भांगरभूंय | प्रतिनिधी
जम्मू कश्मीरांतल्या पहलगामांत आतंकवाद्यांनी केल्ल्या भिजूड हल्ल्यांत 28 भारतीय पर्यटकांक मरण आयलें. ह्या हल्ल्यान भारतांतूच न्हय जाल्यार संवसारभर खवदळ पडलो. ह्या हल्ल्याची जसो भारतांत निशेध जायत आसा तसोच निशेध संवसारभर जायत आसा. पुराय संवसार ह्या भिजूड हल्ल्यान खवदळून गेला. संवसाराक हालोवन सोडपी ह्या घडणुकेचे खर पडसाद उमठल्यात. भारतान आतंकवाद्यांची कोंयडी करपा खातीर खर पावलां उबारल्यांत. इतलेंच न्हय जाल्यार ह्या हल्ल्याक खरपणान जाप दिवपाची तयारी लेगीत भारतान सुरू केल्या. जर भारतान ह्या हल्ल्याक जशाक तशी जाप दिली आनी आतंकवाद्यांचे अड्डे आशिल्ल्या पाकिस्तानान बळकायिल्ल्या कश्मीरांत सैन्य घुसयलें वा सर्जिकल स्ट्रायक केलो जाल्यार संवसार भारता वटेन उबो रावतलो? भारताचे कारवायेक संवसाराचो तेंको मेळटलो? असो प्रस्न विचारतात.
जर भारतान आतंकवाद्या आड कारवाय केली जाल्यार भारताक संवसाराचो तेंको निश्चीतपणान मेळटलो. कारण आतंकादान फक्त भारतूच न्हय जाल्यार सगलो संवसार खवदळून गेला. फक्त भारतूच न्हय संवसारांतले सगले मुखेल देश आतंकवादाक लागून त्रस्थ जाल्यात. सगल्या मुखेल देशांनी आतंकवाद्यांनी केन्ना केन्ना हल्लो केलाच.
फाटल्याच वर्सा रशियाच्या मॉस्को शारांत आतंकवाद्यांनी मोटो हल्लो घडोवन हाडिल्लो. रशियाचे वेंचणुकेंत पुतीन हांचें एकतर्फी जैत जाल्ल्याच्या कांय वरां भितरूच रशियाची राजधानी आशिल्ल्या मॉस्को शारांत मोटो आतंकवादी हल्लो जाल्लो. ह्या हल्ल्यांत रशियेंतल्या 133 निरपराध नागरिकांक आपलो जीव व्हगडावचो पडिल्लो. ह्या हल्ल्यांत हजारांनी नागरीक जखमी जाल्ले. इसीस ह्या आतंकवादी संघटणेन ह्या हल्ल्याची जापसालदारकी स्विकारिल्ली. पुतीन हांणी पांचवे फावटी जैत मेळयतकच आतंकवाद्यांनी तांकां ही भेट दिल्ली. रशियांत जाल्ल्या ह्या भिरांकूळ हल्ल्यान पुराय संवसारांत हुस्क्याचें वातावरण निर्माण जाल्लें. कारण इसीसच्या आतंकवाद्यांनी थेट मॉस्को शारांत घुसून हो हल्लो केल्लो. रशियेचे बळिश्ट सुरक्षेचो भेद करून आतंकवाद्यांनी हो हल्लो केल्ल्यान रशियेच्या सुरक्षा वेवस्थेचेर प्रस्न निर्माण जाल्ले. जाल्यार रशिया सारक्या पोलादी सुरक्षा वेवस्था आशिल्ल्या देशांत इतलो मोटो आतंकवादी हल्लो जावंक शकता जाल्यार संवसारांतल्या खंयच्याय देशांत घुसून आतंकवादी हल्लो करूंक शकतात अशीच चर्चा संवसारभर सुरू जाल्ली आनी ताची प्रचिती फक्त वर्सभरांत आयली.
पाकिस्तानान पुरस्कृत केल्ल्या आतंकवाद्यांनी भारतीय शिमेंत घुसून भारतीय पर्यटकांक जिवेशी मारले. वर्सभराच्या अंतरान संवसारांतले मुखेल देश आशिल्ल्या ह्या दोनूय देशांनी जाल्ल्या ह्या आतंकवादी हल्ल्यांनी संवसारभर भिरांतीचें वातावरण निर्माण जालां. संवसारांत आतंकवाद्यांनी परतून तकली वयर काडल्या हेंच ह्या हल्ल्यान सिद्ध जायत आसा. अर्थांत आतंकवाद्यांनी आतांच हल्ले सुरू केल्यात अशें न्हय. हाचे पयलींय आतंकवाद्यांनी खूबशा देशांनी आतंकवादी हल्ले केल्यात. भारत जाल्यार सदांच आतंकवाद्यांच्या हीट लिस्टार उरला. आतंकवादाचो सगल्यांत चड फटको भारताक बसला. आतंकवादाक लागून भारतान दोन प्रधानमंत्री व्हगडायले. भारताचेर जाल्लो 26/11 चो आतंकवादी हल्लो जाल्यार पुराय संवसारान पळयला. भारताक जेन्ना जेन्ना आतंकवादाचो फटको बसला तेन्ना तेन्ना पुराय संवसारान एकठांय येवन आतंकवादा आड झुजूंक जाय अशें आव्हान भारतान संवसाराक केल्लें. पूण संवसारान ताका प्रतिसाद दिलो ना. ताका लागून आतंकवाद्यांचें बळ वाडत गेलें.
आतंकवाद्यांनी फक्त भारताकूच न्हय जाल्यार अमेरिके सारक्या महासत्तेक लेगीत धपको दिला. भारत, रशिया, अमेरिका, फ्रान्स, जर्मनी, स्पेन, इस्रायल, जपान, दक्षीण कोरिया, ऑस्ट्रेलिया इतलेंच न्हय जाल्यार पाकिस्तानाक लेगीत आतंकवादाचो फटको बसला. मदेकांत कांय काळांत शांत आशिल्ले आतंकवादी आतां परतून एकदां सक्रीय जाल्यात. आतंकवादी सगल्याच देशांनी आतंकवादी कारवायो करीत आसात. ताका लागून आतंकवाद ही आतां एका देशाची समस्या उरिल्ली नासून ती वैश्वीक समस्या जाल्या.
आतंकवादा पसून खंयचोच देश अलिप्त रावंक शकना. ताका लागून हाचे आड सगल्या देशांनी एकठांय येवन झुजूंक जाय. भारतान आतंकवादा आड कारवाय करीत जाल्यार पुराय संवसारान भारताक तेंको दिवंक जाय. आतंकवादा आडचे भारताचे मोहिमेक संवसारान तेंको दिवचो. आतंकवादा आड पुराय संवसारान एकठांय येवंक जाय. जो मेरेन आतंकवादा आड पुराय संवसार एकठांय येना तो मेरेन आतंकवादाचो हो भस्मासूर आडावप कठीण आसा. आतंकवादी म्हणल्यार मानवतेचो दुस्मान. ह्या दुस्माना आड झुजपा खातीर सगल्या देशांनी एकठांय येवप हीच काळाची गरज आसा.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
