवंक जायनाशिल्लें, अशें कांय जाण म्हणटात. चूक ही चुकून घडटा. मुद्दाम कोण ती करिनात. असो प्रसंग येतलो अशें कोणाकूच दिसूंक नासतलें. पूण हे समस्येच्या मुळा कडेन गेल्यार रस्त्याद सुण्यांचो आंकडो वाडपाक दिला, ती व्हडली चूक हें जाणवले बगर रावना. थंय कोयर उडयताले, तें दुसरें कारण. आयज दरेका वाड्यार रस्ताद सुण्यांची समस्या आसा. रातच्या वेळार तांच्या भोंकपाचो त्रास जाता. झेम पडना. भलायकी इबाडटा. दुचाकी चलोवप्यांच्या आंगार सुणीं धांवतात. घांस मारल्यार, अपघात जाल्यार त्रास सोंसचे पडटात. ह्या सुण्यांचो बंदोबस्त करपाचें काम खरें म्हणल्यार स्वराज्य संस्थांचें. मात हाताच्या बोटांचेर मेजपा इतल्यो स्वराज्य संस्था सोडल्यार बाकीच्यां कडेन रस्ताद सुण्यांक दवरपाक जागो ना. तांकां खावंक घालूंक दुडू नात. सरकारी यंत्रणां म्हणटात, आमी निधी दितात!! सुण्यांक पेटे जावचे न्हय, म्हूण निर्बिजीकरण करतात. हें काम खाजगी संस्थांक दिलां. कारण तेच जीप घेवन सुणीं धरपाक येतात. एका गांवांत निर्बिजीकरण केलें काय येवपी काळांत थंय पेटे दिसपाक फावना. पूण ते दिसतात. सुण्यांचो आंकडोय उणो जायना. रस्ताद सुण्याक धरप हें तशें कठीण काम. म्हणटकच तांकां बेशुद्ध करून धरपाक मेळटा जाल्यार पळोवंक जाय. निर्बिजीकरण करपी, रॅबीज जावंक जायना म्हूण उपाय करपी संस्थांक फावोसो निधी वेळार मेळटा व्हय? काय फावटी मारच्यो पडटात? सगल्याक स्वराज संस्थांक सुणीं सांबाळप शक्य ना जाल्यार तालुक्यांत 4- 5 कडेन सुणीं, गोरवां खातीर लोकवस्ती पसून पयस जागे तयार करपाक मेळनात?
कोयराच्यो राशी दिसतात, ताका सरकार, स्वराज्य संस्था जापसालदार नात. हें सगलें लोकांक लागून घडटा. एकल्यान उडयलो काय दुसरो थंय कोयर उडयता. मागीर फळां, भाजी, चिकन, नुस्तेंकार, हाॅटेलां, स्टाॅल, गाडेकार…. सगलेच कोयर रकयतात. थंय कितें तरी खावपाक मेळटा म्हूण सुणीं, सुकणीं, सावदां येतात. स्वराज्य संस्था कोयर एकठांय करतात, तरीय म्हयन्याचे 50, 100 रुपया वाटावपाक थोडे लिपचोरयां रस्त्या कुशीक कोयर उडयतात. नागरिकांनी तयार केल्ली ही समस्या नागरिकां खातिरूच धोक्याची थारल्या, हें फोंडेंचे घडणुकेन सिद्ध जालें. रस्ताद सुण्यांक खाण घालप्यांचेर कांय जाण टिका करतना दिसतात. पूण जर तीं सुणीं उपाशी उरलीं जाल्यार आक्रमक जातलीं. लोकांच्या घरांनी घुसतलीं. सुण्यांक खाणां घालपाक लोकवस्ती पसून पयस, थारावीक जागे दवरीत जाल्यार? राज्यांत 56 हजारां वयर रस्ताद सुणीं आसात खंय!
फाटले जानेवारींत 1789 जाणांक सुणीं चाबल्यांत. म्हणल्यार दिसाक पन्नासा वयर घडणुको जाल्यो. दखल घेवपा सारकी गजाल. आक्रमक सुणे पोसपाचेर बंदी, आसात तांकां परवाने, तांची मेजणी जावपाची आशिल्ली. जाली ती?? कितल्यां जाणांनी आपल्या सुण्यांची नोंदणी केली? आतां तरी कामांक लागुया. सगल्यांत पयलीं सुण्यांचें निर्बिजीकरण, तांकां दवरपाक जागे, हें काम करप्यांक निधी, खाणां घालपाक थारावीक जागे…. पयलीं हें जाग्यार घालचें पडटलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
