भांगरभूंय | प्रतिनिधी
पणजी: कोयर वेवस्थापना विशीं अधिकारी, कंत्राटदार तशेंच हेर संबंदितांक ऑनलायन प्रशिक्षण दिवपाची वेवस्था गोंय कोयर वेवस्थापन म्हामंडळ करतलें. हे खातीर ऑनलायन ओपन कोर्सवेर (एमओओसी) तयार करतले. ई कोयर धोरण 2024क सरकारान मान्यताय दिल्या. मुख्यमंत्री डॉ. प्रमोद सावंत हांणी ही म्हायती दिली.
मुख्यमंत्री डॉ. प्रमोद सावंत हांच्या फुडारपणा खाला गोंय कोयर वेवस्थापन म्हामंडळाची बसका जाली. हे बसकेक कोयर वेवस्थापन मंत्री बाबूश मोंसेरात, पर्यावरण मंत्री अालेक्स सिक्वेरा आनी अधिकारी हाजीर आशिल्ले.
कोयर वेवस्थापना खातीर सुधारीत उपाय येवजण करपा सयत अद्ययावत यंत्रणेचो वापर करपाचो निर्णय बसकेंत जालो. ई कोयर धोरणांत ह्या गजालींचो आस्पाव आसा.
गॅस अॅथोरिटी ऑफ इंडिया लिमिटेड (गेल) च्या 150 टीपीडी कोयर प्रकल्पाक मंडळान मान्यताय दिली. कोयर प्रकल्पाक सुवात दिवपाक सरकारान मान्यताय दिली. ह्या प्रकल्पाक लागून कोयराची समस्या सुटपाक मजत जातली.
काकोडें आयडीसींत कोयर वेवस्थापन म्हामंडळाची 5 हजार चौखण मिटर सुवात गोंय हस्तकला आनी ल्हान उद्देग उदरगत म्हामंडळाच्या ताब्यात दिवपाचो निर्णय जालो. ह्या जाग्याचेर दोन शेडी आसा. एमआरएफ सुवीधा म्हूण हस्तकला म्हामंडळाक ह्या सुवातेचो वापर करप शक्य जातलें.
कावलातल्यो गाडयो आनी पत्र्याच्या कोयराच्या पावणेंतल्यान सरकाराक 38.56 लाखाची येणावळ आयल्या अशी म्हायती मुख्यमंत्री डॉ. प्रमोद सावंत हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
