भांगरभूंय | प्रतिनिधी
पणजी : गोंय लोकसेवा आयोगा सयत हेर लोकसेवा आयोगाचे परिक्षेंत आर्टिफिशियल इंटेलिजन्सचो (एआय) वापर जावपाचो आसा. हे विशीं विचार सुरू आसा. गोंय लोकसेवा आयोगाचे अध्यक्ष जुजे मॅनुएल नोरोन्हा हांणी सिक्कीमांत परिशदेंत उलयताना हो मुद्दो मांडलो.
गंगटोक- सिक्कीमचे राज्य लोकसेवा आयोगाचे स्थायी समितीची बसका जाली. सिक्कीमचे राज्यपाल लक्ष्मण प्रसाद आचार्य हांचे हस्तुकीं परिशदेचें उक्तावण जालें. सरकारी सेवेंत योग्य व्यक्ती येवची म्हूण आयोगाच्या कामाची राज्यपालांनी तोखणाय केली. दोन दीस जाल्ले परिशदेंत तरेकवार राज्यांतल्या लोकसेवा आयोगाचे अध्यक्ष हाजीर आशिल्ले. गोंय लोकसेवा आयोगाचे अध्यक्ष जुजे नोरोन्हा हे स्थायी समितीचे अध्यक्ष आसात.
लोकसेवा आयोगाच्यो परिक्षा तशेंच निवड प्रक्रिया पारदर्शक जावपाची गरज आसा. हाचे खातीर आर्टिफिशियल इंटेलिजन्साचो वापर जावपाची गरज आसा. आर्टिफिशियल इंटेलिजन्सची म्हायती दिवपा खातीर आयआयटी कानपूर संस्थेच्या प्रोफेसराक परिशदेक आपयला, अशें तांणी सांगलें.
एआयच्या वापरान परिक्षा तशेंच निवड प्रक्रिया आनीक पारदर्शी जावपाक मजत जातली. आसाम, नागालँड, उत्तर प्रदेश, हिमाचल प्रदेश, हरियाना, आंध्र प्रदेश, सिक्किम ह्या राज्यांतल्या लोकसेवा आयोगाचे अध्यक्ष परिशदेक हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
