भांगरभूंय | प्रतिनिधी
तु मकां रीचस्टॅग उजो, मंच्युरीयन घडणूक वा मैनिलाचो बाॅम्बस्फोट याद जाता. हिटलर चान्सलर जाले उपरांत कांय सप्तकांनी 27 फेब्रुवारी 1933 दिसा रिचस्टॅग उजो हो जर्मनीचे संसदेचेर जाल्लो उजो (जाळपोळ) हल्लो आशिल्लो. मागीर नाझी फुडारी हर्मन गोयरिंग हांणी हो उजो लायिल्ल्याचें आनी कम्युनिस्टांक दोशी थारयिल्ल्याचें स्वताच कबुल केल्लें. ताचे पयलीं लागून शेंकड्यांनी कम्युनिस्टांक अटक जाल्ली. नाझींक 5 मार्चाचे वेंचणुकेंत विरोधकांक चेंपपा खातीर हे घडणुकेची मजत जाली. 1931 तले मंच्युरियन घडणुकेंत जपानी सैन्यान मुक्देन लागसार तांचेच रेल्वेंत स्फोट घडोवन मंच्युरिया वयल्या आक्रमणाचें समर्थन करपाक चीनाक स्फोटाचो दोश दिलो. मागीर जपानी अधिकाऱ्यांनी कब्जो करपाक तो स्फोट केल्लो अशें कबुल केलें. 1939 क मैनिलांतले घडणुकेंत सोवियन युनियनान आपल्याच गांवाचेर बाॅम्बहल्लो केल्लो आनी शिंयाळें झुज सुरू केलें म्हूण फिनलॅण्डाक दोश दिल्लो. सोवियत फुडारी निकिता ख्रुश्वेव्ह हांणी मागीर लेखी कबुल केल्लें की हो हल्लो बोगस आशिल्लो. अध्यक्ष बोलीस येल्त्सिन हांणी शिंयाळी झुजांत रशिया आक्रमक आशिल्लो अशें मान्य केल्लें.
1946 ते 1948 मजगतीं ब्रिटीश सरकारान होलोकाॅस्टांतल्यान वाचिल्ल्या ज्युंक पॅलेस्टायनाक व्हरपी पांच बोटींचेर बाॅम्ब दवरिल्लो. ब्रिटीस गुप्तचर यंत्रणेन चलयिल्ले हे कारवायेची जापसालदारकी घेवपाक डिफेंडर्स ऑफ अरब पॅलेस्टायन नावाच्या एका बोगस गटाचो वापर केल्लो. प्राध्यापक कीथ जेफरी हांच्या एम- 16 : द हिस्ट्री आॅफ द सिक्रेट इंटेलिजेंस सर्व्हिस 1909- 1949 ह्या 2010 त उजवाडाक आयिल्ल्या पुस्तकांत हें सगलें आसा. 1953 त सीआयएन लोकशाय पद्दतीन वेंचून आयिल्लें प्रधानमंत्री मोसादेघ हांचे सरकार उडोवपाक आनी इराणाचेर राज्य करपाक शाह मुहंमद रेजा पहलवी हाचें राज्य परत स्थापन करपाक लश्करी अधिकाऱ्यांची भरती करून इराणांत बंड घडोवन हाडिल्ल्याची कबुली दिल्ली. तांणीच बाॅम्बस्फोट घडोवन हाडले, बोगस बातम्यो पेरल्यो आनी बंडाचें समर्थन करपाक कम्युनिश्ट पक्षाक दोश दिलो.
बीबीसीच्या खबरे प्रमाण, हालींच उक्तीं केल्ल्या कागदां वयल्यान दिसता की, 1957 त सिरियांत हल्ले करपाक, दमस्कस राजवटीच्या बदलाचें समर्थन करपाक, तांच्या सरकाराक दोशी थारावपाक युके आनी अमेरिकन फुडारी आयसेनहाॅवर हांमी सीआयए- एम16 येवजणेक मान्यताय दिल्ली. हे येवजणेचे प्रायोजक म्हूण सिरियाकूच दाखोवन तांचे आड इराक आनी जाॅर्डनाक हल्लो घडोवन हाडपाची येवजण आशिल्ली. 1954 त इस्रायलाच्या एका गटान इजिप्तांत सरकारी इमारतींत बाॅम्ब दवरले आनी अरबांचेर दुबाव येतलो अशे पुरावे फाटल्यान सोडले. एक स्फोट जालो. 2005 त ह्या गटाच्या जिव्या वांगड्यांचो इस्रायल अध्यक्ष मोशे काट्झाव हांणी भोवमानूय केल्लो.
इटलीचे आदले प्रधानमंत्री, न्यायाधीश आनी गुप्तचर विभागाचे जनरल जियानोडेलियो मालेट्टी हांणी खुलासो केलो की, पेंटागाॅन आनी सीआयएचे मजतीन नाटोन 1950 च्या दशकांत इटली आनी युरोपी देशांनी आकांतवादी बाॅम्बस्फोट केले. दोश कम्युनिस्टांक दिलो, कारण ताचे आड लोकांचो वांगड मेळचो म्हूण. 1962 त अमेरिकेल्या जाॅयंट चीफ आॅफ स्टाफान अमेरिकन विमान उडोवपाची, आतंकवादी कारवाय करपाची कागदां, येवजण मंजूर केली. हाचे फाटल्यान क्युबाक दोशी धरले कारण तांकां क्युबाचेर हल्लो करपाचो आशिल्लो.
उत्तर व्हिएतनामी बोटींनी अमेरिकन बोटींचेर हल्लो केल्ल्याचो फट दावो करपाक डाटांत फेरफार केलो. ताका लागून व्हिएतनाम झूज सुरू जालें. लिबियांत गद्दाफीच्या घरा भायर एक बोगस रेडियो ट्रान्समिटर बसोवन तो आतंकवादी समर्थक हें सिद्ध करपाक बोगस संदेश प्रक्षेपीत केले. उपरांत रोनाल्ड रेगन ह्या अध्यक्षान लिबियांत बाॅम्बस्फोट घडोवन हाडलो. मोसादाच्या एका एंजटान ही म्हायती 1984 त दिल्ली.
बुश प्रशासनांतले आदले मुख्य अर्थशास्त्रज्ञ माॅर्गन रेनाॅल्ड्स हांणी विमाना टाॅवरांच्या स्टील फ्रेमांनी प्रवेश करप अशक्य अशें सांगिल्लें. तर एम 15 चे आदले अधिकारी डेव्हिड शेलर हांणी टाॅवर्साचेर आपटयल्यांत तीं होलोग्रामाचो वेटोळो आशिल्लीं क्षेपणास्त्रां. विमानांनी विम्याचो दावो करूंक ना आनी त्या दोनूय विमानांतल्या प्रवाशांची वळख उक्ती करूंक ना. हे घडणुके उपरांत अमेरिकेच्या लश्कराची अफगाणिस्तांत उपस्थिती वाडली. अर्थांत अफगाणिस्तानाचेर ताचो राजकी, समाजीक, अर्थीक परिणाम जालो.
इतिहासांत असलीं जायतीं उदाहरणां आसात, जंय आतंकवादाचे बळी म्हूण दाखयिल्ले देशूच प्रत्यक्षांत गुन्यांवकार आशिल्ले. वेंचणुको जिखप, झूज सुरू करप, सरकारां उमथून उडोवप, नागरी स्वातंत्र्य काडून घेवप, जनमत बदलप, निर्दोशांक आकांतवादी म्हूण लेबल लावप, समाजाच्य विविध घटकां मदीं ध्रुवीकरण करप, जमनी वा संसाधनाचेर आक्रमण करप वा नवी संवसारीक वेवस्था मुखार व्हरप हे सारके छुपे अजेंडे पुराय करपाक जाणुनबुजून हल्ले जातात. तांकां बोगस फ्लॅग वा फोल्स फ्लॅग म्हणटात. ह्या कारवायांची जापसालदारकी जायते फावटी कांय वर्सांनी फुडारी वा अधिकारी स्विकारतात. लोकांचे सुरक्षेची जापसालदारकी ज्या फुडाऱ्यांचेर आसता, ते स्वताच्या लोकां आड कित्याक अशें करतात?
‘आतंकवाद हें सगल्यांत बरें राजकी शस्त्र आसा. कारण अचकीत मरणाच्या भंया परस लोकांक आनीक कांयच कठीण दिसना’ अशें अॅडोल्फ हिटलरान म्हणलां. ‘लोकांक झुज नाका आसता. पूण निमणे देशाचे फुडारीच धोरण थारायतात आनी लोकांक ओडून आपले वांगडा व्हरप सदांच सोंपें आसता. मागीर ती लोकशाय आसूं वा फॅसिस्ट, कम्युनिश्ट हुकूमशाय. लोकांक फुडाऱ्याच्या इत्से प्रमाण वागोवपाक मेळटा. तांकां फक्त सांगपाचें तुमचे हल्लो जावपाचो आसा आनी शांततावादी आसात तांकां राष्ट्रद्रोही म्हणून देशाक धोक्यांत हाडिल्ले खातीर निशेध करपाचो’. हीं उतरां आसात, हर्मन गोअरिंग ह्या नाझी फुडाऱ्याचीं. सगले मानवजातीचेर नियंत्रण हाडप हो ह्या घडणुकां फाटलो हेतू आसता. तेन्ना रोखडोच निश्कर्श काडचे पयलीं, खंयचोय आकांतवादी हल्लो भूतकाळ, वर्तमान आनी फुडाराचे साणीर घासून ताचें विश्लेशण करप म्हत्वाचें.
नझराना दरवेश
89750 74456
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
