भांगरभूंय | प्रतिनिधी
वादळी वाऱ्याचो पयलो झोड; एकलो जखमी, दोन मोटारींची मोडतोड
भांगरभूंय । प्रतिनिधी
दिवचलः आडवेळो पावस आनी वादळी वाऱ्याक लागून मंगळारा राती आनी पुराय बुधवारा जाल्ले पडझडींत सुमार 5 लाखांचें लुकसाण जालें. मुळगांवां झाड पडून एक स्कुटर चालक जखमी जालो. मयां आनी दिवचले व्हड झाडां पडून दोन मोटारींचें लुकसाण जालें.
सुमार 10- 12 सुवातांचेर पडझड जाल्ल्यान तशेंच गाडयांचेर झाडां पडिल्ल्यान 5 लाखां परस अदीक रुपयांचें लुकसाण जाल्ल्याची म्हायती दिवचल उजो पालोवपी दळ कार्यालयांतल्यान मेळ्ळ्या.
मंगळारा सांजे पासून बुधवारा सांजे मेरेन मातूय विसव घेनासतना उजो पालोवपी दळाचे जवान वावर करताले. खूब कडेन रस्त्याचेर पडिल्लीं झाडां कुशीक काडून तांणी येरादारीक मार्ग मेकळो करून दिलो.
मयां कुमारवाड्यार स्विफ्ट मोटारीचेर तशेंच बोड्ड्यां दिवचले विपूल गडेकार हांचे गाडयेर झाड पडिल्ल्यान व्हड लुकसाण जालें. पाळी, दिवचल, मुळगांव, बोड्डें, न्हावेली वाठारांत लेगीत झाडां पडून लुकसाण जालें. बुधवारा सकाळीं मुळगांवां झाड पडिल्ल्यान एक स्कुटर चालक रहमान पाशा हो जखमी जालो. झाड पडलें तेन्ना रस्त्या वयल्यान गाडयो येता- वताल्यो. मात सुदैवान अनर्थ टळ्ळो. ह्या वेळार कांय वेळ येरादारी आडावली. मंगळारा रातीं कारापूरा रस्त्यार झाड पडिल्ल्यान वरभर येरादारी आडावली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
