भांगरभूंय | प्रतिनिधी
फाटल्या सप्तकांत संवसाराक धपको दिवपी दोन व्हड घडणुको घडल्यो. ह्यो दोनूय घडणुको म्हणल्यार रशिया आनी पाकिस्तानांत जाल्लो आतंकवादी हल्लो. रशियाचे वेंचणुकेंत वालदिमीर पुतीन हांचें एकतर्फी जैत जाल्ल्याच्या कांय वरां भितरूच रशियाची राजधानी आशिल्ल्या मॉस्को शारांत मोटो आतंकवादी हल्लो जालो. ह्या हल्ल्यांत रशियाच्या 133 निरपराध लोकांक आपलो जीव व्हगडावचो पडलो. ह्या हल्ल्यांत हजारांनी लोक जखमी जाले. इसीस ह्या आतंकवादी संघटणेन ह्या हल्ल्याची जापसालदारकी स्विकारल्या.
पुतीन हांणी पांचवे फावटी जैत मेळयतकच आतंकवाद्यांनी तांकां ही भेट दिली. रशियांत जाल्ल्या ह्या भिरांकूळ हल्ल्यान पुराय संवसारांत हुस्क्याचें वातावरण निर्माण जालां. कारण इसीसच्या आतंकवाद्यांनी थेट मॉस्को शारांत घुसून हो हल्लो केलो. रशियाच्या घटमूट सुरक्षेक भेदून आतंकवाद्यांनी हो हल्लो केल्ल्यान रशियाचे सुरक्षा वेवस्थेचेरूच प्रस्नचिन्न निर्माण जालां. जर रशिया सारक्या अभेद्य सुरक्षा वेवस्था आशिल्ल्या देशांत इतलो मोटो आतंकवादी हल्लो जावंक शकता जाल्यार संवसारांतल्या खंयच्याय देशांत घुसून आतंकवादी हल्लो करूंक शकतात अशीच चर्चा संवसारभर जावंक लागल्या, आनी ताची प्रचिती अवघ्या कांय दिसां भितर आयली. पाकिस्तानाच्या बलुचिस्तान प्रांतात पाकिस्तानाच्या नावीक तळार आतंकवाद्यांनी हल्लो केलो.
बलुचिस्तान फाटोफाट खैबर पखतूनच्या प्रांतात एका प्रकल्पाचेर लेगीत आतंकवाद्यांनी हल्लो केलो. ह्या हल्ल्या थंय कार्यरत आशिल्ले पांच चीनी अभियंत्यांक मरण आयलें. ह्या दोनूय देशांत जाल्ल्या आतंकवादी हल्ल्यान संवसारभर भिरांतीचें वातावरण निर्माण जालां. संवसारांत आतंकवाद परतून तकली वयर काडीत आसा हेंच ह्या हल्ल्यान सिद्ध जालां. अर्थांत इसीसाचो हो पयलोच आतंकवादी हल्लो नाशिल्लो. हाचे पयलींय इसीसान खूबशा देशांनी आतंकवादी हल्ले केल्यात.
भारत जाल्यार सदांच ह्या संघटणेच्या हीट लिस्टार आसा. आतंकवादाची सगल्यांत चड झळ भारताक बसल्या. आतंकवादाक लागून भारतान दोन प्रधानमंत्री व्हगडायल्यात. भारताचेर जाल्ल्या 26/11 चो आतंकवादी हल्लो तर पुराय संवसारान पळयला. भारताक जेन्ना आतंकवादाची झळ बसली तेन्ना पुराय संवसारान एकठांय येवन सामकार वचपाचें आवाहन भारतान केल्लें. पूण त्या वेळार कोणेच प्रतिसाद दिलो ना. ताका लागून आतंकवाद्यांचें बळ वाडतूच गेलें. आतंकवाद्यांनी फक्त भारताकूच न्हय जाल्यार अमेरिके सारक्या महासत्तेक लेगीत आतंकवाद्यांनी आपलें रूप दाखयलां. मदेकांत कांय काळ शांत आशिल्ले इसीसचे आतंकवादी आतां परतून एकदां सक्रीय जाल्यात. इसीसचे आतंकवादी सगल्या देशांनी आतंकवादी कारवायो करीत आसात. ताका लागून आतंकवाद हो आतां एका देशाची समस्या उरिल्ली नासून ती वैश्वीक समस्या जाल्या. आतंकवादा पसून खंयचोच देश अलिप्त रावंक शकना. ताका लागून हाचो मुकाबलो सगल्या देशांनी मेळून करूंक जाय. जो मेरेन आतंकवाद्या आड पुराय विश्व एकठांय येना तो मेरेन आतंकवादाचो हो भस्मासूर आडावप कठीण आसा. आतंकवादी म्हणल्यार मानवतायेचो दुस्मान. ह्या दुस्माना आड झुजपा खातीर सगल्या राष्ट्रांनी एकठांय येवप ही काळाची गरज आसा.
पुतीन जातले आनीक बळिश्ट
रशियांत हालींच वेंचणूक जाली आनी हे वेंचणुकेंत अपेक्षे प्रमाण रशियाचे राष्ट्राध्यक्ष वालदिमीर पुतीन हे 88 टक्के मतां मेळोवन सेगीत पांचवे फावटी जैतिवंत जाले. 2000 वर्सा वालदिमीर पुतीन हे जेन्ना पयले फावटी राष्ट्राध्यक्ष जाल्ले तेन्ना ते इतले प्रदीर्घ काळ राष्ट्राध्यक्ष उरतले अशें कोणाकूच दिसूंक नाशिल्लें. पूण फाटल्या 24 वर्सांत पुतीन हे रशियांतलेच न्हय जाल्यार संवसारांतले सगल्यांत बळिश्ट राजकी मनीस जाल्यात. रशियांत सद्या पुतीन हांची एकहाती सत्ता आसा. रशियांत तांचे आड कोणूच आवाज काडूंक शकना. एक प्रकारान ते रशियाचे हाुकुमशहाच आसात.
फाटल्या 24 वर्सांतलो तांचो कारभार लेगीत हेंच दाखोवन दिता. खूबशे फावटी तांणी फॅसीजमाचें उक्तेपणान समर्थन केलां. ताका लागून तांणी जिखिल्ली वेंचणूक ही फक्त औपचारीकतायूच आशिल्ली. ही वेंचणूक फक्त संवसाराक दाखोवपा पुरतीच आशिल्ली. मुळांत थंय लोकशायूच अस्तित्वांत नाशिल्ल्यान ही वेंचणूक फक्त फार्स आशिल्ल्याचो आरोप अस्तंती देशांनी चड करून युरोपीयन देशांनी केलो, आनी तातूंत तथ्य लेगीत आसा. अर्थांत अशा आरोपांक पुतीन भीक घालिनात. ते तांचेच तंद्रीन कारभार करपी अशे आसले तरी तांकां ह्या नव्या इनिंगांत खूबशा नव्या समस्यांक तोंड दिवचें पडटले, आनी ताची सुरवात लेगीत जाल्या. पुतीन हांणी वेंचणूक जिखतकच रशियाची राजधानी मॉस्का शारांत इसीस हे आतंकवादी संघटणेन हल्लो केलो. विशेश म्हणल्यार ह्या हल्ल्याचो एकाय युरोपियन राष्ट्रान निशेध लेगीत केलो ना. ताका लागून हो हल्लो नक्की इसीसान घडोवन हाडलो की तांच्या नांवार हेरांनीच हल्लो घडोवन हाडलो असोय दुबाव उक्तायतात.
अर्थांत ह्या हल्ल्या फाटल्यान मास्टर मायंड कोण हे पुतीन सोदून काडटलेच आनी ताचो बदलोय घेतले हें आनी वेगळें सांगपाक नाका. ताका लागून फुडारांत आनीक एका झुजाक संवसाराक सामकार वच्चें पडटालें हें निश्चीत. तातूंतच पुतीन हांणी नाटो देशाक उक्ती शिटकावणी दिल्ल्यान संवसाराचो हुस्को आनीक वाडला. अमेरिकेच्या नादाक लागून रशिया कडेन दुस्मानकाय घेवपी नाटो देशाक ताची ख्यास्त मेळटलीच अशी शिटकावणी तांणी दिल्ल्यान फुडारांत युक्रेना भशेन आनीक एखाद्या नाटो देशाचेर रशिया हल्लो करतली असो अदमास उक्तायतात. रशियान युक्रेनाचेर हल्लो केले उपरांत अमेरिके सयत युरोपियन राष्ट्रांनी आनी नाटो संघटणेंत आशिल्ल्या देशांनी युक्रेनाक तेंको दिलो. युक्रेनाक अमेरिकेन केल्ली अर्थीक आनी लश्करी सामुग्रेची पुरवणूय रशिया आडावंक शकली ना. युक्रेनाचेर हल्लो केल्ल्यान अस्तंती देशांनी रशियाचेर कितलेशेच अर्थीक प्रतिबंध घाले उपरांतूय रशियाची अर्थवेवस्था आसा तशीच आसा. उरफाटें अमेरिका, जर्मनी, फ्रान्स, ब्रिटन ह्या सारक्या प्रगत राष्ट्रां परस फाटल्या वर्सभरांत रशियाचो विकास दर वाडला. आतां पुतीन परतून एकदां रशियाच्या सर्वोच्च पदार बसल्यात. आनीक स वर्सां तरी ते रशियाचे राष्ट्राध्यक्ष उरतले. ताका लागून ते आतां आसात ताचे परस अदीक बळिश्ट जातले हातूंत दुबाव ना.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
