भांगरभूंय | प्रतिनिधी
नवी दिल्ली, खबरां संस्थाः 26/11 मुंबय हल्ल्याचो आतंकवादी तहव्वूर राणा हाका भारतांत हाडपाचो मार्ग आतां मेकळो जालां. अमेरिकेच्या सर्वोच्च न्यायालयान भारत-अमेरिका प्रत्यार्पण कबलाती खाला राणाच्या प्रत्यार्पणाक मान्यताय दिल्या. तहव्वूर राणा सध्या लॉस एंजल्स बंदखणींत आसा. मुंबयच्या आतंकवादी हल्ल्यांतलो मुखेल आरोपी आनी लश्कर-ए-तोयबाचो आतंकवादी डेव्हिड हेडली कडेन संबंद आशिल्ल्याचो आरोप राणाचेर आसा.
२६ नोव्हेंबर २००८ दिसा लश्कर-ए-तैयबाच्या १० आतंकवाद्यांनी मुंबयचेर हल्लो केलो. लिओपोल्ड कॅफे, छत्रपती शिवाजी महाराज टर्मिनस, ताजमहल हॉटेल पॅलेस, ओबेरॉय ट्रायडंट, कामा हॉस्पिटल, नरीमन हावस, मेट्रो सिनेमा आनी सेंट झेवियर कॉलेजींत हो हल्लो जाल्लो.
26/11 हल्ल्या कडेन राणाचो संबंद…
अटक जाले उपरांत तहव्वूर राणान लश्कर-ए-तोयबा (एलईटी) ही आतंकवादी संघटना आनी ताचो भुरगेपणांतलो इश्ट डेव्हिड हेडली पाकिस्तानांतल्या तांच्या प्रशिक्षण शिबिराक गेल्लो अशें कबूल केलें. अमेरिकन कागदपत्रां प्रमाण २००५ वर्साच्या निमाणे कडेन हेडलीक एलईटी कडल्यान भारतांत वचून थंय नदर दवरपाची सुचोवणी मेळ्ळी. २००६ वर्साचे सुरवेक हेडली हांणी एलईटीच्या दोन वांगड्या वांगडा मुंबयंत इमिग्रेशन कार्यालय उगडपा विशीं चर्चा केली. हेडली हांणी राणाक हे विशीं म्हायती दिली आनी तांणी राणाचे फर्स्ट वर्ल्ड इमिग्रेशन सर्व्हिसेसचे वापरपाचें थारायलें अशें अमेरिकेच्या अधिकाऱ्यांनी सांगलें.
हेडलीच्या साक्षी प्रमाण, तशेंच ईमेल आनी हेर कागदपत्रांच्या म्हायती प्रमाण, राणान फर्स्ट वर्ल्ड कडेन संबंदीत आशिल्ल्या मनशाक हेडली खातीर दस्तावेज तयार करपाची सुचोवणी दिली आनी भारतांत वचपाक व्हिसा कसो मेळोवचो हाचेर हेडलीक सल्लो दिलो. मुंबय जाल्ल्या हल्ल्या पयलीं राणान हेडलीक शिकागोंत इमिग्रेशन लॉ सेंटर चलोवपी रेमंड सँडर्साच्या माध्यमांतल्यान भारतांत वचपाक मल्टीपल एंट्री बिझनेस व्हिसा मेळोवपाक मजत केली तशेंच अर्थीक मजतय केली. ताणें हेडलीक सप्टेंबर २००६ त ४१,९३७, ऑक्टोबर २००६ त ६७,६०५, नोव्हेंबरांत १७,६३६ आनी डिसेंबर २००६ त ८३,८७५ रुपया अर्थीक मजत केली.
मार्च २०१६ वर्सा मुंबयच्या खाशेल्या न्यायालयांत चवकशी करतना हेडलीन न्यायालयांत सांगलें, पाकिस्तानाच्या इंटर-सर्व्हिसेस इंटेलिजन्सचे (आयएसआय) मेजर इक्बालांच्या सुचोवण्यां प्रमाण हल्ल्या खातीर लोकांक भरती करपा खातीर भाभा अणु संशोधन केंद्राक भेट दिली. राणाक ही गजाल खबर आशिल्ली. ताजमहाल पॅलेस हॉटेलाचेर जाल्ल्या हल्ल्याचीय तपशीलांची म्हायती राणाक खबर आशिल्ली. ह्या हल्ल्याच्या लक्ष्यां विशीं ताणें हेडली कडेन सविस्तर चर्चा केल्ली. राष्ट्रीय तपास संस्थेक राणा जाय आनी ताचेर गुन्यांवकारी कट रचप, भारत सरकाराआड झूज करप, खून करप, फटवणूक करपाच्या हेतान खोटी कागदपत्रां तयार करप, आनी हेर गुन्यांवांचे आरोप आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
