भांगरभूंय | प्रतिनिधी
पेडणें: आगरवाडो वाठारांत पंचायत इमारतीच्या फाटल्यान व्हडा प्रमाणांत कोयर उडयतात. तशेंच मुखेल रस्त्या भितरल्या रस्त्यारूय व्हडा प्रमाणांत कोयराच्यो राशी पळोवपाक मेळटात. हाचेर योग्य ती कारवाय करची अशी मागणी माजी सरपंच अमोल रावत हांणी केल्या.
आगरवाडो पंचायत वाठारांत बोडको धेनु रस्त्या कुशीक कांय समाजीक संघटणांनी आवाज काडिल्लो. तांणी म्हणिल्लें, कोयराचो विलो लावचो म्हणून ग्रीन नेट बांदून रस्त्या कुशीक ‘हांगा कोयर उडोवचो न्हय’ असो तखटो लायलो. मात कोयर उडोवपी दिसान दीस वाडतूच आसात. जायते फावटीं सांगूनय कोयर उडोवप जाता. आतां पंचायतीन ह्या वाठारांत सीसीटीव्ही लावून जे कोण हांगा कोयर उडयतात तांचेर खर कारवाय करपाची गरज आसा, अशें मत ह्या वेळार थळाव्यांनी उक्तायलें.
बोडको धेनू ह्या रस्त्या कुशीकूय व्हडा प्रमाणांत सेगीत कोयर उडयतात. हो कोयर कांय हॉटेल वेवसायीक, बिराडाक रावपी नागरीक प्लास्टीक पोतयांनी भरून हांगा हाडून कोयर उडयतना दिसतात. हाका लागून हो वाठार बुरसो आनी घाणयारो जाला. ह्या रस्त्यावेल्यान दर दिसा हजारांनी पर्यटक यो-वच करतात. ह्या पर्यटकांक हांगचो कोयर येवकार दिता. सरकारान हाची खरपणान दखल घेवन हो कोयर उडोवप्यांचेर कारवाय करची अशी मागणी थळावे करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
