भांगरभूंय | प्रतिनिधी
पणजी : काणकोण म्हालांतलो आगोंद हो गांव सैमान नटला. हांगच्या रानांत रानवटी जनावरां, सवण्यांचो आवाज सेगीत आयकुपाक येता. तशीं जनावरां जायते फावट नदरेकूय पडटात. अशींच काल हांगच्या सरकारी मुळाव्या शाळेच्या पांख्यार जेवण आनी उदकाच्या दोन रान माजरां पावलीं. तीं रातभर थंय रावली. थंयच्यान तांकां वचपाक मेळूंक नाशिल्ल्यान तांणी आवाज केलो. ह्या आवाजाक लागून हांगच्या शिक्षकां मदीं भंय निर्माण जालो. उपरांत तांणी रोखडीच हे विशीं रान खात्याच्या अधिकार्यांक म्हायती दिली.
दोन रान मांजरां विशीं रान अधिकार्यांक म्हायती मेळटांच अधिकार्यांनी येवन पळोवणी केली. शाळेचो वाठार तपासले उपरांत तांकां थंय दोन सिव्हेट माजरां मेळ्ळीं. रान विभागान तांकां धरपा खातीर रोखडोच सांपळो रचलो. सांपळो लायले उपरांत एक मांजर पिनर्यांत आडकलें. जाल्यार दुसरें माजर रानांत पळून गेलें.
शाळे भोंवतणी व्हड झाडां आशिल्ल्यान, जनावरां खांदयां वयल्यान पांख्याचेर पावपाक शकतात. हाका लागून फुडाराक अश्यो घडणुको जावच्यो न्हय म्हणून कांय झाडां कापपाचो विचार करपाची मागणी शिक्षकांनी रान विभागा कडेन केल्या. धरिल्ल्या सिव्हेट माजराक रान विभागाच्या ताब्यांत दिलां. ह्या माजराक शाळे पसून पयस सुरक्षीत अंतराचेर व्हरून सोडटले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
