भांगरभूंय | प्रतिनिधी
आदलें गोंय आनी आतांचें गोंय हातूंत खूब बदल जाला अशें आमचे जाणटे सांगतात. खरें म्हळ्यार सांगपाची गरजूच ना. बदल दिसताच. गोंयचो चारूय वटांनी जाल्लो बदल दिश्टी पडटा. गोंयकार म्हणटात तो सुसेगाद म्हण गोंयकाराची वळख. मात घडये त्या वेळार गोंयांत भायले लोक चड प्रमाणांत नाशिल्ले, आतां गोंयांत भायल्या राज्यांतले तशेंच देशा भायले लोक राबितो करून रावतात. गोंय बदल्लां खरें, आनी बदलपाकूय जाय. मात हालींच्या तेंपार गोंयांत गुन्यांवकारी घडणुको वाडपाक लागल्यात. चोरी, घरफोडी, लुटमार, खून, बलात्कार सारकिल्लीं प्रकरणां भायल्या राज्यांनी चल्ल्यांत म्हणपाच्यो बातम्यो लोक पेपरांनी वाचतालो. आतां खरें म्हळ्यार पेपर वाचपा इतलो वेळ कोणाच कडेन ना. जगभरांतल्यो बातम्यो आतां मोबायलाचेर वाचपाक सोड पळोवपाक लेगीत मेळटात. गोंयांत असलीं प्रकरणां चालूच आशिल्लीं. ड्रग्स, सोऱ्या पार्ट्यो आनी हेर प्रकरणांक लागून गोंयचें नांव संवसारीक मळार पेड्डेर जावंक लागलां. घडूंक नाशिल्लें आतां गोंयांत घडपाक लागलां. सुसेगाद
गोंयकारां मदीं बदल जावंक लागला. झगडीं, मारामारी, मारबडय ह्यो गजाली आतां गोंयांत नव्यो न्हय. जमीन प्रकरणां, शिंदकळी वेवसाय आनी पर्यटकांक मेळपी वायट वागणूक सोशल मिडियाचेर गोंयची बदनामी चल्ल्या.
तातूंतच भर म्हळ्यार काल सोमारा सकाळीं काॅलेजीक वचपी भुरग्याचेर कोणें तरी अॅसीड मारलें. हे घडणुकेन गोंय हाल्लें. गोंयांत तरी अशे तरेची घडणूक घडिल्ली म्हज्या उगडासांत ना. गोंयांत ही पयलींच घडणूक अशें म्हाका तरी दिसता. काॅलेजीक वचपाक बशीची वाट पळयत उबो राविल्ल्या विद्यार्थाचेर दुचाकी वयल्यान येवन अॅसीड मारलें म्हणपाची घडणूक आमी वाचताले. मात त्यो भायल्या राज्यांतल्यो. गोंयांत अशी घडणूक घडप म्हळ्यार लोकां मदीं एक तरेचो भंय निर्माण जाला. गोंय हें एक ल्हान राज्य आनी गोंयकार म्हणटात तो मनमिळावू. मात म्हज्या गोंयांत अशे तरेची घडणूक घडल्या हें कळटकच आंगार कांटो उबो रावलो. कितें चल्लां हें म्हज्या गोंयांत. चोरी- घरफोडी आनी खून जातालेच. आतां दिसा उजवाडा भर रस्त्यार कोण तरी कोणाचेर अॅसीड मारता ही गजाल बरी न्हय. खंय पावलां म्हजें गोंय. कांय लोक, जाणकार तशेंच कांय राजकी फुडारी आपल्या भाशणांनी उलयताले गोंय बिहार जावंक वेळ लागचो ना म्हूण. गोंयांत कायदो आनी सुवेवस्था सामकी इबाडल्या. कोणाक कोणाचोच भंय उरिल्लो ना. म्हजे गोंय वाट चुकलां काय गोंयकार चुकता हेंच कळना.
म्हजें गोंय बदलता, काळा वांगडा चलता मात बदलत्या काळा वांगडा गोंय इतलें बदलत गेलां की मनीसपण म्हणटात तें उरिल्लें ना. हांव हें कोणाचें मन दुखोवपा खातीर म्हणिना. मात म्हजो गोंयकार गोंयांत सुरक्षीत ना अशें म्हाका म्हणपाचें आसा. गोंयांत असो बदल कोणाकच नाका आशिल्लो. बऱ्या घडणुका परस पेपरांनी वायट घडणुको चड आसतात. आमच्या सपनांतलें गोंय अशें नाशिल्लें. गोंयकारपण म्हणटात ते लोक विसरल्यात आनी अशेंच चालू उरलें जाल्यार गोंयकाराचें अस्तित्व सोंपूंक वेळ लागचो ना.
गुन्यांवकाराक पुलीस धरतले, ख्यास्त दितले. मात म्हज्या गोंयाक कलंक लागलो. तो केन्नाच पुसून वचपाचो ना. जें जें घडपाक जायनाशिल्लें तें तें घडपाक लागलां. गोंय विनाशाचे वटेन वाटचाल करता म्हळ्यार अतिताय जावची ना. कशें आसलें आनी कितें जालें. शांत म्हजें गोंय भयानक जायत गेलें. आदीं खंय कितलेय रातचो मनीस गोंयांत भोंवूंक भियेनाशिल्लो. पूण आतां, आतांचें गोंय तशें ना. कोण केन्ना गळो कापीत कळचे पसून ना. बायलांच्या गळ्यांतलीं मंगळसुत्रां सुरक्षीत नात. केन्ना कोण हात मारीत पत्तो लागचोना, आनी आता अॅसीड हल्लो.
गोंय काबार बा गोंय काबार अशें म्हणपाची पाळी गोंयकाराचेर आयल्या, आनी म्हाका तर दिसता आतां खऱ्या गोंयकारांक भिवपाची गरज आसा.
सिमी शंबा गांवकार
9158544966
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
