भांगरभूंय | प्रतिनिधी
पणजी: गोंयच्या लायटीच्या खांब्यांचेर लोंबकळपी आनी धोको निर्माण करपी केबल्सांक लागून जाल्ले अपघात आनी लुकसाण खातीर आतां केबल ऑपरेटरूच पुरायेन जापसालदार आशिल्ल्याचें काशीनाथ शेट्ये हांणी सांगलें. तशेंच, आतां एका खांब्यार आतां तिनूच केबल्स घालपाची परवानगी आसतली. ह्या प्रकरणांत फुडली सुनावणी सोमारा दवरल्या.
ह्या विशयाचेर जाल्ले सुनावणे मजगतीं उच्च न्यायालयान सगले केबल ऑपरेटर्सांक तांणी उडयिल्ल्या केबलांक लागून अपघात जाल्यार वा खांब्यांचें लुकसाण जाल्यार, हाची पुराय जापसालदारकी आनी दायित्व घेवपाची लेखी हमी दिवपाचे आदेश दिले, अशी म्हायती ह्या
प्रकरणाची फाटपुरवण करपी वीज खात्याचे कार्यकारी अभियंते काशीनाथ शेट्ये हांणी दिली.
सांताक्रुझांत वीज खात्याची धडक मोहीम
मजगतीं, गोंयच्या वीज खात्यान कार्यकारी अभियंते काशीनाथ शेट्ये हांच्या नेतृत्वा खाला सांताक्रुझ वाठारांत व्हड कारवाय करीत वीज खांब्यार अनधिकृतपणान लोंबकळपी इंटरनेट आनी केबल सेवा पुरवणदारांचे केबल्स कापपाची मोहीम खर केल्या.
हे कारवायेक कारण थारले ते म्हळ्यार, फाटल्या बुधवारा हांगाच एका वीज खांब्यार लोंबकळपी केबलांक लागून जाल्लो अपघात. ह्या अपघाता उपरांत वीज खात्यान बेगोबेग खर पावल उबारलें. फाटले वर्सभर वीज खातें सेवा पुरवण करप्यांक धोको निर्माण करपी केबल्स काडपा खातीर फाटपुरवण करताले. मात, सेवा पुरवणदारांनी सहकार्य करूंक नाशिल्ल्यान निमाणें वीज खात्यानूच आतां केबल्स कापपाचें काम हातांत घेतलें, अशें शेट्यें हांणी सांगलें.
वीज खात्याच्या खांब्याचो वापर करपा खातीर पुर्वपरवानगी आनी शुल्क भरप गरजेचें. मात, हे नेम मोडिल्ल्याचें खात्यान नमूद केलें. विवीध सेवा पुरवणदारां कडेन आशिल्ली दिर्घकाळाची थकीत थकबाकी वसूल करप आनी नागरिकांची सुरक्षा सुनिश्चीत करप, हो हे कारवायेचो मुखेल उद्देश. ‘राईट-ऑफ-वे’ शुल्का वेल्यान सेवा पुरवठादार आनी वीज खात्यांत फाटल्या कितल्याशाच वर्सां सावन संघर्श सुरू आसा.
थकीत भाडें, नागरिकांच्या सुरक्षेक धोको आनी नेम मोडिल्ल्याचो थपको दवरून, खात्यान ही कार्यवाही सुरू केल्ल्यान ती मुखारूय चालूच उरतली, अशें कार्यकारी अभियंते शेट्ये हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
