भांगरभूंय | प्रतिनिधी
७५०० किलांची गाडी चालोवपाक बंदी ना: सर्वोच्च न्यायालय
नवी दिल्ली, खबरां संस्था: देशांत आतां गाडयेच्या ड्रायव्हिंग लायसन्साचेर (डीएल) हलकी येरादारी करपी वाहनांय चलोवपाक मेळटलीं. लायट मोटार व्हेइकल (एलएमव्ही) परवानो आशिल्ली ७५०० किला मेरेनची वेवसायीक गाडीय चलोवपाक शकतात, अशें सर्वोच्च न्यायालयान एका निर्णयांत म्हणलां.
सरन्यायाधीश धनंजय चंद्रचूड, न्या. हृषीकेश रॉय, न्या. पी. एस. नरसिम्हा, न्या. पंकज मित्तल आनी न्या. मनोज मिश्रा हांच्या घटनापीठान बुधवारा हे विशीं ७६ याचिकांचेर एकमतान निर्णय दिला. विमा कंपन्यो परवान्याच्या आधारार दावे न्हयकारपाक शकनात, अशेंय खंडपीठान म्हणलां.
निकाल वाचतना न्या. रॉय हांणी, कायद्याचो समाजीक परिणाम समजून घेवप म्हत्वाचें. अश्यो गाडयो चलोवन देशांतले कोट्यांनी लोक रोजगार मेळयतात. एलएमव्ही लायसन्स बाळगुपी ड्रायव्हर जड गाडयो चलयतात, देखून चड अपघात जातात, हें पुराव्यां सयत पटोवन दिवपाक कंपन्यो अपेशी थारल्यात.
परवानो दिवचे पयलीं चाचणी घेवप गरजेचें. ७५०० किला मेरेन वैयक्तीक वा वेवसायीक गाडये मदीं फरक करप योग्य थारचें ना, अशें न्यायालयान म्हणलां. विशेश परवान्याचो नेम ७५०० किलां परस चड वजनाच्या वेवसायीक गाडये खातीर आसपाक जाय. परवानो प्राधिकरणान गाडी चलोवपाचो परवानो दितना दरेक नेम पाळपाक जाय. परवानो दिवचे पयलीं चाचणी घेवप गरजेचें, अशेंय तांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
