भांगरभूंय | प्रतिनिधी
केंद्रीय उर्जा मंत्र्यां कडेन बसकेंत प्रस्तावाचेर जाली चर्चा
पणजी : विजेची वाडटी गरज भागोवपा खातीर आण्वीक वीज निर्मिती प्रकल्प स्थापन करपाचो विचार आसा. गोंयांतूय आण्वीक वीज निर्मिती प्रकल्पाच्या प्रस्तावाचेर चर्चा जाली. शक्यता (फीजीबीलीटी) अहवाल तयार जाले उपरांत राज्या कडल्यान योग्य प्रस्ताव येवप गरजेचें आसा, अशें केंद्रीय उर्जा आनी गृहनिर्माण मंत्री मनोहरलाल खट्टर हांणी सांगलें.
केंद्रीय उर्जा आनी गृहनिर्माण मंत्री मनोहरलाल खट्टर हांणी उर्जा आनी गृहनिर्माण वाठाराच्या उदरगतीचेर बसका घेतली. हे बसकेक मुख्यमंत्री डॉ. प्रमोद सावंत, केंद्रीय उर्जा राज्यमंत्री श्रीपाद नायक, वीज मंत्री सुदिन ढवळीकार, नगर नियोजन मंत्री विश्वजीत राणे आनी अधिकारी हाजीर आशिल्ले.
विजेची वाडटी गरज भागोवपा खातीर वीज निर्मितीच्या तरेकवार प्रकल्पांचेर चर्चा सुरू आसा. देशांत सध्या 8 गिगावॉट आण्वीक वीज निर्मिती जाता. 2047 मेरेन 100 गिगावॉट आण्वीक वीज निर्मिती करपाचें उद्दिश्ट आसा. हाका लागून आण्वीक वीज निर्मिती प्रकल्प सुरू करपाचो प्रस्ताव आसा. गोंयांत आण्वीक वीज निर्मिती प्रकल्प सुरू करपा विशीं चर्चा जाली, अशें मनोहरलाल खट्टर हांणी बसके उपरांत सांगलें. गोंय 80 टक्के परस चड वीज भायल्यान खरेदी करता. वीज निर्मितीचे जे मार्ग आसा, तांचो गोंयान विचार करपाक जाय.
हेर राज्यांचे तुळेन वीज पुरवण करपाक गोंय फुडें आसा. वीज वाठारांत गोंयची कामगिरी खूब बरी आसा. गोंयांत विजेच्या गळटीचे प्रमाण (एटी अॅण्ड सी लॉस) राष्ट्रीय सरासरी परस उणें आसून ते 9.32 टक्के आसा. आरडीएसएस येवजणे खाला मुळाव्यो सुविधा तयार करपाक गोंय फुडें आसा. स्मार्ट मिटर बसोवपाक गोंय फाटीं आसलें तरी आतां निविदा जारी जाल्या. हाका लागून स्मार्ट मिटर बसोवपाचो वावर बेगिनूच पुराय जातलो.
राज्याक 50 इलेक्ट्रीक बशी खरेदी करपाक केंद्र मजत करतलें. सौर उर्जे खातीर सोलर टॉप बसोवपाक केंद्र सरकार अनुदान दिता. 2026 – 27 वर्सा मेरेन राज्यांत 22 हजार सोलर टॉप बसोवन पुराय जातलें, अशें खट्टर हांणी सांगलें.
वीज निर्मिती खातीर प्रकल्प, तंत्रज्ञानाचो विचार: मुख्यमंत्री
राज्यांत 99 मेगावॉट सौर उर्जा निर्मिती जाता. वीज निर्मिती खातीर नवे तंत्रज्ञान तशेंच प्रकल्प स्थापन करपाचो सरकार विचार करतलो, अशें मुख्यमंत्री डॉ. प्रमोद सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
