भांगरभूंय | प्रतिनिधी
पणजीः राज्यांतलीं मिठाचीं आगरां तिगोवन दवरपा खातीर जैवविविधता मंडळा कडल्यान धोरण तयार करपाची प्रक्रिया चालीक लायतले. हे खातीर उदका स्रोत खात्याकडवल्यान मानसो बांदपाचें काम येता त्या ऑक्टोबर सावन सुरू जातलें, अशें मुख्यमंत्री डॉ. प्रमोद सावंत हांणी सांगलें.
डॉ. सावंत हांणी सांत आंद्रेचे आमदार विरेश बोरकार हांचे वांगडा भाटी वाठारांतल्या आगरांची पळोवणी केली. ह्या वेळार गोंय राज्य जैवविविधताय मंडळाचे वांगडी सचीव डॉ. प्रदीप सरमोकादम, शेतकी संचालक संदीप फळदेसाय, उदका स्त्रोत खात्याचे संचालक ज्ञानेश्वर सालेलकार, आगरकार, पंच वांगडी हजर आशिल्ले.
पळोवणे उपरांत उलयतना मुख्यमंत्र्यान सांगलें, आमदार बोरकार हांचे सांत आंन्द्रे मतदारसंघांत ५० परस चड आगर आसात आनी ते तिगोवन दवरप गरजेचे. हे आगर पुर्नजीवीत करपा खातीर गोंय राज्य जैवविधताय मंडळ आगरा खातीर एक वेगळें धोरण चालीक लायतलें. हांवें आगरकारांची समस्या आयकून घेवन तांचे खातीर मानस बांदतले आनी मिठागर नितळ करतले. मानस बांदपाचें काम येता त्या आॅक्टोबर म्हयन्या सावन सुरू जातलें, अशें आस्वासन मुख्यमंत्र्यान दिलें.
जैवविधताय मंडळ आगराकारां खातीर एक मार्केट तयार करून तें मीठ विकतें घेतलें. तशेंच तांचें मीठ खावचे वांगडा कॉस्मेटीक वापरा खातीर चाचणी करपाक धाडटले. आमी एकंदरीत अहवाल तयार करतात आनी तो पुराय जाले उपरांत आमी धोरण थारयतले, अशी म्हायती मुख्यमंत्र्यान दिली.
गोंयचे आगर खाशेले आसात आनी ते तिगोवन दवरप काळाजी गरज आसा. ही गोंयची जैवविविधताय तिगोवन दवरपा खातीर सरकारन विधानसभेंत आस्वासन दिलां, तें पुराय करतले. आमदार विरेश बोरकार हांणी हो विशय विधानसभेक मांडिल्लो आनी तो विशय सुटावो करपा खातीर सरकार कार्यरत आसा, अशें मुख्यमंत्र्यान म्हणलें.
सरकारा कडल्यान बांध बांदपाक, मानस मारपाक, पोंयों उसपुपाक सरकार कडल्यान कसलीच मजत वा तेंको मेळनाशिल्ल्यान हे आगर सद्या खाजगी वेवसाय जाल्यात, अशें बोरकार हांणी सांगलें.
हो विशय विधानसभेंत मांडले उपरांत मुख्यमंत्र्यान तांची भेट घेवन शेतकारांची खरी परिस्थिती कितें आसा, तांचे कितें विशय आसात हें आयकून घेवन गरजेच्या धोरणाची अंमल बजावणी करपाचें आस्वासन दिलां. ह्या आगरकारांक जें अनुदान जाय तें ऑक्टोबर मेरेन निश्चीत करतले, अशी म्हायती बोरकार हांणी दिली.
केंद्रीय मीठ संशोधन आनी विश्लेशण प्राधिकरण गुजरात हांगां हें मीठ चाचणे खातीर धाडून थंय तें बर्या दर्जाचें दिसून आयलां. आतां हें मिठाचें रसयान तपासपा खातीर फुडें विश्लेशण करून हेर खात्याक बरोबर घेवन हो वाठार कसो घटमूट करपांक शकतात हाचेर लक्ष दितले, अशें गोंय राज्य जैवविविधताय मंडळाचे वांगडी सचिव डॉ. प्रदीप सरमोकादम हांणी सांगलें.
आमी ह्या आगरा खातीर एक येवजण तयार करपाचे आसात. शेतकारांनी सांगिल्ल्यो गरजो आनी मुख्यमंत्र्यांच्या मार्गदर्शना सकयल आमी काम करतात, तशेंच ३० -४० वर्सां आगरांचेर काम करपी वैज्ञानिकांचो आस्पाव केला. ही येवजण चालीक लावपा खातीर राज्य पांवड्यार कृती पंगड तयार केला. हो वाठार पुर्नजीवीत करपा खातीर गुजरातच्या संस्थेच्या जोड पालवान आमी तांत्रीकी मजत मागल्या, अशें सरमोकादम हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
