आडवेळ्या पावसान केलीं शेतां आडवीं

भांगरभूंय | प्रतिनिधी

सांखळी, मयेंचे शेतकार सांपाडले त्रासांत, केली मजतीची मागणी

भांगरभूंय । प्रतिनिधी

दिवचल : दिवचल म्हालांत अंदूं शेतां बरी पिकिल्लीं. पूण आडवेळ्या पावसान लुवणेक तयार आशिल्लीं शेतां आडवीं उडयलीं. 70 ते 80 टक्के शेतां उदका पोंदां गेल्ल्यान शेतकारांच्या कश्टांचेर उदक रकलें. शेतकारांक तत्काळ अर्थीक मजत दिवपा संबंदांत शेतकी खात्यान शेतांची पळोवणी करून लुकसाण भरपाय दिवपा संबंदांत फाटपुरवण करपाची मागणी शेतकारांनी केल्या.

मायणा नावेलीचीं सुमार 20 हॅक्टर भातशेतां लुवणेक तयार आशिल्लीं. आडवेळ्या पावसान धुमशेण घातिल्ल्यान शेतांत व्हड प्रमाणांत उदक घुसलां. 90 टक्के शेतां आडवीं पडिल्ल्यान आनी तांकां कणस आयिल्ल्यान व्हड प्रमाणार शेतकारांक लुकसाण सोंसचें पडटलें, अशें दिवचल म्हाल शेतकी उत्पादक संघाचे अध्यक्ष विश्वंभर गांवस हांणी सांगलें. सरकारान ताकतिकेन पंचनामे करून घेवचे आनी गरजेची मजत दिवन शेतकारांक मजत दिवची, अशें तांणी मागलां.

मजगतीं, मयेंचे प्रगतशील शेतकार सखाराम पेडणेंकार हांणी सांगलें, मयें वाठारांतली 70 ते 80 टक्के शेतां आडवीं पडिल्ल्यान आनी शेतांत उदक सांचिल्ल्यान शेतकारांक व्हड लुकसाण जालां. सरकारान हाची तत्काळ दखल घेवची.

मयें वाठारांत खूब लोक वायंगण रोयतात. अंदूं भात पिकाचें उत्पन्न बरें येतलें अशें दिशिल्लें, पूण पावसान घात मारिल्ल्यान शेतकारांचें संकश्ट कोसळ्ळां, अशेंय पेडणेंकार हांणी सांगलें.

दिवचल म्हालांतल्या साळ, मेणकुरें, लाटंबार्से, नावेली, नार्वे, मुळगांव, सुर्ला आनी हेर वाठारांतल्या शेतांचेर पावसाक लागून हावळ आयल्या. हे संबंदांत शेतकी अधिकाऱ्यांनी ताकतिकेन पळोवणी करची, अशी मागणी शेतकार करतात.

मजगतीं, भाजप किसान मोर्चाचे अध्यक्ष विश्वास चोडणकार हांणी सांगलें, पावसाक लागून शेतांचें व्हड प्रमाणांत लुकसाण जालां. सरकार दरबारांत हो प्रस्न मांडून लुकसाण भरपाय दिवपा खातीर निश्चीत मागणी करतलों.

मुख्यमंत्र्यान घेतली दखल

दिवचल म्हालांत तशेंच गोंयांत विवीध वाठारांनी आडवेळ्या पावसाक लागून भातशेतीचें लुकसाण जासा. ते संबंदांत आपणे शेतकी अधिकाऱ्यांक तलाठ्या वरवीं शेतांची पळोवणी करून लुकसाणीचो अहवाल सादर करपा संबंदांत सुचोवणी करतलो, अशें मुख्यमंत्री डॉ. प्रमोद सावंत हांणी आयतारा प्रतिनिधी कडेन उलयतना सांगलें.