भांगरभूंय | प्रतिनिधी
हालीं अपघातांचें सत्र चालूच आसा. फाटल्या आठ दिसांक जाल्ल्या चार अपघातांनी ६ जाणांक मरण आयलें. बुधवारा पाड्डी-बार्शें वाठारांत बशीच्या धपक्यान दोगांक मरण आयिल्लें. ही खबर ताज्जी आसतनाच शेनवारा आनीक एक अपघात घडलो. हातूंत पेडणेंच्या एका तरणाट्याक मरण आयलें. तर आयज आमी फाटल्या आठ दिसांक घडिल्ल्या अपघातांचेर घालुया एक नदर.
फाटलें सप्तकभर जायते अपघात घडले. हातूंत जायत्या जाणांक मरणूय आयलें. फाटल्या आयतारा १३ एप्रिलाक नद्रण-मोल्यां रस्त्या कुशीक पार्क केल्ल्या ट्रकाक मोटार सायकलीन धपको दिल्ल्यान दोगां कर्नाटकांतल्या तरणाट्यांक मरण आयलें. राजेश देसाय आनी निखील मडिवाळ अशीं तांचीं नांवां. हे दोगूय तरणाटे गोंयांत युनिकॉम कंपनींत कामाक आशिल्ले. आयतारा ते कांय कामा खातीर आपल्या घरा वताले. तेन्ना जाल्ल्या ह्या अपघातांत त्या दोगांयनी आपलो जीव वगडायलो.
तशेंच १६ एप्रिलाक सुपाची पूड, हरवळ्यां दोन मोटार सायकलीं मदीं अपघात जावन सोलयें-सत्तरीच्या संदीप गावडे हाका मरण आयलें. तशेंच ह्याच दिसा पाडी बार्शें वाठारांत रातच्या वेळार बशीचो धपको बसून गंभीर जखमी जाल्ले दिलीप वेळीप आनी संदेश गांवकार हांकां मरण आयलें.
जाल्यार १९ एप्रिलाक न्हंयबाग, पोरस्कडेंच्या भगवान उत्तम कासकार हांकां साताराक मध्यानराती कडेन आपघात जावन मरण आयलें. भगवान हांचो वीस तारखेर वाडदीस आशिल्लो. त्या निमतान शिर्डी साईबाबाचें दर्शन घेवचे खातीर भगवान आपल्या तीन इश्टां सयत १९ तारखेर शिर्डीच्या प्रवासाक भायर सरलो.
रातच्या ११ :३० वरांचेर सातारा एका रस्त्या कुशीकच्या हॉटेलांत ते सगले जेवले. थंयच वाडदिसाची केकूय कापली. उपरांत जंय तांणी आपली गाडी पार्क केल्ली थंय वतना एक ट्रॉली वेगान आयली. ते ट्रॉलीन पयलीं एका लायटीच्या खांब्याक धपको दिलो. खांब्याक धपको दिनाफुडें ती ट्रॉली उमथली आनी भगवान कांसकार ट्रॉली पोंदा चिड्डलो. हातूंत ताका जाग्यारूच मरण आयलें. मात ताचे वांगडा आशिल्ले हेर तीग इश्ट वाटवले. सांतारा पुलिसांनी हे घडणुकेचो पंचनामो केलो.
भगवान रेंव वेवसायांत बारीक सारीक कामां करतालो. चार भयणी आनी भगवान हो ल्हान भाव आशिल्ल्यान तो कासकार कुटुंबाचो आदार आशिल्लो. मात ताचेर काळान घालो घालो. हे घडणुकेन पुराय कांसकार कुटूंब तशेंच पोरस्कडें वाठारांत दुख्ख पातळ्ळां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
