भांगरभूंय | प्रतिनिधी
मुंबय, समिप नार्वेंकार ः आग्वाद किल्ल्यार आशिल्ल्या लायट हावजाक (फोलेर) नवें रूप मेळटलें. सद्या २ कोटी रुपया खर्चून ताच्या सोबीतकरणाचें काम चल्लां. बेगेनूच हो फोलेर पर्यटकां खातीर उक्तो जातलो, अशें दीपगृह महासंचालक नटराज मुरूगानंदम हांणी सांगलें.
गोरेगांव मुंबय घडोवन हाडिल्ल्या इंडीया मॅरीटायम सप्तकांत दीपगृह संचालनालयान आपलें दालन उक्तें केलां. ह्या वेळार गोंयच्या फोलेरा विशींची म्हायती दीपगृह संचालक मुरूगानंदम हांणी भांगरभूंय कडेन उलयतना दिली.
पर्यटनाचे नदरेत गोंय हें लायट हावसाचे उदरगती खातीर म्हत्वाचें थळ आसा अशें, तांणी सांगलें.
भारतांतलो पयलो लायट हावस महोत्सव हो गोंयच्या आग्वाद किल्ल्याचेर जाल्लो. हातूंत गोंयच्या लोकांचें आनी सरकाराचें सहकार्य मेळून ही कार्यावळ खूब येसस्वी थारली. हे कार्यावळीचो एक फुडलो भाग म्हण आमी रु. २.८ कोटी खर्चून आग्वाद फोलेराचें उदरगतीचें काम हातांत घेतलां आनी बेगीनूच नवें लायट हावस पर्यटक तशेंच लोकांक उक्तें जातले, अशी म्हायती मुरूगानंदम हांणी दिली.
राज्यांत दीपगृह संचालनालायाच्या मालकीचे दोन लायट हावस आसात- आग्वाद आनी बेतूल. आग्वाद लायट हावसाक म्हयन्याक सरासरी २५ ते ३० हजार इतले पर्यटक भेट दितात, अशें दीपगृह संचालनालयाचे उप संचालक दिग्विजय सिंह हांणी सांगलें.
कांपाल लायट हावसांत येतले उणे पर्यटकः मुरूगानंदम
पणजे मांडवी न्हंये देगेवेल्या कांपाल फोलेराची उदरगत करपाची मागणी गोंय सरकारान दीपगृह महासंचालका कडेन केल्ली. आमच्या पंगडान ते सुवातेर वचून सर्वेक्षण करपाक सुरवात केल्या. मात पर्यटनाचे नदरेन ह्या लायट हावजाची उदरगत करपा खातीर आमी कुशीकच सुवात दिवपाची मागणी केल्ली. मात राज्य सरकारान सुवात दिवपाक न्हयकार दिला. देखून आमी फकत फोलेर आनी फकत एन्ट्री पॉयंटाची उदरगत करतले. मात इतलेंच काम केल्यार उणे पर्यटक ह्या फोलेराक भेट दितले, अशें मुरूगानंदम हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
