भांगरभूंय | प्रतिनिधी
आग्रा, खबरां संस्था ः आयकर पंगडान आग्रांतल्या 3 बूट वेपाऱ्यांच्या घरांचेर धाड घाली. एका वेवसायीकाच्या घरांतल्यान 60 कोटी रुपयांच्यो नोटी जप्त केल्यात. त्यो खाट, गादयो आनी आलमारींत लिपोवन दवरिल्ल्यो. तशेंच जमनीर आशिल्ल्या पोतयांनीय आशिल्ल्यो.
हरमिलाप ट्रेडर्स हे कंपनीचे धनी रामनाथ डांग हांच्या घराचेर 30 वरां सावन धाड चालू आसा. तांतूत ताच्या घराच्या खाटींत आनी गादयेंत नोटींची बंडलां मेळ्ळी. व्हड प्रमाणांत रोख रक्कम पळोवन अधिकाऱ्यांनी नोटी मेजपा खातीर बँके कडल्यान 10 मशीनां मागयलीं. शेनवारा सांजवेळा सावन ही कारवाय चालू आसा. रोख आंकडो आनीक वाडूंक शकता अदमास आसा. नोटींची मेजणी अजून (सोमारा सकाळ मेरेन) चालू आसा अशें आयकर खात्यान सांगलें. ह्यो नोटी मेजतना भोवतेक आयकर कर्मचारी थकले. तांची न्हिदपाची वेवस्था मागीर थंयच केली.
कर चोरयेची म्हायती मेळ्ळ्या उपरांत येणावळ कर पंगडांनी शेनवारा आग्रांतल्या तीन वेवसायीकांच्या घरां आनी कार्यालयांचेर धाड घाली. एमजी रोडांतल्या बीके शूज, ढाकरणांतल्या मंशू फुटवेअर आनी हेंग की मंडी हांगाच्या हरमिलाप ट्रेडर्स ह्या कंपनीच्या मालकाच्या कार्यालयांत आनी घरांत एकाच वेळार पंगडांनी धाड घाली.
जमनींत व्हड गुंतवणूक आनी भांगर खरेदी हांचे विशींय म्हायती वेवसायिकांकडल्यान मेळ्ळा. आग्रांतल्या इनर रिंग रोडा लागसार वेवसायिकांनी व्हड प्रमाणांत गुंतवणूक केल्या. तिनूय बूट वेपाऱ्यां कडल्यान अधिकाऱ्यांनी लॅपटॉप, संगणक आनी मोबायल जप्त केल्यात. पावती आनी बिलां सयत स्टॉक रेजिस्टराची तपासणी केली तेन्ना धक्कादायक म्हायती मुखार आयल्या. फुडलो तपास सुरु आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
