भांगरभूंय | प्रतिनिधी
नवी दिल्ली, खबरां संस्था ः पाकिस्तानांतल्या आतंकवादी तळांचेर हल्लो करपाक इसरोचो म्हत्वाचो वांटो आशिल्लो. इस्रोच्या उपगिऱ्याच्या म्हायतीच्या मजतीन भारतीय सैन्यांक लश्करी रडार प्रणाली नश्ट करून पाकिस्तानी ड्रोन आनी क्षेपणास्त्र हल्ले निश्क्रीय करपाक येस आयलें.
इसरोचें उपगिरे नेटवर्क भारतीय सैन्यांक आतंकवादी लिपपाची सुवात अचूकपणान वळखुपाक, हल्ल्याचे लक्ष्य थारावपाक आनी पाकिस्तानी लश्करी तळांचेर, शस्त्रां आनी सैन्यांची हालचाल, रडार स्टेशनां विशीं म्हायती दिवपाक जाय आशिल्ली म्हत्वाची म्हायती दिता.
हाचे भायर तांच्या इलॅक्ट्रॉनीक कार्यावळींचो मागोवप घेवप आनी गुप्तचर म्हायती मेळोवपाक अत्यंत उपेगी थारता. सध्या इस्रोचे उण्यांत उणे 7 उपगिरे संवेदनशील आनी गुप्त म्हायती मेळयतात.
१. RISAT-2B (रडार इमेजिंग सॅटेलाइट): हें सिंथेटिक एपर्चर रडाराचेर आदारिल्लें आसून हाचे वरवीं मळब, काळोख आनी धुल्ल आशिल्ल्या हवामानांत निरिक्षण करपाक मेळटा. भारताच्या दर्यादेगेवयल्यान दर्यांत भितर सरपी खंयच्याय नाका आशिल्ल्या तारवाचो सोद घेवपाक हो उपगिरो सक्षम आसा.
२. RISAT-2BR1: हो सिंथेटिक एपर्चर रडार आदारीत उपगिरो आसा. तातूंतल्यान पाकिस्तानाच्या लिपिल्ल्या हालचालीं विशीं म्हायती उक्ती करूं येता आनी लक्ष्यांची खात्री करूं येता. फकत ३५ सेंमीच्या अंतराचेर दोन वस्तू सोदून काडपाची तांक आशिल्लो हो गुप्तचर उपगिरो.
३. कार्टोसॅट-3: इंडिया रिमोट सेन्सिंग प्रोग्रामाचो एक भाग, थर्मल इमेजिंग क्षमताय आशिल्लो हो उपगिरो. तशेंच पंचक्रोमॅटिक कॅमेरान सुसज्ज जो 25 सेंमी इतल्या ल्हान वस्तूंच्यो उच्च रिझोल्यूशनाचो फोटो घेवपाची तांक आसा.
४. एमिसॅट उपगिरोः हाचे वरवीं पाकिस्तानाचीं रडार केंद्रां, कम्युनिकेशन सिग्नल आनी इलॅक्ट्रॉनीक कार्यावळींचेर नदर दवरपाक मेळ्ळी. तशेंच खंय आनी खंयचीं लश्करी उपकरणां सक्रिय जातात हें कळपाक मजत जालीं. रडार प्रणाली नश्ट करपाक ह्या उपगिऱ्याचो मुखेल वांटो आशिल्लो.
५. हायसीस उपगिरोः हो उपगिरो हायसीस उच्च-स्पेक्ट्रल इमेजिंग तयार करता, म्हळ्यार पाकिस्तानांत खंयचेय संरचनात्मक बदल वा लश्करी तैनातीची वळख करप शक्य आसा. तशेंच तातूंत आशिल्ल्या सामुग्रीचेर आदारून पाकिस्तानी शस्त्रां आनी वाहनां वळखुपाची तांक तातूंत आसा.
६. GSAT-7 (जिओ स्टेशनरी सॅटेलाईट): हो उपगिरो नौदल आनी दर्यादेग राखणदार संचारणाखातीर उपलब्ध आसा. तशेंच पुराय दर्या वाठारांतल्यान रियल टायम वेळार संवाद सादपाक सक्षम आसा. एकाच वेळार 60 तारवां आनी 75 विमानांकडेन संवाद सादपाक सक्षम आसा. हाचे वरवीं लश्करी कमांड आनी युनिटां मदीं सुरक्षीत संवाद सुनिश्चीत करपा खातीर मजत घेतात. नौदळ खास करून दर्यावेल्या देखरेखे खातीर ताचो उपेग करता. हवाई दल आनी लश्कर ह्या उपगिऱ्याचो उपेग मनीसबळ नाशिल्लीं विमानां (ड्रोन) चलोवपा खातीर आनी एअरबोर्न अर्ली वॉर्निंग आनी कमांड प्रणाली खातीर करतात. पाकिस्तानांतल्यान येवपी वस्तूंचो मागोवपाक घेवपाक मजत जाता.
७. GSAT-7A (अँग्री बर्ड): ह्या उपगिऱ्याची वट्ट क्षमतायेतलीं 30% भारतीय सैन्याक आनी भारतीय वायुसेनेक उपलब्ध आसा. ह्या उपगिऱ्यात हवाई दळाची सगळी मालमत्ता म्हळ्यार झुजारी विमानां, हवाई पयलींची शिटकावणी दिवपी नियंत्रण प्रणाली आनी ड्रोन हांकां एकामेकांकडेन आनी जमनीवयल्या केंद्रांकडेन जोडपाची तांक आसता, जाका लागून हवाई दळाक नेटवर्क केंद्रीत झुजाची तांक मेळटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
