भांगरभूंय | प्रतिनिधी
पेडणेंः पेडणें तालुक्यांतल्या शापोरा न्हेंयेंत आगरवाडो-चोपडें वाठारांत रातच्या काळखाचो फायदो घेवन व्हडा प्रमाणांत बेकायदेशीर रेंव उसपप चालूच आसता. ह्या बेकायदेशीर वेवसायाक लागून न्हंयेंच्या पर्यावरणाक व्हड धोको निर्माण जालां. आगरवाडो जैवविविधताय मंडळान हे संबंदी राज्य जैवविविधताय महामंडळाच्या वांगडी सचिवांकडेन रीतसर कागाळ दाखल केल्या.
पेडणें तालुक्यांतल्या शापोरा आनी तेरेखोल ह्या दोनूय न्हंयांनी फाटलीं कांय वर्सां बेकायदेशीर रेंव उसपप ही गंभीर समस्या जाला. दोन म्हयन्यां आदीं उगवें जाल्ल्या फारफेटीं उपरांत तेरेखोल न्हंयेंत रेंव उसपप बंद केले आसलें तरी रेंव माफियांनी शापोरा न्हंयेंत धुमाकूळ घातलां. आगरवाडो-चोपडे पंचायत वाठारांत कसलीच कायदेशीर परवानगी नासतना रातच्या वेळार चोरुन रेंव उसपप चालू आसा. आगरवाडो जैवविविधता मंडळाचे अध्यक्ष आनी आदले सरपंच अमोल राऊत हांणी रेंव उसपूपाक लागून न्हंयेची जैवविविधताय नश्ट जाता अशें सांगलें.
दर्यादेग पुलीस मुद्दाम ह्या सगळ्यां कडेन दुर्लक्ष करतात असो आरोप थळाव्या नागरिकांनी केला. पुलिसांच्या आडनदरेक लागून रेंव माफियांक भंय उरुंक ना, आनी सरकारान बेगोबेग हस्तक्षेप करून हो प्रकार थांबवचो आनी पर्यावरणाची राखण करची अशेंय थळाव्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
