भांगरभूंय | प्रतिनिधी
सुवातेचेरूच मरण; बायल, पूत गंभीर जखमी, चालकाक अटक
भांगरभूंय । प्रतिनिधी
पणजी/ म्हापशेः आयतारा 29 डिसेंबराक सांजेच्या 6 वरांच्या सुमाराक आगशी बाजार वाठारांत थार जीप आनी दोन दुचाकी हांचे मदीं भिरांकूळ अपघात जालो. ह्या अपघातांत दुचाकी चालक राजेश देवीदास नायक (39. रा. वरुणापुरी- वास्को) हाका मरण आयलें. ह्या प्रकरणांत आगशी पुलिसांनी थार जीप चालक विल्सन आरावजो (सांताक्रूज) हाचे आड गुन्यांव दाखल करून अटक केली. तशेंच म्हापशें कुचेली वाठारांतल्या एमआरएफ प्रकल्पा कुशीक दोन मोटरसायकलीं मदीं जाल्ल्या अपघातांत शेनवारा रातीं 26 वर्सां पिरायेच्या आरोन फर्नांडीस (मायणा- शिवोली) हाका मरण आयलें
आगशी पुलिसांनी दिल्ले म्हायती प्रमाण, आगशी बाजार वाठारांत आयतारा 29 डिसेंबराक सांजेच्या 6 वरांच्या सुमाराक थार जीप आनी दोन दुचाकी हांचे मदीं भिरांकूळ अपघात जाल्ल्याची म्हायती पुलीस नियंत्रण कक्षाक मेळिल्ली. ही म्हायती कक्षान पुलिसांक दिली. ते प्रमाण पुलीस निरिक्षक अनंत गांवकार हांच्या मार्गदर्शना खाला उपनिरिक्षक ऋषिकेश रायकार, हवालकार सुनील मुळगांवकार आनी हेर पुलिसांनी घडणुकेचे सुवातेर धांव मारली. तशेंच अपघाताची म्हायती मेळटाच 108 अॅम्ब्युलन्स आनी पुलीस नियंत्रण कक्षाची गाडी घडणुकेचे सुवातेर पावली. त्या वेळार थार जिपी पोंदा दोन दुचाकी सांपडिल्ल्याचें मुखार आयलें.
ह्या वेळार अपघाताचे सुवातेर एकठांय जाल्ल्या लोकांनी जिपी पोंदां सांपडिल्लो दुचाकी चालक राजेश देवीदास नायक, ताची घरकान्न आनी तांचो दोन वर्सांच्या पुताक भायर काडलो. ह्या वेळार राजेश नायक हाका सुवातेचेरूच मरण आयिल्ल्याचें 108 अॅम्ब्युलन्सीच्या दोतोरांनी घोशीत केलें. जाल्यार ताची घरकान्न आनी पुताक बांबोळेच्या गोंय वैजकी म्हाविद्यालयाच्या हॉस्पिटलांत उपचारा खातीर व्हेले. थंय तांचेर उपचार चालू आसात. नायक हांच्या पुताचे तकलेक गंभीर दुखापत जाल्ल्यान ताचेर राती उसरां ऑपरेशन केलें, अशी म्हायती मेळ्ळ्या.
मजगतीं, आगशी पुलीस हवालदार सुनील मुळगांवकार हांणी अपघाताचो पंचनामो केलो. थार जीप कुठ्ठाळीच्यान पिलारचे दिशेन येताली. आगशी बाजार वाठारांत पावताच जीप चालकान चुकीचे दिशेन वचून रस्त्याचे कुशीक पार्क केल्ल्या दोन दुचाकींक धपको दिलो. त्या वेळार राजेश नायक आपल्या कुटुंबा सयत थंय दुचाकीचेर उबो आशिल्लो. त्या वेळार थार जिपीन धपको दिल्ल्यान ताची तशेंच आनीक एक दुचाकी जिपी पोंदां सांपडली. तातूंत राजेश नायक हाका मरण आयलें.
ह्या प्रकरणांत निरिक्षक अनंत गांवकार हांच्या मार्गदर्शना खाला उपनिरिक्षक ऋषिकेश रायकार हांणी थार जीप चालक विल्सन आरावडे हाचे आड गुन्यांव दाखल करून अटक केली.
कुचेली अपघातांत एकल्याक मरण, दुसरो गंभीर
म्हापशें कुचेली वाठारांतल्या एमआरएफ प्रकल्पा कुशीक दोन मोटरसायकलीं मदीं जाल्ल्या अपघातांत शेनवारा रातीं 26 वर्सां पिरायेच्या आरोन फर्नांडीस (मायणा- शिवोली) हाका मरण आयलें जाल्यार ऋग्वेद गाडगीळ (21. रा. कुंकळ्ळी) गंभीर जखमी जालो. जखमीचेर बांबोळेच्या गोंय वैजकी म्हाविद्यालयाच्या हॉस्पिटलांत उपचार चालू आसात.
पुलिसांनी दिल्ले म्हायती प्रमाण फर्नाडीस आनी गाडगीळ आपापले दुचाकी वयल्यान शिवोले- सडये कुचेली वटेन वताले तेन्ना हो अपघात जालो. एमआरएफ शेडी कुशीचे देंवतेर तांचो दुचाकी वयलो ताबो गेलो आनी तांचो एकामेकाक धपको बसलो. फर्नांडीस हाची दुचाकी रस्त्या कुशीचे वण्टीक आपटली, जाल्यार गाडगीळ रस्त्यार पडलो. दोगांकूय ताकतिकेन उत्तर गोंय जिल्हो हॉस्पिटलांत उपचारा खातीर व्हेले. थंय फर्नांडीस हाका मरण आयिल्ल्याचें दोतोरांनी जाहीर केलें. गाडगीळाक थंयच्यान बांबोळे धाडलो. म्हापशें पुलिसांनी पंचनामो केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
