भांगरभूंय | प्रतिनिधी
पेडणें शिंपणावळ विभाग सुस्त; शेतांत उदक सांचपाची शक्यताय
भांगरभूंय । प्रतिनिधी
पेडणें : आगरवाडो चोपडें पंचायत वाठारांत फाटल्या स म्हयन्यां आदीं शापोरा न्हंयेदेगे वयल्या जंय मिठागरां आसात, ते जमनीर एक परंपरीक व्हाळ शेतांतल्यान वता. तो व्हाळ सरकारी मालकेचो आसा. त्या व्हाळाचेर काँक्रिटाचें बांदकाम करचे खातीर लोखंडाचे वारांव घालून पुराय व्हाळ आडावपाचो यत्न जाला. हे संबंदांत पंचायतीन शिंपणावळ खातें पेडणें विभागाक कागाळ दिले उपरांत हे घडणुकेचो पंचनामो केल्लो.
पेडणें शिंपणावळ अधिकाऱ्यांनी ह्या व्हाळा संबंदांत आपलो अहवाल वरिश्ठ अधिकाऱ्यांक धाडलो, पूण आयज मेरेन त्या बेकायदो बांदकामाचेर कसलीच कारवाय जावंक ना. आगरवाडो चोपडें पंचायतीची ग्रामसभा 18 मेक जाल्ली. तातूंत हो विशय चर्चेक आयिल्लो. त्या वेळार सरपंच शिल्पा नायक आनी थळावी पंच संगिता नायक हांणी सांगिल्लें, पंचायती वतीन शिंपणावळ विभागाक पत्र आनी कागाळ केल्या. चोपड्यां शापोरा न्हंय वाठारांत सीआरझॅड विभागाचो नेम मोडून मिठागरांनी मातयेचो भराव घालून काँक्रीटचें बांदकाम केल्ल्याचें दिसता. थंय एका बिगर गोंयकारान परंपरीक व्हाळा लागसारची सगळी जमीन विकत घेतल्या आनी व्हाळ आडावन बांदकाम करपाक सुरवात केल्या. ह्या बांदकामाक लागून व्हाळाची वाट बंद केल्या. व्हाळाच्या आलतडी आनी पलतडी व्हड प्रमाणांत शेतां आसात. पावसाळ्यांत ती कसतात. पावसाळ्यांत ह्या शेतांत भरिल्लें उदक ह्याच व्हाळांतल्यान वचून जुवारी न्हंयेंत वता. उदकाची वाट मेकळी केली ना जाल्यार शेतांतलें उदक खंय वतलें, असो प्रस्न अनील बगळी हांणी उपस्थीत केला.
पत्र येवंक नाशिल्ल्यान कारवाय ना !
ह्या व्हाळा संबंदांत आमी पंचनामो करून अहवाल वरिश्ठ अधिकाऱ्याक धाडला. वरिश्ठ अधिकाऱ्या कडल्यान अजून आमकां कारवाय करपा खातीर पत्र येवंक नाशिल्ल्यान आमी कारवाय करूंक ना. कारवायेच्या आदेश मेळटाच, तत्काळ कारवाय करतले, अशें पेडणें शिंपणावळ विभागाचे अधिकारी अनील परुळेकार हांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
