भांगरभूंय | प्रतिनिधी
समाजसेवक म्हणटकच आदल्या तेंपार लोक त्या मनशाक सामके आदरान पळयताले. मात हालींच्या काळांत समाजसेवक म्हणल्यार एक धोंगी, मनांत भलतोच हेतू दवरुन काम करपी मनीस समजतात. ताका घडये राजकारणांत वचून पयसो करपाचो आसा, अशेंय लोकांक दिसता. खरें पळोवंक गेल्यार समाजसेवेंत अर्थीक गजाल येना. ती आयली जाल्यार ती समाजसेवा कसली जाली? कसलीय सेवा मनांत कांयच अपेक्षा दवरिनासतना निसुवार्थी मनान करतात ती खरी सेवा. जर पयशे करपाक वा वळख जावन आपल्याक कोणेतरी पंचायत, पालिका, विधानसभे खातीर वेंचून दिवचो म्हणू कोण समाजीक काम करता जाल्यार ताका तुमी समाजसेवा कशे म्हणटले? डाॅ. सर्वानंद देसाय हे समाजसेवा करताले, पूण पयशां खातीर न्हय, तर गरीब, पिडेस्त लोकांक ते पावताले. देखून शिक्षक जावचे पयलीं ते बातमीदार जाले. ही जापसालदारकी पेलतना तांकां समाजसेवा करीन दिसली. मागीर खाशेले अधिकारी म्हूण तांची नेमणूक जाली. ते पीए म्हणूनय काम करपाक लागले. त्याच सुमाराक ते शाळेंत शिकयतालेय.
निसुवार्थी वृत्तीचे डाॅ. देसाय हांकां शिकयतना लक्षांत आयलें की बदलत्या वातावरणात समाजसेवा करपाकूय शिक्षण जाय. मागीर तें शिक्षण पुराय केलें. तांणी बातमीदार म्हूण दोन दिसाळ्यांनी काम सुरू केलें. त्या वेळार गरिबां कडेन संबंदीत कितल्योश्योच खबरो येताल्यो. तेन्नाच्यान तांकां तांचे खातीर कितें तरी करचें अशें दिसलें. ते समाजसेवा करपाक लागले. तांचें हें कार्य पळोवन गोंय सरकारान तांकां खाशेले अधिकारी म्हूण नेमले. उपरांत तांचें गरिबां खातीरचें धडाडीचें काम पळोवन तांकां एका मंत्र्याचो पीए जावपाची पसून संद मेळ्ळी. हें सगलें फक्त तांचे समाजसेवे खातीर जालें.
हें सगलें करतना डाॅ. देसाय हांणी आपलें शिकप बंद दवरूंक ना. तांणी पी एचडी मेरेन शिक्षण घेतलें. ताका लागून तांकां काॅलेजूय न्हय, तर विद्यापीठांत पसून सहज काम करूंक मेळटा. ते सांगतात, ‘समाजसेवा करपाक तुमी एनजीओ सुरू करून जोडूंक लेगीत शकतात. एखादे समाजीक संस्थेंत सल्लागार म्हूण काम करपाक शकात.’ हाचें शिक्षण गोंयांत मेळटा. पणजेच्या डाॅन बाॅस्को म्हाविद्यालयांत ही सुविधा आसा. तुमकां जर दुसरें खंयचे म्हाविद्यालय, विद्यापीठ जाय जाल्यार सर्च करूं येता. सोशल वर्क एज्युकेशन अशीं उतरां टायप करून पळयात, जायते पत्ते मेळटले.
डाॅ. सर्वानंद देसाय हे शेतांतूय रमतात. नवी पिळगी शेतां, कुळागरां कडेन कशी वळटली, हाचो विचार ते करतात. सरकाराच्यो घे म्हूण येवजण्यो आसात. लागींच्या शेतकी खात्याच्या कार्यालयांत गेल्यार ते तुमकां सांगपाक शकतात. उदकाची तजवीज आसा, पूण जमीन वा शेत ना जाल्यार ल्हानशें पोरसूं करूं येता. एकदां काय तुमकां हाची आवड लागली काय तुमी ह्या मळाचेरुय स्वताच्या पांयांचेर उबें कशें रावप, हाचो विचार करतले. नोकरेची पसून गरज ना, इतलो पयशो शेत, भाट, पोरसांत आसा. इझ्रायला सारको देश जंय पावस उणो पडटा, थंय पसून लोकांनी नवे तंत्रज्ञान वापरून वाठार पांचवोच केला. जर ते करपाक शकतात जाल्यार आमी कित्याक ना? जांकां शक्य आसा, तांणी ह्या देशाक मुद्दाम भेट दिवची. सादी पोपाय घेवया. जी तुमी पोरसांत सहज पिकोवं शकता. निरपणसाचें झाड पसून लावंक शकता. गांवठी पोपाय 70 रुपया वयर तर नीरपणस उणोच देडशें रुपयांक खपता. बाजारांत तांकां बाराय म्हयने मागणी आसता.
गोंयांत आतां व्हेटर्नरी, शेती, फार्मसी सारक्यो काॅलेजी सुरू जाल्यात. खाजगी विद्यापीठांय सुरू जायत आसात. पारुल विद्यापीठ बेतूल गांवांत सुरु जालां. आमचें एकसुरें गोंय विद्यापीठ विद्यार्थ्यां खातीर जायते अभ्यासक्रम शिकयता. संस्कृत भाशा आसूं वा हेर कसलीय तुमकां ती परकी आसा म्हूण वायट धरचें न्हय. तुमकां आयकून अजाप दिसतलें, दुसऱ्या धर्माचेर विदेशी लोक ह्यो भाशा शिकतात. हातूंत आमी आमचेंच लुकसाण करून घेतात. ह्या भाशांतल्या साहित्याचो अणकार केल्यार बरीच म्हायती मेळपाक शकता. गोंयांत खांडोळें सरकारी म्हाविद्यालयांत अणकारा खातीर पदविका अभ्यासक्रम आसा. ताचो विद्यार्थ्यांनी फायदो करून घेवपाक जाय. अणकाराच्या मळाचेर खूब संद आसा. तुमी प्रकाशन, छपाई वेवसायूय करपाक शकतात.
डाॅ. रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
