आगशे उपरांत गोवा वेल्हाचीं शेतां पडलीं काळीं

भांगरभूंय | प्रतिनिधी

शेतां ओंपूंक नाशिल्ल्यान लुकसाण भरपाय मेळप कठीण

भांगरभूंय । समीप नार्वेंकार

पणजी : आगशेच्या शेता उपरांत आतां सिवरेजीचें उदक गोवा वेल्हा शेतांनी पावलें. आगशे वांगडा गोवा वेल्हाचीं शेतां आतां काळीं पडपाक लागल्यांत. गोंय प्रदुशण नियंत्रण मंडळान उदकाचे नमुने घेतल्यात, पूण नेमकें खंयच्यान हें उदक आयलां हाची कल्पना तांकां अजून मेरेन येवंक ना. चडशीं शेतां अजून मेरेन ओंपूंक नाशिल्ल्यान तांकां लुकसाण भरपाय मेळप कठीण आसा, अशें सांत आंन्द्रेचे आमदार विरेश बोरकार हांणी सांगलें.

आगशे सिवरेजीचें उदक पावसाच्या उदकान भरिल्ल्या शेतांनी वचून शेतां प्रदुशीत जाल्लीं. पूण ह्या प्रकारांक लागून आगशेच्या शेतांचो इबाड जाला आनी शेतकारांक शेत रोवप कुस्तार जालां. देखून सरकारान अर्थीक मजत करची आनी तांकां त्रासांतल्यान भायर काडचे, अशी थळाव्या शेतकारांनी मागणी केल्ली. पूण कांय दिसांनी कुशीच्या गांवांत गोवा वेल्हाच्या शेतांनी हो प्रकार दिसून आयलो.

सांत आंन्द्रेचे आमदार विरेश बोरकार हांणी गोंय प्रदुषण नियंत्रण मंडळाचे अधिकारी आनी थळाव्या लोकां सयत ह्या शेतांची पळोवणी केली.

हो प्रकार आमच्या शेतांक आनी भलायके खातीर हुस्क्याचो जाला. हें सिवरेजीचें उदक खंयच्यान आयलां तें बेगिनात बेगीन सोदून काडचें आनी हीं शेतां पयलीं आशिल्लीं तशीं करचीं. आमचें पीक आनी जीण राखतले, अशी आमकां हमी दिवची, अशें थळाव्यांनी मागलां.

हे विशीं उलयतना आमदार विरेश बोरकार हांणी सांगलें, गोंय प्रदुशण नियंत्रण म्हामंडळान शेतांतल्या उदकाचे नमुने घेतल्यात आनी विश्लेशण केले उपरांत खरें कितें तें कळटलें.

दोन दिसां आदीं आगशे नमुने घेतिल्ले आनी शुक्रारा गोवा वेल्हाच्या शेतांचे नमुने घेतल्यात. ह्या शेतांत म्हेळें उदक वचून शेतां काळीं कित्याक पडल्यात हाचें नेमकें कारण सांगपाक शकनात, अशें अधिकाऱ्यांनी सांगलां. शेतांनी उदकाचो प्रवाह सारको जायना देखून एकदां हे विशीं अहवाल येतकत कारण स्पश्ट जातलें, अशें अधिकारी सांगतात, अशी म्हायती बोरकार हांणी दिली. ह्या प्रकारांक लागून शेतकारांचीं शेतां पेड्डेर जाल्ल्यान तांकां रोवपाक मेळना. आमी शेतकी खात्या वरवीं तांकां लुकसाण भरपाय दिवपाचो यत्न करतले, पूण आमचे मुखार एक समस्या उबी रावल्या, ती म्हणल्यार फक्त ओपिल्ल्या शेतांकूच लुकसाण भरपाय मेळटा आनी चडशीं शेतां अजून ओपपाचीं आसात, अशें बोरकार हांणी म्हणलें.