आतंकवादा आड झूज

भांगरभूंय | प्रतिनिधी

ट्रंपाचे घोशणे उपरांत रोखडीच शस्त्रां सकयल दवरप हाचो अर्थ आमी अमेरिकेच्या दबावा खाला आयले असो जाता. शाराशारांनी मॉक ड्रील करून पद्धतशीर आमी झुजांत देविल्ले आसतना…….

युद्धस्य कथा रम्या- हें फकत जाच्या घरांतलो कोणूय झुजांत खंवसलो ना तोच म्हणपाक शकता. जीण आनी संपत्तीचो नाश चड उणें प्रमाणांत प्रतिस्पर्धी झुजपी राश्ट्रांक सोंसचो पडटा. झुज हो सदांच निमणो पर्याय आसचो. ‘जननी जन्मभूमिश्च स्वर्गादपि गरियसी’ – अर्थात माता आनी देश हे सर्गा परसूय स्रेश्ट अशें मानलां. ‘मातृभूमी’ म्हणटात ते त्या खातीर. जण एकल्याक देशप्रेम आनी देशाभिमान आसचोच, पूण तो झुजांच्या तेंपार तरी अतिरेकी आसूनये. प्रस्न सैनिकांच्या जिविताचो आशिल्ल्यान झुजाचो काळ हो गंभीर आनी संवेदनशील काळ आसता. सुत्रां कडल्यान झुजासंबंदीत म्हायती सांपडली जाल्यारूय ताचेर वाच्यता करप, नेत्यांनी आनी प्रसारमाध्यमांनी भाश्य करप, भासाभाशेंत तांतुंतल्यो त्रूटी दाखोपाचो यत्न करप योग्य न्हय.
भारत- पाक तीन दिसांच्या प्रत्यक्ष झुजाच्या वेळच्यो अतिरंजीत आनी अतिरम्य काण्यो भार भरिल्ले एँकर सांगतना तेच बाँब जाल्लेवरी दिसताले. ‘भारतीय सेना पाकिस्तानांत घुसल्या, अर्द पाकिस्तान काबार, इस्लामाबादेर कब्जो, कराची बंदराचो गोबोर, शाहबाज शरिफांच्या बंगल्या भायर स्फोट, पाक सेनेंत यादवी, सेनाध्यक्ष आसिम मुनिरांचें पलायन असल्यो तथ्यहीन, भडकाऊ बातम्यो सुत्रांचे हवाले दित, संबंद नाशिल्ले आदले झुजांचे विडियो आनी विडियोगॅम्स जोडून तांणी दाखयले.
एक एँकर राजौरींत आमच्या सैनिकांची हालचाल दाखयताली तर दुसरी सेनेचे हॅलिकॉप्टर आतां गुजराताचे शिमेर वतले हाची म्हायती दिताली. हाका लागून आमच्या सैनिकांची जिणेक धोको संभवता. मंत्री किरण रिजिजूंक मुखेल चॅनलांच्या एँकरांक शिटकावचें पडलें.
नागरिकांनी धान्य आनी वखदां सांठोवचीं अशी एडवायजरी सरकारान दिली नाशिल्ली, पूण चॅनल मात दिवपाक लागिल्ले. चॅनल फेक संदेश दितात अशें प्रेस इनफॉर्मेशन ब्युरोकूय सांगचें पडलें. असले प्रकार पाकिस्तानी मीडियान केले नात, अशें ना, पूण भारता सारकिल्ल्या परिपक्व लोकशायींतली मुखेल जापसालदार मीडिया करता तेन्ना जगांत बदनामी जाता. श्रीनगर वायुसेना तळ आनी भारतीय सेना मुख्यालयाचेर पाकिस्तानान केल्ले हल्ले दाखयिल्ले ती मुळांत पाकिस्तानांतल्याच खैबर पखतुनख्वा प्रांतात दोन जमातींत आदीं जाल्ल्या यादवी झुजाची क्लिप आशिल्ली.
पाकिस्तानी जेट्स भारतीय प्रदेशांत हल्लो करपी फूटेज ही बॅटलफिल्ड-3 विडियो गेमीचो भाग आशिल्ली. 2020 वर्सा बैरूत बंदरांत स्फोट जाल्लो ताची क्लिप पाकिस्ताना कडल्यान प्रतिआक्रमण म्हूण चलयली. खूबश्या भारतीय चॅनलांनी बहावलपूरांचेर आक्रमण केल्लो विडियो दाखयिल्लो तो इझ्रायलान गाझाचेर केल्ल्या हल्ल्याचो आशिल्लो आनी बीबीसीन रिव्हर्स इमेज सर्च केले तेन्ना तो स्पुतनिक आर्मेनियाच्या 13 ऑक्टोबर 2023 रिपार्टोचो भाग आशिल्लो तें सिद्ध जालें. भारताच्या पाकिस्तानांतल्या हल्ल्याचो एक्साचेर दाखयिल्लो विडियो हो टेक्सासांत लागिल्ल्या उज्याचो आसलो.
पहलगाम हल्लेखोरांक ते आसा थंयच्यान सोदून काडून ठेचप ही आमची मुखेल मोख आसपाची. युद्ध केल्ल्यान निरपराध नागरिक, सैनिकानीं प्राण वगडायले. आनीकूय सिंदूर पुसले. जेन्ना जगांतल्या खंयच्याय देशांत आतंकवाद्यांचे पंगड विंगड विंगड आदर्शवाद, मोख आनी रणनिती खाला वावुरतात तेन्ना तांकां समूळ नश्ट करप त्या देशांतल्या सरकारांक कुस्तार आसता. नक्शलवाद्यांनी भारतात गेल्ल्या दोन दशकांत 2300 मायत सुरक्षा दळाच्या कर्मचाऱ्यांची हत्या केल्या, जी संख्या जम्मू काश्मीरांत शहीद जाल्ल्या सुरक्षाकर्मीं परस चड आसा. नक्षलानी सुमारे 6200 मायत नागरिकांक जीवेशी मारल्यात. नेपाळ ते भारतांत बिहार, छत्तिसगड, झारखंड, मध्यप्रदेश, बंगाल, महाराश्ट्र, तेलंगण, आंध्र प्रदेश मेरेन भारताच्या आठ राज्यांत पावूरपी नक्षल पंगडांचो समूळ नाश करपाचे संकल्प देशांतली सरकारां वास्तवांत हाडपाक आयज मेरेन असमर्थ थारल्यांत.
पाकिस्तानांत जैश- ए- मोहम्मद आनी लश्कर- ए-तायबा सारकिल्ल्या आतंकी पंगडांक सरकार, सेनेचो वरदहस्त लाबिल्लो आसलो तरी तालिबान पुरस्कृत इस्लामिक स्टेट ऑफ खोरासान, तेहरिक- इ- तालिबान आनी अल कायदा काश्मिर खोऱ्याचे जिहादांतल्यान इस्लामिकरण करपा खातीर स्वतंत्रपणान वावुरतात हेंवूय तितलेंच खरें. खैबर पखतुनख्वांत दर्रा आदम खेल भागांत शस्त्रांचो बाजार लागता. भाडोत्री झुजारू ए. के. -47 घेवन काम दिवपी काँट्रेक्टरांची वाट पळयत बशिल्ले आसतात. हांगा पाकिस्तान सरकार नियंत्रण दवरूंक शकना. काश्मिरी तरणाट्यांक कट्टरवादी करून आपले सभासद करपा खातीर आतंकी पंगडांत सर्त लागिल्ली आसता. जैश आनी लश्कर पंगडाचे कॅडर केन्ना हिजबूल मुजाहिदीन तर केन्ना अल कायदा पंगडाचे सदस्य जाल्ले दिसतात. जसो नक्षलांक थळाव्यांचो तेंको मेळटा तसो तो इस्लामी आतंकी पंगडाकूय मेळिल्ल्या कारणान सरकार, सेनांक तांचे आड झुजप कुस्तार जाता. आमच्या सरकारान ह्या सगळ्याच आतंकवादी पंगडाच्या गतिविधींची गुप्त म्हायती मेळोवन तांकां नेस्तनाबूद करप हे काश्मिरांतलो आतंकवाद उणावपाक परिणामकारक थारतले.
युक्रेन, रशिया झुजबंदी खातीर रशिये वांगडा एकतर्फा संवाद सादपाची घोशणा आत्मकेंद्रीत ट्रंपान केल्ली तेन्ना “आमका भायर दवरून केल्ली झुजबंदी आमी केन्नाच मानून घेवचे नात” अशे युक्रेनाक झुजांत मजत दिवपी अमेरिकेक झेलन्स्कीन सांगलें आनी मुखेल युरोपियन देश झेलन्स्कीच्या बाजून तेंको दिवन उबे दिसले.
भारत- पाकिस्तानांतली झुजबंदी ट्रंपान एकतर्फा जाहीर करप आनी ते विशीं पाक प्रधानमंत्र्यान ट्रंपाचे, चीनच्या शि जिनपींगाचे आनी साउदी अरेबिया, युएई, कतर हांचे जाहिरपणान आभार मानप म्हणल्यार काश्मीर प्रस्न आतां आंतरराश्ट्रीय माचयेर पावलो काय कितें असो दुबाव येवपाक लागला. “फकत व्दीपक्षीय वार्ता, संवादांतल्यानूच काश्मीर समस्यांचे समाधान आमकां मान्य आसा, थंय तिसऱ्या पक्षाची मध्यस्थी मान्य आसची ना हे सुरवेक सावन आमचे काश्मीर बाबतींतलें धोरण जावन आसा” अशे मोदीन ट्रंपाक ताणें झुजबंदी संबंदी फोन केलो तेन्ना स्पश्टपणान सांगपाचें. ट्रंपाच्या घोशणे उपरांत रोखडीच शस्त्रां सकयल दवरप हाचो अर्थ आमी अमेरिकेच्या दबावा खाला आयले असो जाता. शाराशारांनी मॉक ड्रील करून पद्धतशीर आमी झुजांत देविल्ले आसतना झुजबंदीचो आग्रो पाकिस्तान वतीन येतसर झुज लांबोवपाचें. पहलगाम हल्लेखोरांक ताब्यात दिता जाल्यारूच आमी झुजबंदी विशीं विचार करपाक शकतात अशी अट घालपाची. “पूर्व पाकिस्तानांत भारत हस्तक्षेप करत जाल्यार अमेरिका वोग्गी रावपाक ना, धडो शिकयतलो” अशी धमकी रिचर्ड निक्सन हाणी इंदिरा गांधीक दिल्ली. “अमेरिकेक भारत मित्र मानता मालक न्हय, भारत आपले भविश्य बरोवपाक सक्षम आसा” अशी जाप दिवन 3 डिसेंबर 1971 दिसा झुज सुरु केले. 16 डिसेंबराक पाकिस्तानाक दिमी मारत शरणागती पत्करली.
“आपणे दोनूय देशांक वेपार करारांची भिरांत घालून झुजबंदी चालीक लायली” ह्या ट्रंपाच्या दाव्याचें मोदीन जरी खंडन केल्लें आसलें तरी ट्रंप झुजबंदीचे स्रय घेत आसा.
आखाती देश झुजाच्या कुस्तार कळांत प्रत्यक्ष वा अप्रत्यक्षपणान पाकिस्तान वांगडा दिसले. आमचे शेजारी नेपाळ, भूतान, श्रीलंका, मालदिव्स, बांगला देशान आमकां प्रत्यक्ष,अप्रत्यक्ष तेंको दिलो ना. त्या खातीर आमचो विरोध आसतना 8 मे दिसा आंतरराश्ट्रीय मुद्रा कोश (आय.एम.एफ) बोर्डान $ 1 अब्ज निधी पाकिस्तानाक संमत करून केलो.
उपकरणां, शस्त्रां, लढाउ विमानां उत्पादन करपी देशांक तांच्या उत्पादनांच्या क्षमतेचे प्रत्यक्षिक पळोवपाची संद झुजां दितात. शस्त्रास्त विक्री हो देशांचो एक व्हड धंदो. ह्या झुजांत तुर्कियेक पाकिस्तानाक पुरवण केल्ल्या ड्रोनांची विध्वंसक क्षमता पळोवपाची संद मेळ्ळी. चीनाक पाकिस्तानाक पुरवण केल्ल्या जेटांची कामगिरी पळोवपाक मेळ्ळी. झुजपी देशांनी आपणे दुस्मानाचे कशे लुकसाण केलें तें रंगोवन सांगप आनी आपले लुकसाण लिपोवप ही झुजाच्या तेंपार रणनित आसता. पाकिस्तानाचे जेट आमी उडयलें हें आमी सांगतात तेन्ना आमचीं तीन राफेल सयत पांच जेट उडयल्यांत असे दावो पाकिस्तानान केला. एक राफेल उडयलां हाचे पुरावे मेळ्ळ्यात, अशे फ्रेंच गुप्तचरान सांगलां हें सीएनएन, वॉशिंग्टन पोश्ट, रायटर हाणीं जगजाहीर केल्ले कारणान भारतान ताचेर भाश्य करपाची गरज आसा. तीं विमानां देशाचे सुरक्षे खातीर खरेदी करपा खातीर दुडू दिवपी, देश सुरक्षेची चिंता करपी करदात्या भारतीयांक खरें तें सांगप ही सरकारची जापसालदारी.
मोदींचो दोस्त ट्रंपानूय आतंकवाद विरोधी मोहिमेच्या झुजांत भारताची कणखरपणान साथ दिली ना. अमेरिकेच्या 9-11 हल्ल्याचो मास्टरमायंड अल कायद्याच्या आतंकी ओसामा बीन लादेनाक ह्याच पाकिस्तानान एबोटाबाद गावांत सुरक्षित वाठारांत आलाशिरो दिल्लो हे ट्रंप विसरलो. गेल्ले सप्तकांक सिरियाचो स्वयंघोशित मुखेली अल-शारा हाणें ट्रंपाची साउदी अरेबियांत भेट घेतली. अल-शारा सिरियांत अल-कायदा आतंकी शाखेचो मुखेली आसतना अमेरिकेन ह्या आतंकवाद्यांचेर एक कोटी डॉलरांचें इनाम घोशित केल्लें जें फाटले डिसेंबर मेरेन वैध आशिल्लें. आयज ट्रंप अल-शाराची तोखणाय “एक देखणो, धैर्यवान आनी बरी फाटभूंय लाबिल्लो तरणाटो” अशी करतना दिसता तेन्ना थंय पाकिस्तानाक झुजांत मजत दिवपी तुर्कियेचो राश्ट्राध्यक्ष राचेप तईप्प एर्दवान ऑनलायन हजर आसता. हमास आतंकवाद्यांक $1.80 अब्ज मजत दिवपी कतर देशा कडल्यान $40 कोटी मोलाचे जेट ट्रंप देणगी (काय लांच) स्वरूपांत स्विकारता तेन्ना 2017 वर्सा ताणेच कतराक ‘आतंकवादाचे देणगीदार’ म्हणिल्ले ते ट्रंप विसरता. जगांतले देश आयज आपल्या सोयी नुसार आतंकवादाची व्याख्या बदलतात अशें दिसता.
“हाचेफुडे केन्नाय असले आतंकी हल्ले जायत जाल्यार पाकिस्तानाक जापसालदार धरून तांच्या अण्विक अस्त्रांच्या वापराच्या धमकेक भीक घालनासतना प्रत्युत्तर युद्ध करून दिसले” अशी धमकी मोदीन दिले उपरांतूय पाकिस्तानान जम्मूंत कठुवा, राजस्थानांत बारमेर आनी अमृतसरांत हल्ले चडयिल्ले. पाकिस्तान भिकेक लागला, काबार जाला असो प्रचार देशांत मीडिया करता खरो, पूण फुडल्या दोन वर्सांत तांकां चीना कडल्यान पांचव्या जनरेशनाची J-35 (Stealth)- छपवाछपवी करपी- जेट मेळपाचीं आसात. पाकिस्तानी फायटर पायलट सद्या चीनांत प्रशिक्षण घेतात. आमचीं पांचव्या जनरेशनाची जेटस ताफ्यांत सामिल जातासर धा वर्सा लागतलीं. तो मेरेन राफेल, मिग, जाग्वार, मिराजाच्या भरवशाचेर आमी उरतले हें वास्तव.
आदीच चीन लडाखाचो 38,000 वर्ग कि.मी आनी अरूणाचलाचो 9000 वर्ग कि.मी जमीन गिळून बसला, अरूणाचलांत वसाहत बांदता, नावां बदलता आनी आमी कायच करूंक शकले नात. आयज पाकव्याप्त काश्मिरांत चीनाच्या ‘बेल्ट-रोड’ प्रकल्पाच्यो इमारती, मूलभूत सुविधा, संपत्ती आशिल्ले कारणान पाकिस्तान न्हय तर चीन कडल्यान आमी ताचो ताबो कसो मेळयतले हो व्हडलो प्रस्न आसा.

दीपक लाड
पर्वरी