भांगरभूंय | प्रतिनिधी
पैंगीण: आगोंद- काणकोणा बसीक उजो लागलो. हातूंत बस लासून गोबर जाली.
हे विशीं चड म्हायती प्रमाण, मडगांवचे सूर्या साळगांवकार हे पर्तगाळ वचपी भाविकांक दाबोळी एअरपोर्टा वेल्यान घेवन गेल्ले. सगल्या प्रवाशांक आगोंदा तांच्या हॉटेलार पावोवन ते परत मडगांवां येताले. उपरांत ते आपली बस आगोंद मैदाना लागसार पार्क करून आपल्या इश्टा कडेन उलोवपाक रावले. थंय पार्क केल्ले बसींतल्यान ताका धुंवर येतना दिसलो. उपरांत मैदाना कडेन पार्क केल्ले ते बसीक ल्हव उजो पातळ्ळो आनी पुराय बस लासून गोबोर जाली.
हे विशीं म्हायती मेळटांच उजो पालोवपी दळाच्या जवानांनी येवन हो उजो पालयलो.
मजगतीं, सकाळीं आगोंद हॉटेलार सोडिल्ल्या प्रवाशांक पर्तगाळ सोडपाचें आशिल्लें. ताका लागून आगोंदा बसींतूच न्हिदपाचो निर्णय चालकान घेतिल्ल्याची म्हायती सुत्रां कडल्यान मेळ्ळी. हे घडणुकेंत कोणाक कांय जावंक ना. मात बसीचें बरेंच लुकसाण जालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
