भांगरभूंय | प्रतिनिधी
पणजी : काणकोणच्या आगोंद दर्यादेगेर आशिल्ल्या कांसव संवर्धन वाठारांतलीं जायतीं आस्थापनां निर्धारीत नेम पाळिनासतना कार्यरत आशिल्ल्याचें कारण दिवन बंद करपाचे निर्देश उच्च न्यायालयान दिल्ले. मजगतीं, हांगा कार्यरत ४ आस्थापनांच्या धनयांनी याचिका दाखल करीत तांचे कडेन आशिल्ले सगले वैध परवाने उच्च न्यायालया मुखार सादर केले. परवाने आनी हेर कागदपत्रांची पडताळणी केले उपरांत उच्च न्यायालयान हीं चार आस्थापनां २४ वरांनी उक्तीं करपाचे निर्देश दिले.
मजगतीं, जीसीझेडएमए वरवीं ह्या चार आस्थापनांक जी कारणां दाखयात नोटीस जारी केल्या, ती तीन म्हयन्यांनी तडीक लायतले. तशेंच, ह्या चार सोडून हेर आस्थापनांनी जीसीझेडएमएकडेन येवन, आपलें म्हणणें मांडून कागदपत्रां सादर करचीं. निर्धारीत मानकां प्रमाण हीं कागदपत्रां योग्य आसल्यार, आठ दिसां भितर हीं आस्थापनां उक्तीं करतले. मजगतीं, उच्च न्यायालयान हे विशींची फुडली सुनावणी चार सप्तकांनी मुखार धुकल्ल्या.
आगोंदाच्या दर्यादेगेर दर वर्सा व्हडा प्रमाणांत दुर्मीळ प्रजातीचे ऑलिव्ह रिडले कांसव तांतयां घालतात. मजगतीं ह्या वाठारांत आस्थापनांय कार्यरत आशिल्ल्यान आवाजाचें प्रदुशण आनी हेर कारणांक लागून हांगा येवपी कांसवांक आनी तांच्या तांतयांक त्रास जावपाची शक्यताय आसा. हीं आस्थापना बंद करचे खातीर उच्च न्यायालयांत एक याचिका दाखल केल्ली. १९ मार्चाक ताचो निकाल लागला. ह्या अतिसंवेधनी वाठारांत कार्यरत आसपी वट्ट ६३ वेवसायीक आस्थापनांक २४ वरांनी बंद करपाचे आदेश उच्च न्यायालयान ह्या वेळार दिल्ले.
मजगतीं, ११ मार्चाक, उच्च न्यायालयाच्या सुनावणे मजगतीं, प्रदूशण नियंत्रण मंडळान संबंदीत वाठारांतल्या अस्थापनांकडेन वेवसाय सुरू दवरपा खातीर गरजेचो परवानो नाशिल्ल्याची म्हायती दिली. हाची दखल घेवन, उच्च न्यायालयान ही आस्थापनां सील कपाचो निर्णय दिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
