भांगरभूंय | प्रतिनिधी
पेडणें: आगरवाडो चोपडें ग्रामसभा सरपंच अँथनी फर्नांडीस हांचे अध्यक्षते खाला 29 जानेवारीक आयोजीत केल्ली. पूण ते ग्रामसभेक लोकांचो उणो प्रतिसाद मेळिल्ल्यान फुडें धुकल्ली. थारावा प्रमाण दरेके ग्रामसभेक ग्राम पांवड्याचेर आदले सांजेर गांवांत पेरगांव घालून ग्रामसभेची नोटीस गांवच्या लोकांक दिवपा विशींचो थारावूय 10 वर्सां आदीं मंजूर केल्लो. ते प्रमाण ग्रामसभेचे आदले सांजेर गांवांत पेरगांव घालपाची परंपरा आसा. ती प्रथा अंदूं सरपंचान कित्याक मोडली, असो प्रस्न नितेश चोपडेंकार हांणी उपस्थीत केलो. तुमकां ग्रामसभेक लोक आयिल्ले नाका काय कितें? तुमी पेरगांव कित्याक घालूंक ना, हाची सरपंचाक समाधानकारक जाप दिवपाक जाली ना. तशें आसत जाल्यार फुडल्या आयतारा परतून ग्रामसभा घेवया, आनी तशें पेरगांव गांवांत घालुंया, अशें ग्रामसभेंत थारलें. ते प्रमाण सरपंच फर्नांडीस हांणी आयतारा 5 फेब्रुवारीक सकाळीं 10.30 वरांचेर ग्रामसभा आयोजीत करतले, अशें जाहीर केलें.
आगरवाडो चोप़डेंचे ग्रामसभेक हातार मेजपाक मेळटले, इतलेच लोक हाजीर आशिल्ले. हे ग्रामसभेंत एकूय लेखी थाराव लोकां कडल्यान येवंक नाशिल्लो. सुरवेक सरपंच फर्नांडीस हांणी येवकार दिलो. पंचायत सचीव परब हांणी फाटले ग्रामसभेचो इतिवृत्तांत वाचपाचे तयारेंत आसतना नितेश चोपडेंकार हांणी ग्रामसभे विशीं गांवांत पेरगांव कित्याक घालूंक ना, असो प्रस्न उपस्थीत केलो. तुमकां ग्रामसभेक लोक नाका जाल्यार आमी वतात अशें सांगताच ग्रामसभेंत शांतताय पातळ्ळी.
ह्या वेळार तरुणी गांवकार, आदले सरपंच अमोल रावत, नितेश चोपडेंकार, एकनाथ चोडणकार, उमेश चोपडेंकार हांणी आरथे परथे प्रस्न विचारून ही ग्रामसभा फुडें धुकलपाची मागणी केली.
ह्या वेळार पंच हेमंत चोपडेंकार, भगीरथ गांवकार, शिल्पा नायक, संगिता नायक आनी दीपाली लिंगुडकार हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
