भांगरभूंय | प्रतिनिधी
भांगरभूंय । प्रतिनिधी
पणजीः गोंयांतल्या निकृश्ट रस्त्यां संबंदांत 27 कंत्राटदारांक कारणां दाखयात नोटिसो जारी केले उपरांत 30 अभियंत्यांचेर कारणा दाखयातची कारवाय केल्या. हे मुखार कंत्राटदार दोशी आसल्यार अभियंते आनी अभियंते दोशी आसल्यार कंत्राटदारांचेर कारवाय जातली, अशी शिटकावणी मुख्यमंत्री डॉ. प्रमोद सावंत हांणी शुक्रारा दिली. भौशीक बांदकाम खातें (पीडब्ल्यूडी), उदकास्रोत आनी वीज खात्याच्या मुखेल अधिकाऱ्यां वांगडा रस्त्यां विशीं घेतिल्ले बसके उपरांत ते पत्रकारां कडेन उलयताले.
गोंयांतल्या पेड्डेर जाल्ल्या रस्त्यां संबंदांत हे आदीं संबंदीत रस्ते तयार केल्ल्या 27 कंत्राटदारांक कारणां दाखयात नोटिसो जारी केल्लो. ते उपरांत आतां संबंदीत रस्त्यां खातीर दोसी आशिल्ल्या 30 अभियंत्यांक लेगीत कारणां दाखयात नोटिसो जारी केल्यात.
कंत्राटदारांक करारा वेळार रस्त्याची जापसालदारकी घेवचे खातीर (डिफेक्ट लायबिलिटी पिरियड) निश्चीत काळ दिल्लो. ते प्रमाण कारणा दाखयात नोटिसो जारी करून कंत्राटदारांक स्वताच्या खर्चान तांणी बांदिल्ले आनी पावसान व्हांवून गेल्ले वा पेड्डेर जाल्ले रस्ते नव्यान बंदून दिवपाचे आदेश जारी केल्यात. ते भायर डिफेक्ट लायबिलिटी पिरियडांत नाशिल्ले 120 किलोमिटर लांबायेचे जे रस्ते पेड्डेर जाल्यात, ते रस्ते बांदिल्ल्या कंत्राटदारांक ते संबंदांत लेगीत कारणा दाखयात नोटीस जारी केल्या. जे मेरेन ते कंत्राटदार हे रस्ते नव्यान बांदून दिनात, ते मेरेन तांकां हेर खंयच्याच रस्त्याचें कंत्राट दिवचें न्हय, असो निर्णय सरकारान घेतला, अशेंय मुख्यमंत्री डॉ. सावंत हांणी सांगलें.
मजगतीं, कांय वर्सांच्यान गोंयांतल्या रस्त्याची दर पावसाळ्यांत आवतिकाय जाता. अंदूं गोंयांत गोंय मुक्ती उपरांतच्या विक्रमी पावसाची नोंद जाल्या. जून आनी जुलयांत नेमान उटंगाराचो पावस पडलो. ताका लागुन पावसाळ्याच्या फक्त म्हयन्याभरांतूच रस्ते पावसाच्या उदका वांगडा व्हांवून गेले. तशेंच खूबश्या रस्त्यांचेर फोंडकुलां पडून रस्त्याची चाळण जाली. ते खातीर लोकांनी सरकारा आड तिडक उक्तावपाक सुरवात केली. ताका लागून तिडकल्ले मुख्यमंत्री डॉ. प्रमोद सावंत हांणी पीडब्ल्यूडीच्या अभियंत्यांची बसका घेवन तांकां धारेर धरिल्ले. त्याच दिसा 27 कंत्राटदारांक कारणा दाखयात नोटीस जारी केल्ली.
पगारवाड, बडट्यो आडायतलेः मुख्यमंत्री
ज्या 30 अभियंत्यांचेर कारवाय केल्या, तांची दक्षता खात्या वतीन चवकशी करतले. अश्या अभियंत्यांची पगारवाड आनी बडट्यो लेगीत आडायतले. तशेंच पीडब्ल्यूडीच्या रस्तो विभागांत पांच वर्स् परस अदीक काळ सेवा दिल्ल्या अभियंत्यांच्यो हेर विभागांनी बदल्यो करतले, अशें मुख्यमंत्री डॉ. प्रमोद सावंत हांणी स्पश्ट केलें.
‘आदल्या पीडब्ल्यूडी मंत्र्याक लागून रस्त्यांची आवतिकाय’
पीडब्ल्यूडी मंत्री आसतना आपणे उदरगत केल्ल्याचो दावो करपी आदल्या पीडब्ल्यूडी मंत्र्यान फाटल्या 20 वर्सांत ह्या खात्याक मातूय न्याय दिवंक ना. तेच खातीर गोंयांतल्या रस्त्यांची आवतिकाय जाल्या. पीडब्ल्यूडी खातें आपणे स्वता कडेन दवरले उपरांत फाटल्या वर्सभराच्यान ह्या खात्याचो आपणे नियाळ घेता. तातूंतल्यान हेंच दिसलें. ते खातीर फुडलीं 20 वर्सां रस्ते तिगचे, हे खातीर कंत्राटदार, अभियंत्यां संबंदांत खर भुमिका घेतल्या. फुडल्या नोव्हेंबर मेरेन गोंयांतले सगळे रस्ते येरादारी खातीर योग्य करतले, अशें मुख्यमंत्री डॉ. प्रमोद सावंत हांणी सांगलें.
‘जीआयएस’ सुविधा चालीक
गोंयांतल्या रस्त्यांचो दर्जो सांबाळपा खातीर जीआयएस सुविधा चालीक लायल्या. पीडब्ल्यूडी, उदका स्रोत, वीज हांच्या सयत हेर खात्यांक लेगीत हे सुविधे कडेन जोडल्यात. कंत्राटदार, तांणी केल्ले रस्ते, डिफेक्ट लायबिलिटीचो काळ हांचो हिशेब तशेंच खंयच्या कंत्राटदारान कितले लांबायेचो रस्तो केन्ना केल्लो, हाची म्हायती सरकाराक मेळपाक मजत मेळटली, अशें मुख्यमंत्री डॉ. सावंत हांमी स्पश्ट केलें.
रस्ते खणप्यांक लाखांचो दंड
हे मुखार गोंयांतलो एकूय रस्तो डिफेक्ट लायबिलिटीच्या काळांत पेड्डेर जावचो न्हय, हाची जतनाय घेतले.
उदका स्रोत, वीज हीं खातीं वा थळाव्यांक एकाद्या कामा खातीर रस्तो खणपाचो आसा जाल्यार तांकां एका म्हयन्या पयलीं नोटीस दिवन खणचो पडटलो. ना जाल्यार तांकां कामा खातीर डिफेक्ट लायबिलिटीचो काळ सोंपा मेरेन रावचें पडटलें. हे नेम मोडल्यार संबंदितां कडल्यान लाकांनी दंड वसूल करतले. रस्तो बांदले उपरांत डिफेक्ट लायबिलिटीच्या काळांत ताचेर देखरेख दवरप तशेंच रस्तो पेड्डेर जाल्यार स्वताच्या खर्चान तो दुरुस्त करून दिवपाची जापसालदारकी संबंदीत कंत्राटदाराचेर आसतली, अशें मुख्यंमत्री डॉ. प्रमोद सावंत हांणी स्पश्ट केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
