भांगरभूंय | प्रतिनिधी
हुंवार पिडेस्तांक घरां बांदून दितलेः सभापती रमेश तवडकार
भांगरभूंय । प्रतिनिधी
पणजीः केरळांतल्या वायनाडांत हालींच आयिल्ल्या हुंवाराक लागून बेघर जाल्ल्यांक आपूण श्रमधाम येवजणे खाला घरां बांदून दिवपाचे आसात. सोमारा विधानसभेंत उलयतना सभापती रमेश तवडकार हांणी या कामांत गोंयकारांनी आपले पद्दतीन मजत करची अशें सांगलें.
कांय दिसां आदीं केरळांत व्हड पावस पडलो. वायनाडांतले तीन गांव व्हांवून गेले आनी आतां मेरेन 350 परस चड लोकांक मरण आयलां. एक मानवतावादी म्हूण आमी 200 कामगारांक घेवन वायनाडांतल्या असमानी संकश्टांत ज्या कुटुंबांचीं घरां व्हांवून गेल्यात तांकां श्रमधाम येवजणे खाला घरां बांदपाचो संकल्प केला. ह्या कामांत गोंयकारांनी आपले पद्दतीन सहकार दिवचो. तशेंच गोंय सरकारान वायनाडांतल्या संकश्टांतल्या कुटुंबांक मजत करची अशें आवाहन केलें. मजगतीं, मुख्यमंत्री डॉ. प्रमोद सावंत हांणी सांगलें, राज्याच्या मुखेल सचिवांनी वायनाडच्या जिल्लोधिकाऱ्या कडेन संपर्क सादला. वायनाडांतल्या हुंवारान त्रास जाल्ल्या कुटुंबांक बेगोबेग गरजेची सामग्री धाडपाचो निर्णय राज्य सरकारान घेतला. हे विशीं मुखेल सचीव नदर दवरतात अशीय म्हायती तांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
