भांगरभूंय | प्रतिनिधी
पेडणें: आगरवाडो- चोपड्यां पंचायत वाठारा खातीर आदलो ४०३५१२ हो पोस्टाचो पिनकोड बदलून ४०३५१७ करपाक आगरवाडो चोपडें नागरीक समितीन हरकत घेतल्या. नागरिकां खातीर हो बदल गैरसोयीचो आशिल्ल्यान हाचेर परत विचार करपाची मागणीय तांणी पत्रका वरवीं केल्या. ह्या पत्राच्यो प्रती तांणी थळावी पंचायत, थळावे आमदार जीत आरोलकार, खासदार श्रीपाद नायक हांकां केल्यात.
अचकीत बदलिल्ल्या पिनकोडाक लागून आगरवाडो चोपडें पंचायत वाठारांतल्या नागरिकांची गैरसोय जातली आनी जायत्यो समस्या निर्माण जातल्यो, अशें समितीन गोंयच्या पोस्ट मास्टर जनरलाक धाडिल्ल्या निवेदनांत म्हणलां.
ह्या पंचायत वाठाराक सुरवातेक सावन ४०३५१२ होच पिनकोड आशिल्लो. तशेंच हो विभाग पेडणें टपाल खात्या खाला येतालो. हाका लागून हांगच्या नागरिकांनी आपली आधार नोंदणी, वाहन परवानो, पासपोर्ट, मतदान कार्ड, तशेंच जमीन विशयाचेर नोंदणी, तशेंच हेर सरकारी, बिन सरकारी कागद पत्रांत आदलो ४०३५१२ हो पिनकोड नोंद केला. ह्यान फुडें हो नंबर बदल्ल्यार दरेक सरकारी तशेंच बिन सरकारी कागद पत्रांत नवो पिनकोड नोंद करचो पडटलो. अशें करिना जाल्यार हाचो फटको नागरिकांक बसपाची शक्यताय आसा.
ह्यान पयलीं हो वाठार ग्रामीण भागांत आशिल्लो. आता तो शिवोले, बार्देस म्हालांत आयिल्ल्यान तो शारी विभागांत येतलो. हाका लागून उदक, वीज, टॅलिफोन आनी हेर बिलांचेर ताचो परिणाम जातलो. म्हणून पोस्ट मास्टर जनरलान हाचो योग्य तो विचार करून आगरवाडो चोपड्यां पंचायत वाठार शिवोले पोस्टाच्या खाला व्हरपाचो निर्णय बदलचो आनी आदले वरीं पेडणें (४०३५१२) पोस्टाचे हद्दींत हाडचो अशी मागणी आगरवाडो चोपडें नागरीक समितीन केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
