आतां कावड मार्गावेल्या दुकानदारांक दुकानाचेर स्वताचें नांव बरोवंचें पडटलें
भांगरभूंय | प्रतिनिधी
कावड यात्रेची पवित्रताय राखपा खातीर निर्णय घेतिल्ल्याचें सरकाराचें म्हणणें
उत्तर प्रदेश, खबरां संस्था: उत्तर प्रदेशांतल्या कावड मार्गावेल्या दुकानदारांक आपल्या दुकानाचेर, हातगाडयेचेर स्वताचें नांव बरोवचें पडटलें. मुख्यमंत्री योगी हांणी आयज हे आदेश दिले.
कावड यात्रेची पवित्रताय राखपा खातीर हो निर्णय घेतिल्ल्याचें सरकाराचें म्हणणें आसा. युपींत २२ जुलय सावन कावड यात्रा सुरू जाता. दर वर्सा लाखांनी कावडिया उदक घेवन हरिद्वाराक वतात.
युपींतल्या मुझफ्फरनगर पुलिसांनी सुरवातेक दुकानदारांक दुकानांच्या भायर तांचीं नांवां बरोवपाचे आदेश दिले. ताका लागून कावड प्रवाशां मदीं संभ्रम निर्माण जावचो ना, असो पुलिसांचो युक्तिवाद आशिल्लो. म्हळ्यार हाचे वेल्यान दुकानदाराचो धर्म कळटलो. पुलिसांच्या आदेशाचेर देशभरांत प्रतिक्रिया आयल्यो. सपा मुखेली अखिलेश यादव हांणी पुलिसांच्या ह्या निर्णयाक समाजीक गुन्यांव थारायलो. एआयएमआयएमचे मुखेली असदुद्दीन ओवैसी हांणी, हो निर्णय हुकूमशाय निर्णय आशिल्ल्याचें म्हणलें. तशेंच गीतकार जावेद अख्तर हांणी ह्या निर्णयाची तुळा जर्मनीच्या नाझी राजवटी कडेन केली.
मुझफ्फरनगर पुलिसांच्या ह्या आदेशा उपरांत शारांतल्या खुबश्या दुकानदारांनी आपापल्या दुकानां भायर आपलीं नांवां बरोवन दवरिल्लीं. आतां युपी सरकारानूय मुझफ्फरनगर पुलिसांच्या आदेशाक मंजुरी दिल्या.
बाघरा हांगच्या योग साधना केंद्राचे संस्थापक स्वामी यशवीर आश्रम महाराज हांणी कावड मार्गार पडपी मुसलमान हॉटेलचालकांनी नावां बरयना जाल्यार खर आंदोलनाची शिटकावणी दिल्ली. हिंदू देवीदेवतांच्या नांवाचेर मुस्लिमांनी हॉटेलां उगडिल्ल्याचो आरोप तांणी केला. ताका लागून भावीक आबूज जातात. पुलीस तपासांत अशीं ८ हॉटेलां दिसलीं, जीं मुस्लिमांची आशिल्लीं. पूण हॉटेलांक हिंदू देवी- देवतांची नांवां आशिल्लीं अशें तांणी सांगलें.
शांतीकाय इबाडटली
असल्या आदेशांक लागून शांतिकायेचें वातावरण इबाडटा, अशी प्रतिक्रिया अखिलेश यादव हांणी दिली. न्यायालयानूच हे विशीं कारवाय करची. असल्या आदेशांची चवकशी करची. अशे आदेश हे समाजीक गुन्यांव जावन आसात. जे एकवट आनी समाजांतले शांतिकायेचें वातावरण इबाडपाचो यत्न करता.
जर्मनींत ताचें नांव ज्युडेनबॉयकॉट आशिल्लें- ओवैसी
आतां दरेक खावपाचें दुकान वा गाड्याच्या धनयाक आपलें नांव बोर्डार लावचें पडटलें. जाका लागून खंयच्याच कावडियान चुकून लेगीत एकाद्या मुसलमानाच्या दुकाना वेल्यान कांयच विकतें घेवचें न्हय. हाका अस्तंत आफ्रिकेंत अपाथरेड म्हणटात आनी हिटलराचे जर्मनींत हाचें नांव जुडेनबॉयकॉट आशिल्लें.
नाझींनी हें जर्मनींत केलें : जावेद अख्तर
मुजफ्फरनगर पुलिसांनी आदेश दिल्यात, कावड यात्रेच्या मार्गाार सगळे दुकानदार, रेस्टोरंट संचालक, वाहनांच्या धनयांनी आपलें नाम स्पश्ट बरोवचें म्हणून. कित्याक? नाझी जर्मनींत फकत विशेष दुकानांचेर आनी घरांचेर चिन्नां करतालें.
हो मुस्लिमांचेर अर्थीक बहिश्कार: पवन खेरा
हें पावल मुसलमानांचो अर्थीक बहिश्कार करपाक उबारलां. जे लोक हें थारोवपा खातीर इत्सूक आशिल्ले, कोणी कितें खावचें तें. आतां ते हेंय थारायतले, कोणाक कडल्यान कोणें कितें विकत घेवचें? जेन्ना ह्या गजालींचो विरोध केलो तेन्ना म्हणटात, जेन्ना ढाब्यांच्या बोर्डार हलाल बरयतात तेन्ना तुमी विरोध करिनात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
