भांगरभूंय | प्रतिनिधी
खुशालकाय ही अमूर्त भावना. मनशांती जाचे कडेन आसा, ताका ती सासणाच्या सासणाक फावो जाता.
सगळ्यांक खुशाल रावूंक जाय. ते खातीर कितलोय त्याग करूंक मनीस तयार आसता. कित्याक खुशालकाय ताची मान्सीक आनी शारिरीक भलायकी सुदारता म्हण तो जाणा. खुशालकायेंत बरे संबंद घटमूट जातात आनी जिवितांत कितें करूंक जाय ह्या उद्देशाची भावना फुडें सरता, हीच भावना मोग, कुटुंब, इश्ट, हांकां सांगाता दवरता आनी मनशाची वैयक्तीक वाड करता. ताच्यांत आव्हानांचेर मात करूंक बळगें निर्माण जाता. ताच्या प्रफुल्लीत मनान दुसऱ्या मुखार उबो रावूंक ताका धीर येता. ताच्यांत आदराची भावना फुलून येता. आनी चड म्हणल्यार ताचें जिवीत सकारात्मक जाता, विधायक विचारांचे भांडार ताच्यांत रीग घेता. खुशालकायेंत अंतर्गत मानसिकताय बळ घेता आनी हांसतें खेळटें जिवीत जगूंक मनशाक प्रेरणा थारता. हाचेर खोलायेन अभ्यास केलो जाल्यार खुशालकाय मेळयतना आमची भोंवतण तशेंच उजव्या- दाव्याक आनी फाटल्या- फुडल्यान आशिल्ल्या मनशाचो विचार जायत काय?
हांव आनी तूं एकसारको? ना. म्हणल्यार म्हजी खुशालकाय आनी तुजी खुशालकाय वेगवेगळी. तिका पळोवपाची नदर वेगळी, तिका भोगपाची क्रिया वेगळी आनी मेळोवपाची? ती पासून वेगळीच. दादल्याची खुशालकाय वेगळी आनी बायलेची खुशालकाय वेगळी. तांतूंत येता खुशालकायेचें प्रमाण, चडाव- उतार आनी मेळोवपाची गती. थोड्यांक सोंपेपणीं खुशालकाय मेळटा जाल्यार थोड्यांक संघर्श करचो पडटा. थोड्यांक संघर्श करुनूय खुशालकाय मेळना. थोड्यांक कांय खिणां पुरती खुशालकाय मेळटा. देखून आपले खातीर खुशालकाय सोदता तशी आपले भशेन दुसऱ्या खातीर खुशालकाय सोदप चुकिचें थारतलें?
मनशाची खुशालकाय खंय आसता? दादल्याक वा बायलेक एक सुंदर सांगाती मेळ्ळ्यार खुशालकाय मेळटा? हीं सांगातीं थोडो वेळ वा जायतो वेळ मौजेन जियेलीं म्हण खुशालकाय मेळटा? दुडवांची रास पांयां कडेन सांपडली वा कोणें तरी हिसपा भायर दुडू दिले म्हण खुशालकाय मेळटा? हय मेळटा, पूण ती खुशालकाय तात्पुरती आसता. तो वेळ पासार जालो, ती खुशालकाय काबार जाता. मनशान सासणीक खुशालकाय जोडूंक जाय. ती मेळना, ती मेळोवंची पडटा. कशी? तिचे खातीर साधना करची पडटा. न्यूटनाच्या गतीच्या तिसऱ्या नेमांत दरेक क्रिये खातीर समान आनी विरुद्ध विक्रिया आसता, म्हणल्यार जेन्ना एक वस्तू दुसरे वस्तूचेर बळ घालता तेन्ना दुसरी वस्तू एकाच वेळार पयल्या वस्तूचेर समान प्रमाणांत पूण उरफाटे दिकेन बळ घालता. हे तरेन जितले साधनेन तूं खुशालकाय मेळोवंक सोदता, तितल्या चड प्रमाणांत ती तुज्या पदरांत पडटा.
युनिव्हर्सिटी कॉलेज लंडनान उजवाडायिल्ल्या द हॅरी’स मॅस्कुलिनिटी रिपोर्टा प्रमाणें बरी नोकरी आसप म्हणल्यार खुशालकाय अशें दादल्यांचें मत आसा. हाची खूब कारणांय तांतूंत नमूद केल्यांत, जशे वरीं बरो पगार, बडटी, सवलती, हुद्दो, वातावरण, पिकनिको, नोकरेचेर मेळपी रेस्पेत आदी. ते जाणा जावंक सोदतात की तांच्या वावराचो कितें तरी उद्देश आसा आनी तांचें योगदान सरळ रितीन आपल्या मिसांवां आनी कामा खातीर फायदो जावंक लागता. दादलो आपल्या कामांत समाधान भोगता तेन्ना ताका दिसता घरांत आनी जिणेच्या हेर सगळ्या आंगांनीय चड खुशालकाय मेळटा म्हण, अशें ह्या अभ्यासांतल्यान स्पश्ट जालां. अशें जर आसा, जाल्यार एक मनीस खूब वेळ नोकरेक दिता तेन्ना तो घरा कडेन कसो वेळ दितलो? आपल्या कुटुंबा सांगाता दोन गजाली केन्ना करतलो? नोकरे वेल्यान थकून घरा आयलो तांतूंत खुशालकाय कसली? बरी नोकरी, बरो पगार हीच खुशालकाय? घरा कडेन येवन पांय सोडूंक मेळनात हीच खुशालकाय? कुटुंब, समाज, इश्ट-मित्र, सोयरीं-नातीं, ह्या गजालींक कांयच म्हत्व ना? एक मनीस ‘वर्कहॉलीक’ जालो जाल्यार ताची भलायकी आनी कुटुंबीक समतोल उरता काय? आयची बायल नोकरी करता. तीय दादल्या भशेन बरे नोकरेंत खुशालकाय आसा अशें चिंतता जाल्यार आनीक कांय काळान मनिसपणाची धडगत उरची ना हें नक्की.
पवित्र पुस्तकांत राजा सोलोमन म्हणटा, “मनशाक जेवपा आनी पियेवपा आनी ताच्या कामांतल्यान ताचो जीव खुशाल जावंचो हाचे परस बरें कांयच ना. हें लेगीत, देवाच्या हातांतल्यान घडलां हें हांवें पळेलां.” म्हणटकच नोकरेक लागून दुडू घरांत येतात ही बरी गजाल, पूण त्या दुडवांनी खुशालकाय भितर येना. जर तुज्या कामांत तुंवें खुशालकाय (दुडू न्हय) सोदली जाल्यार कांय प्रमाणांत खुशालकाय हाताक लागुंयेता. अशें घडूंक मनशान आपल्या जिविताचे यात्रेचेर खोल मंथन करूंक जाय, एकूच घडयेक वा एकाच दिसा न्हय, तर तें सातत्यान चालूच आसूंक जाय. शीत रांदूंक बुडकुल्यांत तांदूळ घाले म्हण शीत जायना, ताचे खातीर खूब तयारी करची आसता. आदन रांदनीर दवरून शीत वाळी पासून एक लांब प्रक्रिया पूर्ण जातकच शीत बशेंत येता. तें कश्टांनी रांदिल्लें जेवण जेवूंक जी खुशालकाय आसता, ती अस्सल खुशालकाय. हे तरेन खुशालकाय मेळवपाचो यत्न जावंक जाय.
हे खातीर मुखेल वावर जावंक जाय तो मन शांत दवरपाचो. आसा तांतूंत खुशाल रावपाचो. करता ते नोकरेंत समाधान मानपाचो. ज्या संवसारांत जियेता, त्या संवसार रचप्यान सगळी खुशालकाय जिविताच्या हुंबऱ्यार हाडून दवरिल्ली आसा, ती फावता जाल्यार मेळटा आनी फावना जाल्यार मेळना. तें दर एकल्याचे करणेचेर आनी वागणुकेचेर धरिल्लें आसा. खंयच्याय धर्माचें पवित्र पुस्तक सांगता, देवाची माण्णी दर एका मनशा खातीर आसा आनी देव आपले माण्णेंतल्यान कोणाक भायरायना. खुशालकाय ही मनशाच्या जिविताचो एक मुखेल भाग आनी देव ती सगळ्यांक दिवंक सोदता. घेवपी ना जाल्यार दिवपी कितें करतलो?
खुशालकाय विकती मेळना. दुसऱ्या कडल्यान घेवन ती तिसऱ्याक दिवंक मेळना. ती स्वतान कमोवंची आसता, मेळोवंची आसता. ते खातीर त्याग-साक्रिफीस करचे आसतात. घोवान बायले खातीर खुशालकाय घेवंक जायना वा बायलेन घोवा खातीर खुशालकाय घेवंक जायना. आपल्या करण्यांतल्यान ती दाखोवंक जाता, मेळोवपाचे रस्ते सांगूंयेतात. खुशालकाय ही अमूर्त भावना. मनशांती जाचे कडेन आसा, ताका ती सासणाच्या सासणाक फावो जाता. बऱ्या करण्यां उदेशीं, दुसऱ्याच्या हुसक्या उदेशीं आनी निस्वार्थी जिविता उदेशीं शास्वत खुशालकाय जोडूंक जाता. आमच्या संवसारी जिविताची हीच मोख न्ही? खुशालकाय मेळोवंक मन मेकळें दवरुंया. कसलीच अपेक्षा धरिनासतना आमचें जिवीत देवाच्या स्वादीन करुंया. देवान म्हाका रचला, तोच म्हजो दातार. हें घडये आमी वळखूंक नासतलें. म्हण आमी खुशालकाये पासून पयस उरूंक शकतात. विचार करुंया.
– विन्सी क्वाद्रूस, राय, साश्ट
मो. – 9822587498
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
