भांगरभूंय | प्रतिनिधी
इस्रायल हो पयलीं सावन आक्रमक देश. अरब राष्ट्रांच्या मदीं आशिल्ल्यान स्थापने सावन तांकां संघर्श, झुजाक तोंड दित येवचें पडटा. 14 मे 1948 दिसा इस्रायलाची स्थापना जाली. पॅलेस्टायनांतलें ब्रिटीश राज सोंपतकच इस्रायलान ही घोशणा केली. अमेरिकेन तांकां रोखडोच तेंको दिलो. सुरवातेक ब्रिटनान विरोध केलो. कारण तांकां अरब देशां वांगडचे संबंद इबाडपाचे नाशिल्ले. अरबी राष्ट्रांनी इस्रायलाचेर घुरी घाली. मात, अमेरिकेच्या तेंक्यार इस्रायलान जैत जोडलें. उपरांतूय साबार झुजां जालीं, तीं इस्रायलान जमनी सयत जिखलीं. एका काळार एैसपैस पातळिल्लो पॅलेस्टायन देश आयज इस्रायलाचे तुळेन आंवळून- आंवळून ल्हान जायत आसा. ताका देश म्हूण बऱ्याच देशांनी मान्यतायूय दिवंक ना. इस्रायलान फक्त झुजून जमीन मेळोवंक ना, तर ताचे पयलीं 1930 त बिगर पॅलेस्टिनी भाटकारां कडल्यान 52.6%, पॅलेस्टिनी भाटकारां कडल्यान 24.6%, सरकार, चर्च, विदेशी कंपनीं कडल्यान 13.4% जमीन घेतल्या. शेतकारांनीय तांकां जमीन विकल्या. पोरूं 7 आॅक्टोबराक हमासान इस्रायलाचेर हल्लो करपाची चूक केली आनी ताचें पानवळ लाखांनी पॅलेस्टिनी आनी इस्रायली नागरिकांक भोगचें पडलें. अजून हो संघर्श सोंपूंक ना. हेजबोला हमासाक, पॅलिस्टिनींक भितरल्यान मजत करता, हेजबोला (ही लेबनानची आतंकवादी संघटना) आमचेर हल्लो करपाक सोदता, अशे आरोप करून इस्रायलान पयर लेबनानचेर हवाई हल्लो केला. हेजबोलानूय इस्रायलाच्या लश्करी तळाचेर हल्लो केला. हाचे पयलींय हेजबोलान इस्रायलाचेर क्षेपणास्त्रां सोडिल्लीं. इस्रायलानूय ताका जाप दिल्ली. हातूंत कांय लोकांक मरण आयिल्लें. पयरचे हे नवे घडणुकेक लागून झुजाक तोंड फुटूं येता, अशें जाणकारांक दिसता. मात, पॅलेस्टायन आनी लेबनान, तशेंच हमास आनी हेजबोला हांचे मदीं व्हडलो फरक आसा. इस्रायलाक हाची जाणीव आसा, देखून तें झुजाच्या मार्गान वच्चें ना, अशें थोड्यांक दिसता. पूण एकल्याची चूक, आबूजपणा, शाणपणा कितेंय घडोवपाक शकता, हें आमी विसरूंक फावना.
पॅलेस्टायनाक देश म्हूण तशी संवसारांत मान्यताय ना. हाचे उरफाटें लेबनानचें. ताका देश म्हूण सगल्या देशांची मान्यताय आसा. इस्रायल बेधडक पॅलेस्टायनांत घुसपाक शकता. हे खेपे हमासान तांकां ‘आ बैल मुझे मार’ अशें आमंत्रणूच दिलें ती गजाल वेगळी. हमासाक भितरल्यान अरब देशांचो तेंको आसा. हेजबोलाकूय आसा. पूण ही संघटना हल्लो करपाचे बाबतींत हमासा परस खूब धुर्त, बळिश्ट आसा. चार न्हय, धा पावलां मुखारुच आसा म्हणल्यार जाता. तातूंत अरबां सयत हेर बरेच देश लेबनानान फाटल्यान आसात. म्हणटकच हो संघर्श दोनूय देशांक, संवसाराकूय दिसता तितलो सोंपो न्हय. इस्रायल वा हेजबोलान सतत दोन दीस पसून एकामेकांचेर हल्ले केले जाल्यारुय ताका झुजाचें रुप येवं येता. इस्रायल आनी इराणाचें वांकडें आसा. इराण आनी अमेरिके मदल्यानूय उजो वचना. इस्रायल आनी इराणान हालींच्या कांय म्हयन्यांनी एकमेकांची कळ काडल्याच. इराणाचो हेजबोलाक उक्तेपणी तेंको आसा. तांकां शस्त्रांची पुरवणूय इराणूच करता. म्हणटकच इस्रायलाक इराणा कडेनूय दोन हात करचे पडटले. फकत किट उसळपाची वाट दोगूय पळयतात. जाणकारांच्या मतान, इस्रायलान पॅलेस्टायनाचेर लक्ष्य आनी लक्ष केंद्रींत केलां तें दुसरे कडेन वळोवपाक हेजबोला हल्लो करता. घडये हातूंत तथ्यूय आसत. इस्रायल हमास आनी हेजबोला आड एकाच वेळार लढपा इतलो सक्षम आसा. दोगांयकूय तो हारोवपाक शकता. मात, त्रासांत पडटले तें थळावे निश्पाप लोक आनी संवसारांतले देश, जे अरबी देशांचेर इंधना खातीर अवलंबून आसात!! सुको मेवोय हांगाच्यान येता. सगल्या देशांची निर्गत ह्या देशांनी जाता. पॅलेस्टायन, लेबनानाच्या कट्टर विरोधांत आशिल्ल्या देशांनी पसून हें झूज जावचें न्हय, म्हूण पावलां उडोवंक फावो. कारण, आदलीं झुजां आनी आतांची, हातूंत व्हडलो फरक आसा. विज्ञानाची म्हायती आशिल्ल्या लोकांक हें सांगपाक नाका!
जो आमचे शेपडेर पांय दिता ताका आमी बुद्द शिकयतातूच. पयलीं सावन आमी हें तत्व पाळीत आयल्यात, अशी प्रतिक्रिया इस्रायलाचे प्रधानमंत्री नेतान्याहू हांणी हेजबोला आनी इस्रायल हवाई हल्ल्याचेर दिल्या. इस्रायल सरकारान सध्या आणिबाणीची परिस्थिती जाहीर केल्या. सगल्यांक सादूर रावपाक सांगलां. लेबनानचे शिमे वयल्या गांवांतल्या इस्रायलींक दुसरे कडेन हालयल्यात. फुडल्या दोन दिसांनी वातावरण शांत जालें जाल्यार झुजाचीं कुपां हवेंत विरघळून वतलीं…. पूण फकत कांय दिसां खातीर. कारण त्या रेंवटांत कोण केन्ना कोणाची कळ काडीत ताची कल्पना तांकां पसून ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
