भांगरभूंय | प्रतिनिधी
नवी दिल्ली, खबरां संस्था: फाटल्या कांय दिसांनी जायत्या विमान कंपनींक तांचीं विमानां बॉम्ब घालून उडोवपाच्यो शंबरां परस चड धमक्यो आयल्यात. ताका लागून विमान येरादारी खातें, विमानतळ आनी भारतीय गुप्तचर एजन्सी शिटूक जाल्या. अशें आसतना आतां खलिस्तानी आतंकवादी गुपतवंतसिंग पन्नून हातूंत तेल ओतलां. पन्नून भारतीय विमान बॉम्बान उडोवपाची धमकी दिल्या. पन्नून म्हणलां, शीख दंगलींक ४० वर्सां पुराय जातात. तेन्ना एअर इंडियाच्या विमानाचेर हल्लो जावंक शकता. आंतरराष्ट्रीय प्रवाशांनी १ ते १९ नोव्हेंबर ह्या काळांत एअर इंडिया विमानांतल्यान प्रवास करचो न्हय, असो सल्लो गुपतवंतसिंग पन्नून दिला.
पन्नून सिख फॉर जस्टिस नांवाची संस्था स्थापन केली. ती सेगीत भारता आड कारवायांनी वांटेकार आसता अशें कळून आयलां. तशेंच पन्नू भारताआड भाशणां दिता. तो खलिस्तानाच्या नांवान तरणाट्यांक उर्बा दिवपाचो वावर करता. ते खातीर भारत सरकारान ताका आतंकवादी जाहीर केला. ताचेर फुटीरता वादाक उर्बा दिवप, पंजाबांतल्या शीख तरणाट्यांक देशा आड शस्त्र उखलपाक उर्बा दिवप, भारता आड भाशणां केल्ल्याचो गुन्यांव नोंद आसा.
मजगतीं, पन्नून फाटल्या सप्तकांत भारताच्या सार्वभौमत्वाक धोको निर्माण करपी व्हिडियो उजवाडायलो. ताणें भारताक ‘बाल्कनीज’ करपाची धमकी दिल्या. कॅनडाचो परराश्ट्र उपमंत्री डेव्हिड मॉरिसन हाका जाप म्हणून पन्नून हो व्हिडियो जाहीर केला. ऑक्टोबराचे सुरवातेक ऑटवांत जाल्ले भौशीक सुनावणेक संबोधन करतना मॉरिसन हांणी म्हणलें, कॅनडाचें धोरण सामकें स्पश्ट आसा, भारताच्या प्रादेशीक अखंडतेचो आदर करचो पडटलो. मॉरिसनाच्या ह्या निवेदनाक जाप दितना गुरपवंत सिंगान नवो व्हिडियो काडला.
पन्नून नेमकें कितें म्हणलें?
पन्नून ‘मिशन ऑफ एसएफजे २०२४ : वन इंडिया, टू २०४७’ हें नांव दिवन व्हिडीयो जारी केला. हातूंत तांणी जम्मू आणि काश्मीरा सयत आसाम, मणिपूर आनी नागालँड सारक्या देशाच्या विवीध वाठारंनी फुटीरतावादी चळवळींक उर्बा दिवपाची धमकी दिल्या. पन्नू हो एसएफजे ह्या प्रतिबंधीत संघटणेचो कायदेशीर सल्लागार आनी प्रवक्तो, जो सार्वमता वरवीं खलिस्तान मेळोवपाक सोदता. कॅनडा आनी अमेरिकेचें दोट्टी नागरिकत्त्व आशिल्ल्या पन्नून भारताचें बाल्कनायजेशन करपाची धमकी दिल्या, तशेंच चीनचे अध्यक्ष शी जिनपिंग हाका अरुणाचल प्रदेश परत घेवपाची मागणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
