भांगरभूंय | प्रतिनिधी
मुख्यमंत्री : सिलिंडरा खातीर रांको लावं नाकात
भांगरभूंय । प्रतिनिधी
पणजी : गोंयांत एलपीजीचो फावोसो सांठो आसा. उणाव जातलो ह्या भंयान लोकांनी सिलिंडरा खातीर रांको लावच्यो न्हय. आठ दीस पासियेंस काडात. आठ दिसां भितर सगळें जाग्यार घालपाचे यत्न करता, अशें मुख्यमंत्री डॉ. प्रमोद सावंत हांणी शुक्रारा सांगलें.
ऑनलायन बुकींग केले उपरांत 25 दिसांनी घरगुती सिलिंडर गोंयकारांक मेळटलो. सिलिंडराच्या उणावाक लागून सिलिंडराचें वांटप 20 टक्के जातलें. उद्देगीक वापराच्या सिलिंडराचेर मात बंदी आसतली, अशें मुख्यमंत्र्यान सांगलें.
अमेरिका- इझ्रायल आनी इराण हांचे मदीं चालू आशिल्ल्या झुजाक लागून हेर राज्यां भशेन गोंयांत सध्या एलपीजी सिलिंडराचो उणाव आसा. वेवसायीक सिलिंडर मेळा नाशिल्ल्यान हॉटेलां बंद जावपाक लागल्यांत. कांय हॉटेलांनी मेनूंतले खाद्यपदार्थ उणें केल्यात. हे फाटभुंयेर मुख्यमंत्री डॉ. सावंत हांणी शुक्रारा उंचेल्या पांवड्या वयली बसका घेतली. हे बसकेक मुखेल सचिवा सयत अधिकारी तशेंच ऑयल कंपन्यांचे प्रतिनिधी हाजीर आशिल्ले.
पयलींच्या कोट्याची जी नोंद आसा, ताच्या 20 टक्के वेवसायीक सिलिंडरांचें वांटप जातलें. केंद्रा कडल्यान वेवसायीक एलीजी वांटपा विशीं नव्यान निर्देश आयले उपरांत ते प्रमाण कार्यवाही जातली. उद्देगीक सिलिंडरांचें वांटप मात बंद जातलें, अशें मुख्यमंत्र्यान सांगलें. दरेका म्हालांत दर दिसा नागरी पुरवण खात्याचे समन्वय अधिकारी एलपीजी सिलिंडरांच्या सांठ्याचो नियाळ घेतले. दर दिसा ते नागरी पुरवण खात्याच्या सचिवाक अहवाल सादर करतले. लोकांनी आदार केलो जाल्यार सगल्यांक एलपीजी सिलिंडर मेळटले. जांचे कडेन दोन, तीन कनेक्शनां आसात, तांणी सिलिंडरांचो सांठो करून दवरचो न्हय, असो उलो मुख्यमंत्री डॉ. सावंत हांणी मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
