भांगरभूंय | प्रतिनिधी
पणजी: नगरनियोजन कायद्याचें कलम 39 ए रद्द करपा खातीरच्या आंदोलना वेळार राज्यातल्या विरोधी पक्षांचो एकवट दिश्टी पडलो. आंदोलनांत सगले विरोधी पक्ष वांटेकार जालेच, ते भायर येत्या ते वेंचणुकेंत तांणी विरोधकांच्या आघाडेची गरज उक्तायली.
फाटले विधानसभा वेंचणुके वेळार काँग्रेस आनी गोवा फॉरवर्ड पक्षा मदीं युती जाल्ली. आरजी, आप हांणी मात स्वतंत्रपणान वेंचणूक लडयिल्ली. हालींच जाल्ल्या जिल्हो पंचायत वेंचणुकेंत लेगीत निमाण्या वेळार आरजी – काँगेस युती फिसकटली. आम आदमी पक्षान पयलींच स्वतंत्रपणान वेंचणूक लडोवपाचो निर्णय घेतिल्लो. विरोधकां मदीं मतभेद आशिल्ल्यान निमाण्या वेळार युती फिसकट्टा असो अणभव आसा.
आझाद मैदानार सगल्या विरोधी पक्षांचे आमदार तशेंच फुडारी हाजीर आशिल्ले. आपाचे आमदार वेंझी व्हिएगश तशेंच आरजीचे मुखेली मनोज परब हांणी विरोधकांच्या युतीची गरज उक्तायली.
गोंय वाटावपा खातीर येत्या ते वेंचणुकेंत विरोधकांची युती जावपाची गरज आसा. आमच्या पक्षाच्या फुडाऱ्यांक युती नाका आसली जाल्यार लेगीत युती गरजेची आसा, ही गजाल आमी पटोवन दितले, अशें वेंझी व्हिएगश हांणी सांगलें. विरोधी पक्षांची युती जाली जाल्यारूच भाजप सरकाराक हारोवप सोंपें जातलें, अशें वेंझी व्हिएगस हांणी सांगलें. जिल्हो पंचायत वेंचणुकेंत स्वतंत्र वेंचणूक लडोवपाचो निर्णय आम आदमी पक्षान पयलींच घेतलो. आतां मात आपाचो आमदार विरोधकांची युती जाय, अशें जाहीर उलाेवप करता.
आरजी पक्षाक लेगीत विरोधी पक्षांची युती जाल्ली जाय. हे खातीर दरेका पक्षान युती विशीं धोरण स्पश्ट करपाची गरज आसा. आमदाराक युती जाय आनी तांच्या पक्षाक युती नाका, जाल्यार त्या आमदारांनी आरजीत प्रवेश करचो अशें आवाहन आरजीचे मुखेली मनोज परब हांणी केलें.
काँग्रेस विधीमंडळ फुडारी युरी आलेमांव हांणी लेगीत युतीची गरज उक्तायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
