भांगरभूंय | प्रतिनिधी
भुंयगत वीज केबल घालपी कंत्राटदाराची मनमानी
भांगरभूंय । प्रतिनिधी
पेडणें: बिरेस्तारा 21 डिसेंबराक दनपारच्या कडार आगरवाडो पार्से वचपी मुख्य रस्तो खणून दोनूय वटांतले रस्ते बंद करपाचो प्रकार घडलो. ताका लागून सुमार तीन वरां येरादारेची कोंयडी जाली.
मांद्रें मतदारसंघांतली विजेची समस्या सोडोवचे खातीर मांद्रें जुनसवाडो वाठारांत नवें उपवीज केंद्र उबारतात. तशेंच भुंयगत वीज केबल घालपाचो वावर सुरू आसा. पूण हें काम करपी कंत्राटदारान फाटल्या तीन म्हयन्यां सावन मनमानी सुरू आसा. साबार कडेन रस्तो खणून तशेच दवरल्यात. मुख्य रस्त्याचेर माती उडयिल्ल्यान पुराय रस्तो बंद जाला. लोकांक धुल्लांतल्यान आनी फोंडकुलांतल्यान प्रवास करचो पडटा. कंत्राटदाराच्या ह्या मनमानी कारभाराचेर लोकांनी खर तिडक उक्तायल्या.
मांद्रें मतदारसंघांतले गुळगुळीत आशिल्ले रस्ते कंत्राटदारान भुंयगत वीज केबल घालपाचें काम करतना मेळत तशे खणून दवरल्यात. ताका लागून धुल्ल आनी फोंडकुलांचें साम्राज्य पातळ्ळां. भौशीक बांदकाम खात्याच्या रस्तो विभागाचे अधिकारी ह्या वावरा कडेन मात पसून लक्ष दिनात. वीज केबल घालपा खातीर जे रस्ते खणिल्ले ते कंत्राटदारान जंय वावर पुराय जाला थंय ते वेवस्थीत पुरूंक लेगीत ना. ते भायर एके कडले काम पुराय जावचे आदींच दुसरे कडेन रस्तो खणून दवरला. ताची मातीय रस्त्याचेर उडोवन अर्द्या परस अदीक आडायला. ह्या सगळ्या प्रकाराक लागून दुचाकी वाहन चालकांक खूब त्रास जातात. सरकारान हे समस्येचेर लक्ष दिवचे, अशी तांणी मागणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
